ជាតិ
សង្គមជាតិ
ព្រះសង្ឃនៅកម្ពុជា ចាប់ផ្តើមចូលព្រះវស្សា នៅថ្ងៃនេះ
× ភ្នំពេញ៖ ថ្ងៃនេះ ជាថ្ងៃ១រោច ខែទុតិយាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃសៅរ៍ ទី២៨ ខែកក្កដា ឆ្នាំ២០១៨ គឺជាថ្ងៃដែលព្រះសង្ឃគ្រប់វត្តអារាម នៅទូទាំងប្រទេសកម្ពុជា ចាប់ផ្តើមចូលព្រះវស្សា ដូចឆ្នាំមុនៗដែរ។ តាមទម្លាប់ក្នុងព្រះពុទ្ធសាសនា ព្រះសង្ឃគ្រប់វត្តអារាម តែងតែរៀបចំព្រះកាយ ដើម្បីធ្វើពិធីចូលព្រះវស្សា នៅពេលរសៀល ក្នុងថ្ងៃ១រោច ខែអាសាធ នេះ។
ការចូលព្រះវស្សា គឺជាព្រះវិន័យ ដែលព្រះសម្មាសម្ពុទ្ធទ្រង់បញ្ញត្តិឡើង ដើម្បីឲ្យព្រះសង្ឃសាវ័កគ្រប់អង្គប្រតិបត្តិតាម ដែលមានរយៈពេល៣ខែ ពោលគឺចាប់ថ្ងៃ១រោច ខែអាសាឍដល់ទី១៥កើត ខែអស្សុជ។ ការចូលព្រះវស្សា មានតាំងពីពេលដែលព្រះពុទ្ធគង់ជាធរមានមកម្ល៉េះ។
ការបញ្ញត្តិឲ្យមានការកាន់ព្រះវស្សានេះ គឺព្រះពុទ្ធជាម្ចាស់ មានព្រះបំណងចង់ឲ្យព្រះសង្ឃមានភាពងាយស្រួលក្នុងរដូវវស្សារយៈពេល ៣ ខែនេះ ដែលជារដូវពោរពេញទៅដោយភ្លៀងធ្លាក់ ជោគជាំ សម្បូរភក់ជ្រាំច្រើន។
តាមទម្លាប់ ពុទ្ធបរិស័ទ តែងតែនាំយកនូវទេយ្យទាន ដូចជា អង្ករ ទៀន ធូប ប្រេង ស្បង់ ចីវរ សំពត់សាដក និងគ្រឿងសម្ភារដទៃទៀត ទៅប្រគេនព្រះសង្ឃតាមវត្តអារាម ដើម្បីផ្គត់ផ្គង់ព្រះអង្គក្នុងអំឡុងពេលនៃការចូលព្រះវស្សានេះ។
របាយការណ៍ពីក្រសួងធម្មការ និងសាសនា បានឲ្យដឹងថា ប្រទេសកម្ពុជាបច្ចុប្បន្ន មានព្រះសង្ឃប្រមាណ៦ម៉ឺនអង្គ និងមានវត្តជិត៥ពាន់ នៅទូទាំងប្រទេស៕
© រក្សាសិទ្ធិដោយ thmeythmey.com