ជាតិ
លោក អូស្មាន ហាស្សាន់៖ ខ្មែរអ៊ីស្លាមនឹងចំណាយថវិកាជាង៣លានដុល្លារ ទៅចូលរួមបុណ្យហាជ្ជី នៅអារ៉ាប៊ីសាអូឌីត រូបពីហ្វេសប៊ុកលោក ឧស្មាន ហាស្សាន់ (គាត់ពាក់អាវខៀវ )
× ភ្នំពេញ៖ ពលរដ្ឋខ្មែរអ៊ីស្លាម នឹងចំណាយថវិកា៣,៥លានដុល្លារ សម្រាប់ទៅចូលរួមបុណ្យហាជ្ជី នៅប្រទេសអារ៉ាប៊ីសាអូឌីត។ ពលរដ្ឋខ្មែរអ៊ីស្លាម ទៅចូលរួមបុណ្យហាជ្ជីនេះ មានចំនួន១,០០៨នាក់ នៅឆ្នាំ២០១៨។
រដ្ឋមន្ត្រីប្រតិភូអមនាយករដ្ឋមន្ត្រី លោក អូស្មាន ហាស្សាន់ បាននិយាយថា មូលហេតុដែលពលរដ្ឋខ្មែរអ៊ីស្លាម មានលទ្ធភាពចំណាយច្រើននេះ ដោយសារតែពួកគេ មានជីវភាពធូរធារ ស្របពេលដែលកំណើនសេដ្ឋកិច្ចកម្ពុជា កំពុងលូតលាស់ ក្នុងដំណើរការអភិវឌ្ឍប្រទេស។
ក្នុងឆ្នាំ២០១៨នេះ ពលរដ្ឋខ្មែរអ៊ីស្លាមទៅចូលរួមបុណ្យហាជ្ជី កើនឡើងរហូតដល់១,០០៨នាក់ ដែលក្នុងនោះ ៩៩០នាក់ មានលទ្ធភាពរ៉ាប់រងការចំណាយថវិកាដោយខ្លួនឯង ដោយសរុបថវិកាចំណាយប្រមាណ ៣,៥៦៤,០០០ដុល្លារ។ នេះជាការបញ្ជាក់របស់លោក អូស្មាន ហាស្សាន់ ដែលបានបន្ថែមថា កាលពីឆ្នាំ២០១៧ មានពលរដ្ឋខ្មែរអ៊ីស្លាម ចូលរួមបុណ្យហាជ្ជីនេះ ចំនួន ៦៤៤នាក់។
គួរបញ្ជាក់ថា ជារៀងរាល់ឆ្នាំ សាសនិកអ៊ីស្លាម នៅគ្រប់ទិសទីទូទាំងពិភពលោក ប្រមាណ៣លាននាក់ នឹងទៅប្រារព្ធបុណ្យនេះ នៅឯទីក្រុងម៉ាក្កះ ប្រទេសអារ៉ាប៊ីសាអូឌីត។ ពិធីបុណ្យហាជ្ជី នឹងត្រូវចាប់ផ្តើមនៅថ្ងៃទី២០ ខែសីហា ឆ្នា២០១៨ ដែលមានរយៈពេលមួយសប្តាហ៍។ បុណ្យហាជ្ជីនេះ គឺជាកាតព្វកិច្ចទី៥ របស់សាសនិកអ៊ីស្លាម៕
Tag:
អូស្មាន ហាស្សាន់
អ៊ីស្លាម
ហាជ្ជី
© រក្សាសិទ្ធិដោយ thmeythmey.com