ជាតិ
សង្គមជាតិ
អាជ្ញាធរខេត្តស្វាយរៀង ចេញមុខបកស្រាយពីការកាប់ដើមធ្នង់ នៅសាលាខេត្ត រូបពីហ្វេសប៊ុកសាលាខេត្តស្វាយរៀង
× ស្វាយរៀង៖ ដើមធ្នង់មួយដើម ដែលស្ថិតនៅសាលាខេត្តស្វាយរៀង ល្បីថា ត្រូវបានគេលួចកាប់នោះ មិនមែនជាការពិតនោះទេ។ នេះបើយោងតាមការបកស្រាយរបស់ លោក ម៉ែន វិបុល អភិបាលខេត្តស្វាយរៀង ដែលបានប្រាប់ដល់សារព័ត៌មានថ្មីៗ។
លោក ម៉ែន វិបុល អភិបាលខេត្តស្វាយរៀង បានបញ្ជាក់ថា ករណីដែលគេចោទថាមានអ្នកលួចកាប់ដើមធ្នង់មួយដើម នេះជាព័ត៌មានក្លែងក្លាយតែប៉ុណ្ណោះ។ លោក ម៉ែន វិបុល ពន្យល់ដូច្នេះថា៖« ការពិតដើមធ្នង់នេះ មានអាយុកាលប្រមាណជា ៥០ឆ្នាំ ទៅ៦០ឆ្នាំ និងមានសភាពចាស់ ពុកផុយ និងងាប់ជ្រុះស្លឹក។ ទើបយើងបញ្ជាឲ្យរដ្ឋបាលកាប់ផ្តួលដើមឈើនេះ ដើម្បីកុំឲ្យប៉ះពាល់ ឬខូចខាតទ្រព្យសម្បត្តិ និងគ្រោះថ្នាក់ជាយថាហេតុដល់មន្ត្រីរាជការបម្រើការងារនៅក្នុងសាលាខេត្ត ក៏ដូចជាប្រជាពលរដ្ឋមកទទួលសេវា រដ្ឋបាលខេត្តស្វាយរៀង។
រដ្ឋបាលខេត្តស្វាយរៀង បានបញ្ជាក់ថា បំណែកនៃដើមធ្នង់នេះ មានសភាពពុកផុយស្ទើរតែ៦០ ភាគរយ ទៅហើយ។ ចំណែកបំណែកឈើតែ ៤០ភាគរយ ប៉ុណ្ណោះ ដែលរដ្ឋបាលខេត្តស្វាយរៀង បានរក្សាទុកសម្រាប់ច្នៃធ្វើជា តុ កៅអី និងគ្រឿងសង្ហារឹមផ្សេងៗ ដើម្បីប្រើប្រាស់ជាប្រយោជន៍រួមនៅក្នុងសាលាខេត្ត។
ដើមធ្នង់នេះ ត្រូវបានខាងសាលាខេត្តកាប់ចោល កាលថ្ងៃទី២១ ខែកក្កដា ឆ្នាំ២០១៨ ពោលគឺមិនមែននៅថ្ងៃ ស មុនបោះឆ្នោត ១ថ្ងៃ នោះទេ។ នេះបើតាមសេចក្តីជូនដំណឹងរបស់រដ្ឋបាលខេត្តស្វាយរៀង ដែលឆ្លើយតបទៅមតិរិះគន់របស់សាធារណៈជន៕
© រក្សាសិទ្ធិដោយ thmeythmey.com