បញ្ហារបួសរបស់កីឡាករ បានក្លាយជាក្តីកង្វល់សម្រាប់គ្រូបង្វឹកព្រះខ័នរាជស្វាយរៀង ពេលប៉ះជាមួយភ្នំពេញក្រោន ក្នុងជំនួបដណ្តើមពានរង្វាន់ក្របខណ្ឌលីគកំពូលនៅថ្ងៃសៅរ៍ចុងសប្តាហ៍នេះ។ តែយ៉ាងណាគ្រូបង្វឹករូបនេះអះអាងថា ក្រុមលោកត្រៀមខ្លួនបានយ៉ាងល្អសម្រាប់ជំនួបក្រៅទឹកដីមួយនេះ។ ក្រៅពីជំនួបដ៏ជក់ចិត្តនេះ ក៏មានការប្រកួតពីរគូទៀតផងដែរនៅថ្ងៃនេះ។
ភាពស្រពេចស្រពិលចំពោះវត្តមានរបស់កីឡាករមួយចំនួន រួមមានកីឡាករ សឿយ វិសាល, នេន សុធារ័ត្ន, ណុប តុលា, គន្ធា រ៉ាវ៉ាន់, សួន សុវណ្ណ និង គីម សុខយុទ្ធ ដែលរងរបួសក្នុងជំនួបជាមួយក្រសួងការពារជាតិក្នុងពានរង្វាន់សម្តេច ហ៊ុន សែន បានក្លាយជាបញ្ហាប្រឈមសម្រាប់ព្រះខ័នរាជស្វាយរៀង ក្នុងការប្រជែងជាមួយភ្នំពេញក្រោន។ នេះជាការបង្ហាញក្តីកង្វល់របស់គ្រូបង្វឹកព្រះខ័នរាជស្វាយរៀងលោក Conor Nestor តាមរយៈទំព័រហ្វេសប៊ុកក្លិបព្រះខ័នរាជស្វាយរៀង។
គ្រូបង្វឹករូបនេះបន្ថែមថា ក្រៅពីពួកគេខាងលើ ព្រះខ័នរាជស្វាយរៀងអវត្តមានកីឡាករ៣រូបបន្ថែមទៀត រួមមានកីឡាករ លី សារ័ត្ន ដែលរងពិន័យកាតលឿងពីរប្រកួតជាប់គ្នា និងយុវជនពីររូប គឺកីឡាករ ត្រាយ វិចិត្រ និង ឃៀង ម៉េងហួរ ដែលទើបជួយក្រុម U19 សាលាបាល់ទាត់ជាតិបាទីប្រជែងជាមួយក្រុមជម្រើសលីគទី៤ជប៉ុន កាលពីថ្ងៃទី៣ ខែសីហា។
លោក Conor Nestor បានចាត់ទុកបញ្ហារបួសនិងអវត្តមានកីឡាករមួយចំនួនខាងលើ ជាឱកាសដ៏ល្អសម្រាប់កីឡាករយុវជនក្នុងការបង្ហាញសមត្ថភាព។ តែយ៉ាងណា លោកអះអាងថា ក្រុមព្រះរាជស្វាយរៀងបានត្រៀមរួចរាល់ហើយ សម្រាប់ជំនួបដែលខ្លួនរំពឹងថា នឹងទទួលបានលទ្ធផលមួយនេះ។
ភ្នំពេញក្រោនត្រូវបើកទ្វារកីឡដ្ឋាន RSN ស្វាគមន៍ភ្ញៀវព្រះខ័នរាជស្វាយរៀង សម្រាប់ជំនួបដណ្តើមពានរង្វាន់ក្របខណ្ឌមិត្តហ្វូនខេមបូឌានលីគសប្តាហ៍ទី១៦ វេលាម៉ោង៦ល្ងាចថ្ងៃទី៤ ខែសីហានេះ។ សម្រាប់ការប្រកួតជើងទី១ ព្រះខ័នរាជស្វាយរៀងយកឈ្នះភ្នំពេញក្រោនក្នុងលទ្ធផល ៦-៣ នៅលើទឹកដីរបស់ខ្លួន។
បច្ចុប្បន្នព្រះខ័នរាជស្វាយរៀងឈរលេខ៦ក្នុងតារាងមាន២១ពិន្ទុក្នុងដៃ ខណៈភ្នំពេញក្រោនឈរលេខ៧មាន២១ពិន្ទុដូចគ្នា តែចាញ់គ្រាប់បាល់ចំណេញ។ សម្រាប់ប៣ប្រកួតចុងក្រោយ ព្រះខ័នរាជស្វាយរៀងឈ្នះ២ និងស្មើ១ ខណៈភ្នំពេញក្រោនចាញ់ទាំង៣ប្រកួត។ កាលពីសប្តាហ៍មុនព្រះខ័នរាជស្វាយរៀបបញ្ចប់ក្នុងលទ្ធផលស្មើ ១-១ ជាមួយអង្គរថាយហ្គឺរ រីឯភ្នំពេញក្រោនចាញ់ណាហ្គាវើល ២-១។
ក្រៅពីជំនួបដ៏ជក់ចិត្តខាងលើ ពហុកីឡដ្ឋានជាតិនឹងក្លាយជាទីតាំងកាត់សេចក្តីជំនួបរវាងក្រុមអគ្គស្នងការនគរបាលជាតិជាមួយសូលទីឡូអង្គរនៅម៉ោង៦ល្ងាច។ នាជំនួបជើងទី១អគ្គស្នងការនគរបាលជាតិយកឈ្នះសូលទីឡូអង្គរក្នុងលទ្ធផល ២-១។ នៅម៉ោង៦ល្ងាចនេះផងដែរ ក្រុមចំណូលថ្មីកំពុងឡើងជើងវិសាខា បើកទ្វារកីឡដ្ឋានស្តាតចាស់ ស្វាគមន៍ក្រុមមិនដែលស្គាល់ឈ្នះវេស្ទើនភ្នំពេញ។ វិសាខាយកឈ្នះវេស្ទើនភ្នំពេញ ៣-០ នៅជើងទី១៕