អន្តរជាតិ
ស៊ី ជិនភីង សន្យារឹតចំណងសេដ្ឋកិច្ចជាមួយអាហ្វ្រិក
× ប្រធានាធិបតីចិន ស៊ី ជិនភីង នៅថ្ងៃទី២១ ខែកក្កដា បានចាប់ផ្ដើមដំណើរទស្សនកិច្ចនៅទ្វីបអាហ្វ្រិកជាលើកដំបូងនៅឆ្នាំ២០១៨ នេះ បន្ទាប់ពីបញ្ចប់ទស្សនកិច្ចផ្លូវរដ្ឋនៅអេមីរ៉ាត់អារ៉ាប់រួម។ លោក ស៊ី ជិនភីង បានទៅដល់ទឹកដីសេណេហ្គាល់ និងបានចុះហត្ថលេខាលើកិច្ចព្រមព្រៀងពាណិជ្ជកម្មមួយចំនួនផង។ ប្រធានាធិបតីចិនរូបនេះក៏សន្យាពង្រឹងទំនាក់ទំនងសេដ្ឋកិច្ចចិន និងអាហ្វ្រិកឲ្យកាន់តែរឹងមាំថែមទៀត។
សេណេហ្គាល់ គឺជាគោលដៅទីមួយរបស់ប្រធានាធិបតីចិន ស៊ី ជិនភីង ក្នុងដំណើរទស្សនកិច្ចប្រទេសចំនួន៤ នៅទ្វីបអាហ្វ្រិក។ ជាមេដឹកនាំចិនទីមួយធ្វើទស្សនកិច្ចនៅសេណេហ្គាល់ លោក ស៊ី ជិនភីង ត្រូវបានទទួលដោយអធិកធអមពីសំណាក់ប្រធានាធិបតីសេណេហ្គាល់ Macky Sall ក្នុងងរដ្ឋធានីដាកានៅរសៀលថ្ងៃទី២១ ខែកក្កដា។
កិច្ចព្រមព្រៀងពាណិជ្ជកម្មទ្វេភាគី ត្រូវបានចុះហត្ថលេខានាឱកាសដំណើរទស្សនកិច្ចរបស់មេដឹកនាំចិន ដែលបានសន្យារឹតចំណងមេត្រីភាពលើវិស័យសេដ្ឋកិច្ចឲ្យកាន់តែរឹងមាំ។ ទោះជាព័ត៌មានលម្អិតនៃកិច្ចព្រមព្រៀងនេះមិនត្រូវបានបញ្ចេញក្ដី មេដឹកនាំសេណេហ្គាល់ Sall និយាយថា មេដឹកនាំទាំងពីរបានជជែកពីកិច្ចសហប្រតិបត្តិការទ្វេភាគី ទំនាក់ទំនងអាហ្វ្រិក-ចិន និងបញ្ហាអន្តរជាតិនានាទៀតផង។ នេះបើតាមទីភ្នាក់ងារព័ត៌មាន AFP ។
ដោយសរសើរចិនថា ជាប្រទេសមានសេដ្ឋកិច្ចធំជាងគេនៅសម័យបច្ចុន្ននេះ លោក Sall និយាយទៀតថា ការរីកចម្រើនរបស់ចិនតាមផ្លូវនៃការអភិវឌ្ឍ គឺជាសារក្ដីសង្ឃឹមបង្ហាញថា ការមិនទាន់អភិវឌ្ឍ មិនមែនជារឿងគ្រោះថ្នាក់ឡើយ ហើយសមរភូមដើម្បីការលូតលាស់នឹងឈ្នះដោយកម្លាំងប្រយុទ្ធមោះមុត។ នាសន្និសីទសារព័ត៌មានក្រោយជំនួបចរចា លោក ស៊ី ក៏ឆ្លើយវិញថា ពេលលោកទៅអាហ្វ្រិក លោកអាចវាស់ស្ទង់ពីថាមភាពអស្ចារ្យរបស់អាហ្វ្រិក។
ស្របពេលចិនក្លាយជាអ្នកវិនិយោគធំជាងគេរបស់អាហ្វ្រិកនោះ ប្រធានាធិបតីចិនរូបនេះសង្ឃឹមថា ទំនាក់ទំនងរវាងក្រុងប៉េកាំង និងអាហ្វ្រិក នឹងកាន់តែប្រសើរថែមទៀត។ ក្នុងរបាយការណ៍កាលពីឆ្នាំមុន ចិនគឺជាអ្នកវិនិយោគពីបរទេសដោយផ្ទាល់ដ៏ធំមួយរបស់អាហ្វ្រិក ដោយមានគម្រោងចំនួន២៩៣ ក្នុងទំហំទឹកប្រាក់៦៦.៤ពាន់លានដុល្លារ ចាប់តាំងពីឆ្នាំ២០០៥ មក។
វត្តមានក្រុមហ៊ុនវិនិយោគចិននៅសេណេហ្គាល់ គ្រាន់តែផ្នែកមួយនៅទំហំប្រាក់ដ៏ច្រើនរបស់ចិននៅអាហ្វ្រិក។ ក្នុងមួយឆ្នាំៗ ចិនបានជះលុយជាច្រើនពាន់លានដុល្លារទៅកាន់អាហ្វ្រិក ហើយភាគច្រើនគឺជាកម្ចីមានការប្រាក់ថោក។ នៅទ្វីបមួយនេះ ចិនសម្លឹងឃើញធនធានរ៉ែដ៏ច្រើនមហាសាលដើម្បីបំពេញសេចក្ដីត្រូវការរបស់ខ្លួន៕
Tag:
ចិន
អាហ្វ្រិក
ស៊ី ជិនភីង
© រក្សាសិទ្ធិដោយ thmeythmey.com