អាមេរិក, ជប៉ុន អូស្ត្រាលីចាប់ដៃគ្នាបង្កើតគម្រោងវិនិយោគហេដ្ឋារចនាសម្ព័ន្ធប្រជែងគំនិតផ្តួចផ្តើមចិន

អន្តរជាតិ

អាមេរិក, ជប៉ុន អូស្ត្រាលីចាប់ដៃគ្នាបង្កើតគម្រោងវិនិយោគហេដ្ឋារចនាសម្ព័ន្ធប្រជែងគំនិតផ្តួចផ្តើមចិន

31, Jul 2018 , 9:19 pm

រូបភាព

ដោយ: សៅ ផលនិស្ស័យ (Sao Phal Niseiy)

អាមេរិក ជប៉ុននិងអូស្ត្រាលីប្រកាសបង្កើតភាពជាដៃគូក្នុងការវិនិយោគ និងអភិវឌ្ឍហេដ្ឋារចនាសម្ព័ន្ធក្នុងតំបន់ឥណ្ឌូប៉ាស៊ីហ្វិកនៅថ្ងៃអង្គារទី ៣១ ខែកក្កដានេះ។ វាជាគម្រោងថ្មីមិនធ្លាប់មានពីមុន ហើយវាក៏យុទ្ធសាស្ត្រថ្មីរបស់អាមេរិកនិងសម្ព័ន្ធមិត្តក្នុងការទប់ទល់ជាមួយចិនដែលកំពុងដឹកនាំគម្រោងធំមហិមា «គំនិតផ្តួចផ្តើមខ្សែក្រវាត់មួយវិថីមួយ»ដែរ។
គម្រោងវិនិយោគលើហេដ្ឋារចនាសម្ព័ន្ធឥណ្ឌូប៉ាស៊ីហ្វិកនេះត្រូវបានប្រកាសដោយលោកស្រី Julie Bishop រដ្ឋមន្ត្រីការបរទេសអូស្ត្រាលីនៅថ្ងៃអង្គារនេះ ហើយលោកស្រីបានអះអាងថា គម្រោងត្រីភាគីនេះត្រូវបង្កើតឡើងដើម្បីប្រមែរប្រមូលទុនវិនិយោគជំរុញកំណើនសេដ្ឋកិច្ចនិងសន្តិភាពតំបន់ដែរ។

សេចក្តីថ្លែងការណ៍រួមរបស់ភាគីទាំងបីដែលចេញផ្សាយក្នុងគេហទំព័រក្រសួងការបរទេសអូស្ត្រាលីបានបញ្ជាក់ដូច្នេះ៖«សហរដ្ឋអាមេរិក, ជប៉ុន និងអូស្ត្រាលីបង្កើតភាពជាដៃគូត្រីភាគីដើម្បីប្រមែរប្រមូលទុនវិនិយោគលើគម្រោងដែលជំរុញសេដ្ឋកិច្ច បង្កើតការងារ និងធានាការអភិវឌ្ឍតំបន់ឥណ្ឌូប៉ាស៊ីហ្វិកប្រកបដោយសេរីភាព ការបើកចំហ និងបរិយាប័ន្ន»។
សេចក្តីថ្លែងការណ៍ដដែលនោះអះអាងថា ភាពជាដៃគូត្រូវភាគីនេះផ្តោតសំខាន់ការវិនិយោគលើវិស័យហេដ្ឋារចនាសម្ព័ន្ធ ថមពល ដឹកញ្ជូន ទេសចរណ៍ និងបច្ចេកវិទ្យា ដោយវាសុទ្ធសឹងតែជាវិស័យស្នូលដែលធានាកំណើនសេដ្ឋកិច្ច និងការផ្សាភ្ជាប់ផង។ ចំណែកក្រុមហ៊ុនវិនិយោគឯកជនបរទេសរបស់អាមេរិករួមជាមួយក្រសួងការបរទេសអូស្ត្រាលី និងធនាគារសម្រាប់កិច្ចសហប្រតិបត្តិការអន្តរជាតិរបស់ជប៉ុនទទួលខុសត្រូវលើការអនុវត្តគម្រោងនេះ។

គេចាំបានថា កាលពីខែកុម្ភៈលោកស្រី រដ្ឋមន្ត្រីការបរទេសអូស្ត្រាលី Julie Bishop បានបង្ហើបថា អាមេរិក អូស្ត្រាលី ជប៉ុន រួមជាមួយឥណ្ឌាផងនោះកំពុងពិភាក្សាគ្នាពីលទ្ធភាពក្នុងការជំរុញការអភិវឌ្ឍហេដ្ឋារចនាសម្ព័ន្ធក្នុងតំបន់ឥណ្ឌូប៉ាស៊ីហ្វិក។ កិច្ចពិភាក្សាពីគម្រោងហេដ្ឋរចនាសម្ព័ន្ធនេះកើតឡើងបន្ទាប់ពីភាគីទាំងបួនលើកឡើងពីបំណងបង្កើតសម្ព័ន្ធសន្តិសុខចតុភាគី (QUAD) ចុងឆ្នាំ ២០១៧ កន្លងមកនោះដែរ។

