អន្តរជាតិ
ក្រោយគំរាមធ្វើសង្គ្រាម លោក ត្រាំ ចង់ជួបមេដឹកនាំអ៊ីរ៉ង់ដោយគ្មានលក្ខខណ្ឌ ប្រធានាធិបតីអាមេរិក ដូណាល់ ត្រាំ ក្នុងសន្និសីទសារព័ត៌មាននៅសេតវិមាន (រូបភាព Xinhua)
× អស់ពីគំរាមផ្ដល់មេរៀនជូរចត់ទៅឲ្យអ៊ីរ៉ង់ដូចប្រទេសខ្លះធ្លាប់ជួប ប្រធានាធិបតីអាមេរិក ដូណាល់ ត្រាំ នៅថ្ងៃទី៣០ ខែកក្កដា បែរជាបន្ថយសំឡេងគំរាមអ៊ីរ៉ង់ទៅវិញ។ លោក ត្រាំ ដែលគំរាមធ្វើសង្គ្រាមប្រឆាំងអ៊ីរ៉ង់នោះ បានបង្ហាញជំហរចង់ជួបមេដឹកនាំអ៊ីរ៉ង់ ហើយជំនួបនោះអាចធ្វើឡើងគ្រប់ពេល និងមិនចាំបាច់គ្មានលក្ខខណ្ឌមុនអ្វីទាំងអស់។ ការប្រែប្រួលជំហររបស់លោក ត្រាំ ធ្វើឲ្យមន្ត្រីថ្នាក់ក្រោមរបស់លោកប្រឹងបកស្រាយយ៉ាងខ្លាំង។
ទំនងដឹងថាវិធីសាស្ត្រក្ដៅមិនអាចធ្វើអ្វីអ៊ីរ៉ង់បាន ប្រធានាធិបតីអាមេរិក ដូណាល់ ត្រាំ បែរទៅប្រើវិធីសាស្ត្រត្រជាក់ម្ដង។ នៅថ្ងៃទី៣០ ខែកក្កដា លោក ត្រាំ បានព្រលយពាក្យចង់ចរចាជាមួយថ្នាក់ដឹកនាំអ៊ីរ៉ង់ដើម្បីដោះស្រាយបញ្ហាខ្វែងគំនិតគ្នានៅពេលណាក៏បាន ខណៈលោកធ្លាប់បានព្រមានអ៊ីរ៉ង់ថា នឹងរងគ្រោះដោយផលវិបាកធ្ងន់ធ្ងរមិនខាន ឯអ៊ីរ៉ង់វិញក៏ប្រកាសក្ដែងៗមិនខ្លាចអាមេរិក និងត្រៀមខ្លួនឆ្លើយតបទៅនឹងវិធានការរបស់អាមេរិកដែរនោះ។
នាសន្និសីទសារព័ត៌មានជាមួយនាយករដ្ឋមន្ត្រីអ៊ីតាលីនៅសេតវិមាន លោក ត្រាំ និយាយសំដៅប្រធានាធិបតី ហាសាន់ រូហានី ថា លោកនឹងជួបជាមួយអ៊ីរ៉ង់ នៅពេលអ៊ីរ៉ង់ត្រៀមខ្លួនរួចរាល់ ប៉ុន្តែលោកមិនដឹងថា ក្រុងតេហេរ៉ង់ត្រៀមខ្លួនជួបលោករួចហើយឬយ៉ាងណាឡើយ។ យោងតាមទីភ្នាក់ងារព័ត៌មាន AFP លោក ត្រាំ បញ្ជាក់ថា៖ «គ្មានលក្ខខណ្ឌមុនអ្វីទាំងអស់។ បើពួកគេចង់ជួប ខ្ញុំនឹងជួប។ គ្រប់ពេលពួកគេចង់។ ល្អសម្រាប់ពួកគេ ល្អសម្រាប់យើង ល្អសម្រាប់ពិភពលោក»។
យ៉ាងណាមិញ មន្ត្រីសេតវិមាន និងរដ្ឋបាលអាមេរិក បាននាំគ្នាចេញពន្យល់សម្ដីរបស់លោក ត្រាំ ព្រោះលោកបានប្រកាសជំហរអញ្ជើញលោក រូហានី ជាចំហតែម្ដង។ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានបកស្រាយការលើកឡើងលោក ត្រាំ ជុំវិញពាក្យ «គ្មានលក្ខខណ្ឌ»។ លោក ប៉ុមប៉េអូ អះអាងថា មុននឹងដល់ការចរចា អ៊ីរ៉ង់ត្រូវបំពេញលក្ខខណ្ឌបីសិន គឺអ៊ីរ៉ង់ត្រូវប្ដេជ្ញាចិត្តក្នុងការផ្លាស់ប្ដូររបៀបគ្រប់គ្រងប្រជាជន កាត់បន្ថយអាកប្បកិរិយាមួលបង្កាច់ និងត្រៀមទទួលកិច្ចព្រមព្រៀងនុយក្លេអ៊ែរ។
អ្នកនាំពាក្យក្រុមប្រឹក្សាសន្តិសុខជាតិលោក Garrett Marquis ក៏និយាយស្រដៀងលោក ប៉ុមប៉េអូ ដែរ ហើយបានពន្យល់សម្ដីលោក ត្រាំ ថា ប្រធានាធិបតីអាមេរិកនឹងអង្គុយចុះចរចាជាមួយអ៊ីរ៉ង់ ដើម្បីបញ្ចប់អរិភាពជាងបួនទសវត្សរ៍មកនេះ។ លោកបញ្ជាក់ថា អាមេរិកត្រៀមដកទណ្ឌកម្ម បង្កើតទំនាក់ការទូត និងពាណិជ្ជកម្មពេញលេញឡើងវិញ គាំទ្រអ៊ីរ៉ង់ចូលរួមក្នុងសហគមន៍អន្តរជាតិ តែអ៊ីរ៉ង់ត្រូវប្ដូរគោលនយោបាយរបស់ខ្លួនសិន។
តាមពិតទៅ ទំនាក់ទំនងអ៊ីរ៉ង់ និងអាមេរិកមានភាពល្អប្រសើរនៅអាណត្តិលោក បារ៉ាក់ អូបាម៉ា ដែលពេលនោះឈានដល់ការបង្កើតកិច្ចព្រមព្រៀងនុយក្លេអ៊ែរនៅឆ្នាំ២០១៥ ផង។ ប៉ុន្តែមកដល់រដ្ឋបាលលោក ត្រាំ នេះ ទំនាក់ទំនងកាន់តែល្អក់កករ ពេលអាមេរិកដើរចេញពីកិច្ចព្រមព្រៀងអន្តរជាតិ ដោយចោទអ៊ីរ៉ង់ថា នៅព្យាយាមគំរាមកំហែងអាមេរិកដដែល។ អាមេរិកក៏គំរាមដាក់ទណ្ឌកម្មមិនធ្លាប់មានលើអ៊ីរ៉ង់ទៅទៀត តែអ៊ីរ៉ង់មិនបានចុះញ៉មឡើយ៕
Tag:
អាមេរិក
អ៊ីរ៉ង់
ដូណាល់ ត្រាំ
© រក្សាសិទ្ធិដោយ thmeythmey.com