អ៊ូហ្កង់ដាផ្តល់ការការពារសន្តិសុខពិសេសដល់សមាជិកសភា តែអ្នករិះគន់ថាខ្ជះខ្ជាយលុយរដ្ឋច្រើន

អន្តរជាតិ

អ៊ូហ្កង់ដាផ្តល់ការការពារសន្តិសុខពិសេសដល់សមាជិកសភា តែអ្នករិះគន់ថាខ្ជះខ្ជាយលុយរដ្ឋច្រើន

13, Jul 2018 , 8:59 pm

រូបភាព

ដោយ: ថ្មីៗ

សមាជិកសភាអ៊ូហ្កង់ដានឹងទទួលបានការពារសន្តិសុខពិសេសបំផុតមួយដោយមានក្បួនឡាន និងកងកម្លាំងបាញ់ស៊ីបអមដំណើរផងដែរ។ ការសម្រេចផ្តល់ការការសន្តិសុខពិសេសនេះធ្វើឡើងក្រោយពេលដែលសមាជិកសភាម្នាក់ត្រូវបានគេបាញ់សម្លាប់។ ប៉ុន្តែវិធានការនេះរងការរិះគន់ខ្លាំងដែរព្រោះវានឹងត្រូវចំណាយអស់ច្រើន។

បើគ្មានអ្វីប្រែប្រួលទេ សមាជិកសភាអ៊ូហ្កង់ដានឹងមានបុព្វសិទ្ធិពិសេសដោយទទួលបានអមដំណើរដោយក្បួនការពារពិសេសរួមមានទាំងក្រុម Sniperផងពេលធ្វើដំណើរឬចុះបំពេញការងារ។

ទីភ្នាក់ងារព័ត៌មាន AFP ផ្សាយថា ប្រធានាធិបតីអ៊ូហ្កង់ដាលោក Yoweri Museveni បានចេញបញ្ជាឲ្យស្ថាប័នយោធារៀបចំពង្រាយក្បួនការពារពិសេសមានទាំងក្រុមបាញ់ស៊ីប ឬSniper និងរថយន្តយោធាមានកម្លាំងប្រដាប់អាវុធផងនោះទៅអមដំណើរសមាជិកសភាដែលជាមុខសញ្ញានៃការវាយប្រហារនោះ។

ការចេញបទបញ្ជារបស់ប្រធានាធិបតីនេះធ្វើឡើងដើម្បីឆ្លើយតបនឹងការបាញ់សម្លាប់សមាជិកសភាបក្សកាន់អំណាចលោក Ibrahim Abiriga និងការបន្តកើនឡើងនៃករណីឃាតកម្មមន្ត្រីជាន់ខ្ពស់ផ្សេងទៀតក្នុងប្រទេសក្នុងពេលប៉ុន្មាឆ្នាំចុងក្រោយនេះ។

យ៉ាងណាមិញការរៀបចំការពារសន្តិសុខកម្រិតខ្ពស់នេះមិនទាន់ត្រូវបានគេកំណត់និងវាយតម្លៃនៅឡើយទេថា វានឹងត្រូវចំណាយអស់ប៉ុន្មាននោះ។ ប៉ុន្តែខាងសាធារណៈជនចាប់ផ្តើមប្រតិកម្មនិងរិះគន់រួចទៅហើយ។

ក្រុមសង្គមស៊ីវិលអ៊ូហ្កង់ដាបានអះអាងថា បទបញ្ជាថ្មីនេះនឹងធ្វើឲ្យរដ្ឋមានបន្ទុកកាន់តែធ្ងន់ថែមទៀត ហើយលុយទាំងនោះត្រូវចំណាយលើតែមនុស្សមានអំណាចតែប៉ុន្មាននាក់ប៉ុណ្ណោះ។ ក្រុមសង្គមស៊ីវិលតស៊ូមតិរឿងថវិកាជាតិ (CSBAG) បានវាយតម្លៃថា ការចំណាយរបស់រដ្ឋនឹងកើនដល់រាប់សែនដុល្លារ បើសិនជាការផ្តល់បុព្វសិទ្ធិ និងការការពារសន្តិសុខពិសេសនេះផ្តល់ឲ្យសមាជិកទាំង ៤៥៦នាក់នៅក្នុងប្រទេសទាំងមូលនោះ។

ក្រោយមានមតិរិះគន់ អ្នកនាំពាក្យសភាអ៊ូហ្កង់ដាបានចេញមុខបកស្រាយប្រាប់អ្នកកាសែតវិញថា មានតែសមាជិកសភាដែលប្រឈមនឹងគ្រោះថ្នាក់ប៉ុណ្ណោះដែលទទួលបានបុព្វសិទ្ធិពិសេសនេះ។ ប៉ុន្តែគេមិនបានបកស្រាយច្រើនថា ក្នុងចំណោមនោះមានសមាជិកប៉ុន្មានប៉ុន្មាននាក់ ឬគេអាចដឹងដោយរបៀបណានោះឡើយ។ គេគ្រាន់តែដឹងថា បច្ចុប្បន្នសមាជិកសភាដែលគិតថាខ្លួនប្រឈមគ្រោះថ្នាក់អាចចុះឈ្មោះទទួលបានការរក្សាសុវត្ថិភាពនេះដែរ៕