ជាតិ
អ្នកស្រី ទេព វន្នី ចង់ផ្ដល់ភាពកក់ក្ដៅដល់គ្រួសារ ជាជាងបន្តសកម្មភាពទាមទារដីធ្លី អ្នកស្រី ទេព វន្នី ពេលចេញពីពន្ធនាគារ។ រូបពី AFP
× ភ្នំពេញ៖ អ្នកស្រី ទេព វន្នី សកម្មជនតវ៉ាក្នុងសំណុំរឿងបឹងកក់ ក្រោយទទួលបានសេរីភាពឡើងវិញ ពីការឃុំខ្លួនអស់រយៈពេល២ឆ្នាំ ៥ថ្ងៃ អ្នកស្រីចង់ផ្ដល់ភាពកក់ក្ដៅដល់កូន និងឪពុក ម្ដាយចាស់របស់អ្នកស្រី។ អ្នកស្រី ទេព វន្នី មិនមានគម្រោងតវ៉ា ទាមទារអ្វីទៀតឡើយ ព្រោះសហគមន៍បឹងកក់របស់អ្នកស្រីបានទទួលការដោះស្រាយស្ទើរទាំងស្រុងហើយ នៅសល់តែ១គ្រួសារ ដែលអ្នកស្រី និងសហគមន៍អាចដោះស្រាយតាមសន្តិវិធី។
ខាងក្រោមនេះ ជាកិច្ចសម្ភាសរវាងកញ្ញា ថាន រស្មី អ្នកព័ត៌មាន នៃសារព័ត៌មានថ្មីៗ ជាមួយ អ្នកស្រី ទេព វន្នី តាមខ្សែទូរស័ព្ទ៖
ក្នុងនាមជាម្តាយ និងកូនស្រីម្នាក់ អ្នកស្រី ទេព វន្នី មិនមានគម្រោងទាមទារ ឬធ្វើបាតុកម្មអហិង្សាណាមួយ ទាក់ទងនឹងបញ្ហាដីធ្លីឡើយ។ អ្វីដែលអ្នកស្រីចង់ធ្វើក្រោយមានសេរីភាពនេះ គឺការផ្ដល់ភាពកក់ក្ដៅដល់កូនទាំង២ និងលោកឪពុក អ្នកម្ដាយចាស់ របស់អ្នកស្រីប៉ុណ្ណោះ។
អ្វីដែលអ្នកស្រីពិបាកទទួលយកបំផុត ក្នុងអំឡុងពេលដែលអ្នកស្រីបានជាប់ពន្ធនាគាររយៈ២ឆ្នាំ និង៥ថ្ងៃនោះ គឺនៅពេលដែលកូនៗ និងឪពុក ម្ដាយចាស់ឈឺ អ្នកស្រីមិនអាចបំពេញតួនាទីជាម្ដាយល្អ និងជាកូនល្អបាន។
នៅពេលដែលឆ្មាំគុកមកប្រាប់អ្នកស្រីថា អ្នកស្រីត្រូវបានលើកលែងទោសនោះ សកម្មជនដីធ្លីរូបនេះ ស្ទើរតែមិនជឿថាជាការពិត រហូតដល់គេជូនអ្នកស្រីមកដល់ផ្ទះទើបអ្នកស្រីជឿមែនថា អ្នកស្រីមានសេរីភាពឡើងវិញហើយ។
សកម្មជនដីធ្លីដ៏សកម្មរូបនេះ ត្រូវបានតុលាការឃាត់ខ្លួនកាលពីថ្ងៃទី ១៥ ខែសីហា ឆ្នាំ២០១៦ នៅពេលដែលអ្នកស្រីចូលរួមទាមទារឲ្យមានការដោះលែងមន្ត្រីសិទ្ធិមនុស្ស អាដហុក៥រូបពីពន្ធនាគារ។ ក្រោយពេលឃាត់ខ្លួន អ្នកស្រីត្រូវបានចោទប្រកាន់ចំនួន២ករណីបន្ថែមទៀត។ ករណីទី១ គឺជាការចោទប្រកាន់ពីបទប្រមាថអ្នករាជការសាធារណៈ និងប្រឆាំងអ្នករាជការសាធារណៈដោយមានស្ថានទម្ងន់ទោស នៅថ្ងៃទី០៨ ខែធ្នូ ឆ្នាំ២០១៧។ ករណីទី២ គឺទាក់ទងនឹងបទហិង្សាដោយចេតនា មានស្ថានទម្ងន់ទោស នៅថ្ងៃទី៧ ខែកុម្ភៈ ឆ្នាំ២០១៨ របស់តុលាការកំពូល។ ករណីនេះ អ្នកស្រី ទេព វន្នី ត្រូវបានតុលាការផ្តន្ទាទោសដាក់ពន្ធនាគាររយៈពេល ២ឆ្នាំកន្លះ និងត្រូវពិន័យជាប្រាក់ចូលរដ្ឋចំនួន៥លានរៀល និងសងជំងឺចិត្តទៅសន្តិសុខដែលជាដើមបណ្ដឹងទាំង២នាក់ ចំនួន៩លានរៀល។
កាលពីថ្ងៃទី១៥ ខែសីហា ឆ្នាំ២០១៧ មានក្រុមអង្គការជាតិ អន្តរជាតិ ដែលធ្វើការលើបញ្ហាសិទ្ធិមនុស្ស ដីធ្លី និងផ្នែកជាច្រើនទៀត ជិត៧០អង្គភាព បានធ្វើសេចក្ដីថ្លែងការណ៍រួម អំពាវនាវឲ្យអាជ្ញាធរ ដោះលែងអ្នកស្រី ទេព វន្នី។ ក្រុមអង្គការសង្គមស៊ីវិលយល់ឃើញថា បទចោទដែលសាលាដំបូងរាជធានីភ្នំពេញ ចោទមកលើអ្នកស្រី ទេព វន្នី មានចរិតនយោបាយ និងពុំមានភស្តុតាងជាក់លាក់ណាមួយ ដែលត្រូវចោទប្រកាន់ទៅសកម្មជនដីធ្លីរូបនេះ៕
Tag:
សកម្មជនដីធ្លី
ទេពវន្នី
© រក្សាសិទ្ធិដោយ thmeythmey.com