យ៉ាងណាក៏ដោយ ពេលប្រកាសពីគម្រោងហេដ្ឋារចនាសម្ព័ន្ធឥណ្ឌូប៉ាស៊ីហ្វិកនេះ គេមិនឃើញវត្តមានរបស់ឥណ្ឌាឡើយ ពោលគឺនៅសល់តែបីប្រទេសខាងលើប៉ុណ្ណោះ។ គេដឹងច្បាស់ថា គម្រោងវិនិយោគហេដ្ឋារចនាសម្ព័ន្ធរបស់មហាអំណាចអាមេរិក និងសម្ព័ន្ធមិត្តនេះមានគោលដៅប្រជែងជាមួយមហាយក្សចិនដែលកំពុងដឹកនាំគម្រោងហេដ្ឋារចនាសម្ព័ន្ធដ៏ធំសម្បើមមានទុនលើសមួយទ្រីលានដុល្លារនិងមានមហិច្ឆតាផ្សាភ្ជាប់ពីអាស៊ីដល់អឺរ៉ុប និងដល់អាហ្វ្រិកតាមការកសាងហេដ្ឋារចនាសម្ព័ន្ធ។ កាលពីឆ្នាំមុន គោលនយោបាយសន្តិសុខជាតិអាមេរិកក៏បានកំណត់យកចិន និងរុស្ស៊ីជាដៃគូប្រជែងយុទ្ធសាស្ត្រដ៏ធំ និងយូរអង្វែងរបស់អាមេរិកថែមទៀតផង។

ដោយឡែក ការគ្មានវត្តមានឥណ្ឌាគឺជារឿងគួរឲ្យចាប់អារម្មណ៍បំផុត។ ប៉ុន្តែការរីកចម្រើនឡើងនៃទំនាក់ទំនងរវាងចិន និងឥណ្ឌានាពេលចុងក្រោយនេះប្រហែលជាហេតុផលសំខាន់នៃការដកខ្លួនរបស់មហាយក្សអាស៊ីខាងត្បូងនេះដែរ។

គេចាំច្បាស់ថា កាលពីដើមខែមិថុនាកន្លងមកនេះ លោក នារិន្ទ្រា ម៉ូឌី នាយករដ្ឋមន្ត្រីឥណ្ឌា មិនលើកឡើងសូម្បីតែមួយម៉ាត់ពីកិច្ចសហប្រតិបត្តិការសន្តិសុខចតុភាគី (QUAD) នៅក្នុងវេទិកាសន្តិសុខតំបន់ Shangri-La នៅសិង្ហបុរីឡើយ។ ផ្ទុយទៅវិញ លោកបែរជាលើកឡើងពីសារសំខាន់នៃភាពជាដៃគូល្អជាមួយចិនថែមទៀតផង។

ត្រឡប់មកវិញ ថ្វីបើគំនិតផ្តួចផ្តើមជំរុញការវិនិយោគហេដ្ឋារចនាសម្ព័ន្ធត្រីភាគីនេះត្រូវបានបង្កើតឡើងមែនក៏ដោយ គេមិនទាន់បានទទួលព័ត៌មានលម្អិតពីទំហំហិរញ្ញវត្ថុដែលមហាអំណាចទាំងបីនេះត្រៀមដាក់ចូលក្នុងគម្រោងខ្លួននៅឡើយទេ។ គេរំពឹងថារដ្ឋមន្ត្រីការបរទេសអាមេរិក ម៉ៃ ប៉ុមប៉េអូ ដែលនឹងបំពេញទស្សនកិច្ចនៅអាស៊ានចាប់ពីថ្ងៃពុធទី ១ខែសីហាស្អែកនេះនឹងប្រកាសពីទំហំហិរញ្ញវត្ថុនេះ។ លោក ប៉ុមប៉េអូ នឹងផ្តើមទស្សនកិច្ចរបស់ខ្លួននៅម៉ាឡេស៊ី មុនបន្តទៅចូលរួមប្រជុំថ្នាក់តំបន់មួយចំនួននៅសិង្ហបុរី។ ទិសដៅចុងក្រោយនៃដំណើរទស្សនកិច្ចនេះគឺ ឥណ្ឌូណេស៊ី។

មុនពេលទស្សនកិច្ចនេះដែរ ប្រមុខការទូតអាមេរិកក៏បានប្រកាសពីគម្រោងហិរញ្ញវត្ថុរបស់រដ្ឋបាលអាមេរិកដែលនឹងត្រូវប្រើប្រាស់ដើម្បីជួយគាំទ្របណ្តាប្រទេសឥណ្ឌូប៉ាស៊ីហ្វិកដែរ ហើយវាផ្តោតយកចិត្តទុកដាក់លើវិស័យសំខាន់ៗដូចជាសេដ្ឋកិច្ចឌីជីថល ថមពល និងហេដ្ឋរចនាសម្ព័ន្ធ។ កញ្ចប់ហិរញ្ញវត្ថុរបស់អាមេរិកនេះមានទំហំ ១១៣លានដុល្លារ ហើយវានឹងត្រូវប្រើប្រាស់សម្រាប់គាំទ្រដល់ស្ថាប័នតំបន់សំខាន់ៗដូចជាអាស៊ាន និងគំនិតផ្តួចផ្តើមការផ្សាភ្ជាប់អាស៊ាន-អាមេរិក (US-ASEAN Connect), កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC), គំនិតផ្តួចផ្តើមមេគង្គក្រោម (LMI) ក៏ដូចជាសមាគមរង្វង់មហាសមុទ្រឥណ្ឌា (IORA)ជាដើម៕