អន្តរជាតិ
ប្រទេសណាខ្លះដែលមានតំបន់សម្បត្តិបេតិកភណ្ឌពិភពលោកច្រើនជាងគេ?
× សម្បត្តិបេតិកភណ្ឌពិភពលោក គឺជាមរតក ឬកេរតំណែលពីអតីតកាល ដែលប្រជាជាតិពិភពលោកកំពុងតែរស់នៅជាមួយបច្ចុប្បន្ន។ ទាំងបេតិកភណ្ឌវប្បធម៌ និងទាំងបេតិកភណ្ឌធម្មជាតិ សុទ្ធសឹងតែប្រភពនៃជីវិតដែលមិនអាចជំនួសបាន និងត្រូវបានវាយតម្លៃ តាមដាន និងគ្រប់គ្រងយ៉ាងយកចិត្តទុកដាក់ពីអង្គការ UNESCO ដែលជាភ្នាក់ងារជំនាញមួយរបស់អង្គការសហប្រជាជាតិ។
ជាគោលការណ៍របស់ UNESCO តំបន់មួយអាចត្រូវបានដាក់នៅក្នុងបញ្ជីនៃសម្បត្តិបេតិកភណ្ឌវប្បធម៌ និងធម្មជាតិពិភពលោក ត្រូវបំពេញលក្ខខណ្ឌមួយចំនួនដូចជា តំបន់ទាំងនោះ តំណាងពីសារៈសំខាន់នៃតម្លៃមនុស្សជាតិ, ភាពល្អឥតខ្ចោះនៃវប្បធម៌-អរិយធម៌មួយ, ភាពល្អឥតខ្ចោះនៃគំរូស្ថាបត្យកម្មនិងបច្ចេកវិទ្យាតាមដំណាក់កាលនៃប្រវត្តិសាស្ត្រ និងបង្ហាញពីសារៈសំខាន់ធម្មជាតិជាដើម។
តាមគេហទំព័រស្រាវជ្រាវពិភពលោក World Atlas រដ្ឋមួយអាចទទួលបានទាំងផលប្រយោជន៍ និងគុណវិបត្តិពីការទទួលស្គាល់តំបន់វប្បធម៌ និងធម្មជាតិរបស់ខ្លួនក្នុងតំបន់សម្បត្តិបេតិភណ្ឌពិភពលោក។ ផលប្រយោជន៍ខ្លាំងនោះគឺ វិស័យសេដ្ឋកិច្ច និងឧស្សាហកម្មទេសចរណ៍តែម្តង។ នោះក៏ព្រោះតែ តំបន់ទាំងនោះ គឺជាទិសដៅអាទិភាពបំផុត ដែលអ្នកទេសចរ កំណត់គោលដៅទស្សនា។
ខណៈទទួលបានផលប្រយោជន៍សេដ្ឋកិច្ចតាមរយៈការចាយវាយរបស់អ្នកទេសចរទៅកាន់តំបន់បេតិភណ្ឌ វា ក៏មានគុណវិបត្តដូចជាគ្នាផងដែរ។ នោះគឺពាក់ព័ន្ធនឹងអធិបតេយ្យនៃការគ្រប់គ្រងដែលតម្រូវឲ្យការសហការជាមួយនឹងភ្នាក់ងារជំនាញអន្តរជាតិដើម្បីធានាពីសុវត្ថិភាពនៃតំបន់ទាំងនោះ រួមជាមួយនឹងការចំណាយកញ្ចប់ថវិកាច្រើនសម្រាប់កិច្ចការអភិរក្សផងដែរ។
ខាងក្រោមនេះ គឺជាបញ្ជីឈ្មោះប្រទេសទាំង១០ ដែលមានតំបន់បេតិកភណ្ឌពិភពលោកច្រើនជាងគេរបស់ពិភពលោក ដែលត្រូវបានដកស្រង់ដោយគេហទំព័រ World Atlas៖
១. អ៊ីតាលី
២. ចិន
៣. អេស្ប៉ាញ
៤. បារាំង
៥. អាល្លឺម៉ង់
៦. ឥណ្ឌា
៧. ម៉ិកសិក
៨. អង់គ្លេស
៩. រុស្ស៊ី និង
១០. អាមេរិក ៕
Tag:
UNESCO
ចំណេះដឹងអន្តរជាតិ
© រក្សាសិទ្ធិដោយ thmeythmey.com