ជាតិ
បោះឆ្នោត
សម្តេច ហ៊ុន សែន ប្រកាសតាមកម្ចាត់បក្សប្រឆាំងរហូតដល់ទីបញ្ចប់
× ជាថ្មីម្តងទៀត ប្រធានគណបក្សកាន់អំណាច បានប្រកាសយ៉ាងម៉ឺងម៉ាត់ថា មិនឲ្យអតីតគណបក្សប្រឆាំង រើបម្រាសបានជាដាច់ខាត។ នេះជាសញ្ញា ដែលបញ្ជាក់កាន់តែច្បាស់ថា ការត្រូវរ៉ូវគ្នាមុនការបោះឆ្នោត រវាងគណបក្សកាន់អំណាច និងអតីតគណបក្សប្រឆាំង មិនអាចកើតឡើងនោះទេ។
ទោះជាគណបក្សសង្គ្រោះជាតិ ដែលជាគណបក្សប្រឆាំងធំជាងគេ ត្រូវបានរំលាយចោល ហើយបាត់សកម្មភាពស្ទើរទាំងស្រុងនៅក្នុងប្រទេសកម្ពុជាក្តី តែនៅតែរងការព្រមានពីសំណាក់សម្តេច ហ៊ុន សែន ប្រមុខរដ្ឋាភិបាល និងជាប្រធានគណបក្សកាន់អំណាច ជា ជាពិសេសខណៈការបោះឆ្នោត ជិតឈានមកដល់។ ប្រមុខរដ្ឋភិបាល បានលើកឡើងសាជាថ្មីថា នឹងបន្តកាន់តំណែងរយៈពេល១០ឆ្នាំទៀតយ៉ាងតិច ដើម្បីទប់ទល់ជាមួយអតីតក្រុមអ្នកប្រឆាំង ដែលមានចេតនាមិនល្អចំពោះកម្ពុជា។
សម្តេច ហ៊ុន សែន បានផ្ញើសារនយោបាយនេះ ចេញពីវិធីសំណេះសំណាលជាមួយកម្មករ-កម្មការិនី នៅព្រឹកថ្ងៃទី៥ ខែកក្កដា ឆ្នាំ២០១៨។ នៅចំពោះមុខកម្មករ-កម្មការិនី ប្រធានគណបក្សកាន់អំណាច បាននិយាយខ្លាំងៗ ទៅកាន់អតីតក្រុមអ្នកប្រឆាំង ជាពិសេសសំដៅទៅរកលោក សម រង្ស៊ី យ៉ាងដូច្នេះថា៖«ពូចង់វាយពួកហ្នឹង ដែលបំផ្លាញជាតិ បំផ្លាញការឯកភាពទឹកដី។ ពូ នឹងតតបជាមួយពួកហ្នឹងដល់ទីបញ្ចប់»។
បន្ទាប់មក សម្តេច ហ៊ុន សែន ក៏ប្រាប់កម្មករ-កម្មការិនីថា អតីតគណបក្សប្រឆាំង ចូលចិត្តធ្វើនយបោបាយលាបពណ៌ ដែលជាហេតុធ្វើឲ្យប្រទេស បាត់សាមគ្គីភាព។ មេដឹកនាំកម្ពុជារូបនេះ សង្កត់ធ្ងន់ថា៖«កម្ពុជា ជៀសមិនផុតពីសង្គ្រាមទេ បើបក្សចង្រៃមួយនុ៎ង មិនត្រូវបានរំលាយ។ អាងអីឡើង អាងតែសងសឹក។ នយោបាយចេញមក មានអញអត់ឯង មានឯងអត់អញ។ បើបែបហ្នឹង មានអ្នកណា សុខចិត្ត។ គេ មិនសុខចិត្តទេ»។
លោក សម រង្ស៊ី អតីតប្រធានគណបក្សសង្គ្រោះជាតិ ក៏បានចោទគណបក្សប្រជាជនកម្ពុជាវិញដែរ ថាបានបំផ្លាញជាតិ ជាពិសេសបំផ្លាញការបោះឆ្នោតក្នុងអាណត្តិនេះ។ លោក អំពាវនាវកុំឲ្យប្រជាពលរដ្ឋ ទៅបោះឆ្នោតតាមការរៀបចំរបស់រដ្ឋាភិបាលកម្ពុជា។
លើសពីនេះ អតីតប្រធានគណបក្សប្រឆាំង ថែមទាំងជំរុញឲ្យប្រជាពលរដ្ឋ ងើបធ្វើបាតុកម្មតវ៉ានឹងរដ្ឋាភិបាលថ្មី ដែលកើតចេញក្រោយថ្ងៃទី២៩ ខែកក្កដា ឆ្នាំ២០១៨។ លោក ជឿថា ការតវ៉ារបស់ប្រជាពលរដ្ឋ នឹងធ្វើឲ្យប្រទេសកម្ពុជា មានការផ្លាស់ប្តូរ៕
Tag:
បោះឆ្នោត
ហ៊ុន សែន
សម រង្ស៊ី
© រក្សាសិទ្ធិដោយ thmeythmey.com