អន្តរជាតិ
អាជ្ញាធរថៃ៖ រូងភ្នំ Tham Luang នៅឈៀងរ៉ៃ នឹងក្លាយជាកន្លែងទាក់ទាញអ្នកទេសចរ អាជ្ញាធរទេសចរណ៍ថៃ (TAT) មានគំរោងបង្កើនការផ្សព្វផ្សាយពីភ្នំ Tham Luang ដែលស្ថិតក្នុងស្រុកម៉ៃសៃ ខេត្តឈៀងរ៉ៃ ភាគខាងជើងប្រទេសថៃ ឲ្យទៅជាតំបន់ទាក់ទាញទេសចរណ៍សំខាន់មួយ បន្ទាប់ពីមានព្រឹត្តិការណ៍បាត់ក្មេងប្រុស១២នាក់ ព្រមទាំងគ្រូបង្វឹកបាល់ទាត់របស់ពួកគេ ហើយត្រូវបានរកឃើថាមានជីវិតក្រោយការបាត់ខ្លួនរយៈពេល១០ថ្ងៃក្នុងរូងភ្នំនោះ។
បើតាមការផ្សាយរបស់កាសែតបាងកកប៉ុស្តិ៍ អ្នកស្រី Karuna Dechatiwongនាយកគ្រប់គ្រងអាជ្ញាធរទេសចរណ៍ប្រចាំខេត្តឈៀងរ៉ៃ បានលើកឡើងថា TAT នឹងធ្វើការជាមួយអាជ្ញាធរមូលដ្ឋាននិងវិស័យឯកជនដើម្បីលើកកម្ពស់ល្អាងភ្នំដែលកំពុងល្បីនៅជុំវិញពិភពលោក និងកន្លែងទាក់ទាញនៅក្បែរៗនោះ ផ្សេងទៀតដោយរំពឹងថានឹងមានអ្នកទេសចរមួយចំនួននាំគ្នាទៅតំបន់នេះនាពេលអនាគត។
អ្នកស្រី Karuna បានលើកហេតុតផលបន្ថែមថា៖«បន្ទាប់ពីក្រុមជួយសង្គ្រោះបានរកឃើញកីឡាករបាល់ទាត់យុវជនអាយុក្រោម១៦ឆ្នាំ ទាំង១៣ នាក់ ក្នុងនោះមានគ្រូបង្វឹករបស់ពួកគេម្នាក់កាលពីយប់ថ្ងៃចន្ទកន្លងទៅ រូងភ្នំ Tham Luang នេះបានក្លាយជាចំណាប់អារម្មណ៍សម្រាប់ភ្ញៀវទេសចរក្នុងស្រុក និងបរទេស»។
ក្រោមមូលហេតុនេះ អ្នកស្រីបានជំរុញឲ្យប្រជាជន និងអ្នកដែលពាក់ព័ន្ធដែលស្ថិតនៅតំបន់នោះ ត្រៀមខ្លួនឲ្យបានរួចរាល់ដើម្បីចេះផ្តល់ព័ត៌មានអំពីសេវាកម្ម និងការធ្វើដំណើរទៅកាន់រូងភ្នំដែលធំទី៤ក្នុងប្រទេសថៃ ដែលស្ថិតក្នុងខេត្តឈៀងរ៉ៃនេះ។
លើសពីនេះទៀតនោះ TAT ក៏កំពុងពិចារណាសាងសង់ផ្លូវថ្នល់ថ្មីដែលមិនត្រឹមតែដើម្បីលើកកម្ពស់ល្អាងភ្នំនោះទេ ប៉ុន្តែវាក៏ជួយសម្រួលដល់ការធ្វើដំណើររបស់សហគមន៍ក្នុងភូមិនៅក្បែរនោះ ដែលសម្បូរទៅដោយចម្ការម្នាស់ និងសហគមន៍ដែលផលិតគ្រាប់ពូជតែទៀតផង។
សូមបញ្ជាក់ថា ក្រុមអ្នកជំនាញមុជទឹកអង់គ្លេសបានមុជទឹករុករកប្រទះឃើញក្មេងប្រុសទាំង១៣នាក់នៅលើទីទួលក្នុងរូងភ្នំ Tham Luang Nang Non ហើយកាលពីថ្ងៃទី២ ខែកក្កដា។ ប៉ុន្តែមកទល់នឹងពេលនេះ ក្មេងៗទាំងនោះនៅមិនទាន់អាចចាកចេញពីល្អាងភ្នំដែលមានប្រវែង១០គីឡូម៉ែត្រនេះបាននៅឡើយទេ ដោយសារក្នុងរូងនោះមានទឹកលិចនិងមានបញ្ហាស្មុគស្មាញច្រើន៕
Tag:
ក្មេងប្រុសបាត់ខ្លួននៅថៃ
រូងភ្នំ Tham Luang
© រក្សាសិទ្ធិដោយ thmeythmey.com