អន្តរជាតិ
ប្រមុខការទូតថ្មីអង់គ្លេសទៅចិនដើម្បីពង្រឹងទំនាក់ទំនងទ្វេភាគី មុនចាកចេញពីអឺរ៉ុប រដ្ឋមន្ត្រីការបរទេសអង់គ្លេស Jeremy Hunt ក្នុងសន្និសីទសារព័ត៌មានជាមួយរដ្ឋមន្រ្តីការបរទេសចិន វ៉ាង យី ។ (រូបភាពពី Twitter របស់លោក Jeremy Hunt)
× រដ្ឋមន្ត្រីការបរទេសថ្មីអង់គ្លេស Jeremy Hunt នៅថ្ងៃទី៣០ ខែកក្កដា កំពុងធ្វើទស្សនកិច្ចនៅទឹកដីចិន ក្នុងគោលដៅពង្រឹងទំនាក់ទំនងទ្វេភាគីអង់គ្លេស-ចិន ខណៈអង់គ្លេសកាន់តែតែជិតដល់ពេលចាកចេញពីសហភាពអឺរ៉ុបទៅហើយនោះ។ លោក Hunt ស្វាគមន៍សំណើរបស់ចិនដែលចង់ជជែកពីទំនាក់ទំនងពាណិជ្ជកម្មនៅពេលអង់គ្លេសដើរចេញពីសហភាពអឺរ៉ុបជាស្ថាពរ។
រដ្ឋធានីប៉េកាំង គឺជាគោលដៅនៃដំណើរទស្សនកិច្ចនៅបរទេសទីមួយរបស់រដ្ឋមន្ត្រីការបរទេសថ្មីរបស់អង់គ្លេស Jeremy Hunt ។ លោក Hunt កាន់តំណែងនេះជំនួសលោក Boris Johnson ដែលបានលាលែងពីតំណែងក្រោយមិនត្រូវគ្នាជាមួយនាយករដ្ឋមន្ត្រី ថេរ៉េសា ម៉េយ៍ រឿងចរចាលែងលះជាមួយសហភាពអឺរ៉ុប។ អង់គ្លេសដែលត្រូវចាកចេញពីអឺរ៉ុបនៅដើមឆ្នាំ២០១៩ បានសម្លឹងមើលដៃគូពាណិជ្ជកម្មជាស្រេចដើម្បីរកស៊ីនឹងគ្នា។
នៅថ្ងៃទី៣០ ខែកក្កដា លោក Hunt បានជួបជាមួយសមភាគីចិន វ៉ាង យី និងបានជជែកពីចំណងការទូតទ្វេភាគី ក៏ដូចជាទំនាក់ទំនងពាណិជ្ជកម្មនៅក្រោយការចាកចេញពីសហភាពអឺរ៉ុបរបស់អង់គ្លេសផង។ ក្នុងសន្និសីទសារព័ត៌មានរួមគ្នា ប្រមុខការទូតអង់គ្លេសនិយាយថា លោក និងលោក វ៉ាង បានជជែកពីការស្នើរបស់ចិនដែលចង់បើកការចរចាស្ដីពីកិច្ចព្រមព្រៀងពាណិជ្ជកម្មសេរីទ្វេភាគីនៅក្រោយឆ្នាំ២០១៩ ហើយអង់គ្លេសបានស្វាគមន៍គំនិតនេះ។ នេះបើតាមការផ្សាយរបស់ AFP ។
នៅសល់ពេលមិនច្រើនឡើយសម្រាប់អង់គ្លេសដើម្បីប្រុងប្រៀបខ្លួនសម្រាប់ជីវិតក្រោយពេលលែងលះជាមួយសហភាពអឺរ៉ុប។ ក្រុងឡុងដ៏ចាប់ផ្ដើមគិតគូរខ្លាំងរឿងកិច្ចព្រមព្រៀងពាណិជ្ជកម្មទ្វេភាគីជាមួយប្រទេសនានា ដោយក្នុងនោះបានបោះដៃទៅរកការបង្កើតកិច្ចព្រមព្រៀងសេរីមួយជាមួយអាមេរិករួចហើយ។ រដ្ឋមន្ត្រីពាណិជ្ជកម្មអន្តរជាតិរបស់អង់គ្លេស Liam Fox និយាយថា អង់គ្លេសនឹងចរចាភ្លាមជាមួយអាមេរិក្រោយលែងលះចប់។
កាលពីសប្ដាហ៍មុន នាយករដ្ឋមន្ត្រី ម៉េយ៍ ក៏បានបញ្ជូនរដ្ឋមន្ត្រីជាច្រើនរូបទៅកាន់រដ្ឋសមាជិកសហភាពអឺរ៉ុបទាំង២៧ដើម្បីបញ្ចុះបញ្ចូលក្រៅផ្លូវការ បន្ទាប់ពី Michel Barnier ប្រធានអ្នកចរចារបស់អឺរ៉ុបមិនយល់ស្របលើផែនការរបស់លោកស្រី ម៉េយ៍ ។ អឺរ៉ុប និងអង់គ្លេស ត្រូវព្រមព្រៀងលើកិច្ចព្រមព្រៀងស្ដីពីគោលការណ៍នៃការចាកចេញឲ្យបានមុនជំនួបកំពូលអឺរ៉ុបនៅត្រឹមខែតុលាខាងមុខ។ កាលបរិច្ឆេទចាកចេញផ្លូវការ គឺនៅថ្ងៃទី ២៩ ខែមីនា ឆ្នាំ២០១៩ ។
ចិន ដែលជាមហាអំណាចសេដ្ឋកិច្ចទីពីររបស់ពិភពលោក មានឈ្មោះក្នុងបញ្ជីប្រទេសដែលអង់គ្លេសដាក់គោលដៅស្ថាបនាទំនាក់ទំនងសេដ្ឋកិច្ច។ លោក Hunt ដែលមានភរិយាដើមកំណើតចិននោះ អះអាងថា លោកនឹងប្រើប្រាស់ដំណើរទស្សនកិច្ចរបស់លោក ម៉េយ៍ នៅចិនកាលពីដើមឆ្នាំ ដើម្បីពង្រឹងចំណងមិត្តភាពទ្វេភាគី ព្រោះចិន និងអង់គ្លេសបានឯកភាពលើកិច្ចព្រមព្រៀងពាណិជ្ជកម្មទំហំ១២ពាន់លានដុល្លារ៕
© រក្សាសិទ្ធិដោយ thmeythmey.com