ជាតិ
នយោបាយជាតិ
អតីតអ្នកកាសែតនៃវិទ្យុអាស៊ីសេរី ត្រូវបានដោះលែង លោក អ៊ួន ឈិន (ខាងឆ្វេង) លោក យាង សុជាមេត្តា (ខាងស្ដាំ)។ រូបពីហ្វេសប៊ុកលោក អ៊ួន ឈិន
× លោក អ៊ួន ឈិន និងលោក យាង សុជាមេត្តា អតីតអ្នកកាសែតនៃវិទ្យុអាស៊ីសេរី ត្រូវបានដោះលែងចៅក្រមស៊ើបសួរ ចេញដីកាដោះលែងឲ្យមានសេរីភាពឡើងវិញ នៅថ្ងៃទី២១ ខែសីហា ឆ្នាំ២០១៨នេះ។ នេះបើតាមការចុះផ្សាយរបស់ Fresh News ដែលអះអាងថាមន្ត្រីតុលាការ បានផ្តល់ព័ត៌មានដល់ស្ថាប័នខ្លួន។
ពួកគេទាំងពីរ ត្រូវបានដោះលែងឲ្យក្រៅឃុំជាបណ្តោះអាសន្ន ប៉ុន្តែ មិនទាន់រួចផុតពីបទចោទនោះទេ។ ដូច្នេះ តុលាការ នៅតែអាចហៅពួកគេ ទៅសួរ បានគ្រប់ពេល។
លោក កែវ វ៉ាន្នី មេធាវីការពារក្តីឲ្យអ្នកទាំងពីរ មិនទាន់ទទួលបានព័ត៌មាននេះជាផ្លូវការឡើយ។ លោក ប្រាប់សារព័ត៌មានថ្មីៗ តាមទូរសព្ទយ៉ាងដូច្នេះថា៖«ខ្ញុំដឹងតាមអង្គការ និងសារព័ត៌មាននានាដែរ ថាដោះលែងពួកគាត់។ តែខ្ញុំមិនទាន់ឃើញដីកាដោះលែងរបស់ចៅក្រមស៊ើបសួរទេ។ ខ្ញុំ នឹងទៅតុលាការ ដើម្បីសួរពីរឿងនេះឲ្យច្បាស់»។
លោក អ៊ួន ឈិន និងលោក យាង សុជាមេត្តា ត្រូវបានចោទចំនួនពីរបទល្មើស គឺ បទផលិតព័ត៌មានដោយខុសច្បាប់ ដែលធ្វើឲ្យអន្តរាយដល់សន្តិសុខជាតិ និងបទផលិតវីដេអូអាសអាភាស។ អ្នកទាំងពីរ ត្រូវបានចាប់ខ្លួន កាលពីថ្ងៃទី១៤ ខែវិច្ឆិកា ឆ្នាំ២០១៧៕ © រក្សាសិទ្ធិដោយ thmeythmey.com