ជាតិ
សង្គមជាតិ
អភិបាលរាជធានីភ្នំពេញបញ្ជាឱ្យស្ថាបនាឡើងវិញនូវច្រាំងទន្លេបាក់ដែលបណ្តាលមកពីទឹកជំនន់
× អភិបាលរាជធានីភ្នំពេញលោក ឃួង ស្រេង នៅព្រឹកថ្ងៃទី៤ ខែសីហា បានចុះសួរសុខទុក្ខប្រជាពលរដ្ឋ និងបានត្រួតពិនិត្យច្រាំងទន្លេមួយកន្លែង ដែលបាក់បណ្តាលមកពីទឹកជំនន់ទន្លេសាប។ ច្រាំងទន្លេដែលបាក់ មានទីតាំងស្ថិតនៅភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វារ។
លោក ឃួង ស្រេង បានជំរុញដល់អាជ្ញាធរខណ្ឌជ្រោយចង្វារ មន្ទីរសាធារណការ និងដឹកជញ្ជូន និងមន្ទីរធនធានទឹក និងឧតុនិយម ពិនិត្យ និងសិក្សាដើម្បីស្ថាបនាច្រាំងទន្លេដែលបាក់ខាងលើ។ តាមលោកអភិបាលរាជធានី ច្រាំងទន្លេនេះនឹងត្រូវស្ថាបនាឡើងវិញយ៉ាងឆាប់រហ័ស ដើម្បីបំពេញសេចក្តីត្រូវការរបស់ប្រជាពលរដ្ឋមូលដ្ឋាន។ តាមគម្រោងច្រាំងទន្លេខាងលើ នឹងត្រូវបុកស៊ីផាយបន្ទះដែក ទប់ការពារច្រាំង និងធ្វើផ្លូវឱ្យរឹងមាំ និងជាប់បានយូរ។
យោងតាមការចុះផ្សាយរបស់ក្រសួងព័ត៌មាន ដែលដកស្រង់សំដីពីអាជ្ញាធរមូលដ្ឋាន ផ្លូវចំណុះដែលប្រាក់នោះ តែងកើតឡើងជារៀងរាល់ឆ្នាំប៉ុន្តែមានសភាពតិចតួច និងត្រូវបានអាជ្ញាធរមូលដ្ឋានជួសជុលជាបន្តបន្ទាប់។ សម្រាប់ឆ្នាំនេះ ស្ថានភាពបានបាក់ខ្លាំង ទើបអាជ្ញាធរមូលដ្ឋានមិនមានលទ្ធភាពជួសជុល៕
© រក្សាសិទ្ធិដោយ thmeythmey.com