សហភាពអឺរ៉ុប បន្តផ្តល់ហិរញ្ញប្បទានជិត១២០លានអឺរ៉ូដល់កម្ពុជា

ជាតិ

សេដ្ឋកិច្ច

សហភាពអឺរ៉ុប បន្តផ្តល់ហិរញ្ញប្បទានជិត១២០លានអឺរ៉ូដល់កម្ពុជា

23, Aug 2018 , 9:59 pm

រូបភាព

រូបភាពពីហ្វេសប៊ុកក្រសួងសេដ្ឋកិច្ច និងហិរញ្ញវត្ថុ

ដោយ: ខន ចំប៉ា

សហភាពអឺរ៉ុប នឹងនៅបន្តគាំទ្រកម្ពុជា ដោយផ្តល់ជំនួយប្រមាណ១១៧លានអឺរ៉ូ សម្រាប់អនុវត្តន៍កម្មវិធីមួយចំនួន។ នេះជាការលើកឡើងរបស់ លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា នាជំនួបពិភាក្សាការងារជាមួយ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២២ ខែសីហា។

លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានជួបពិភាក្សាការងារជាមួយលោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា កាលពីព្រឹកថ្ងៃទី២២ ខែ សីហា នៅទីស្តីការក្រសួងសេដ្ឋកិច្ចនិងហិរញ្ញវត្ថុ។

ជំនួបពិភាក្សានេះ ផ្តោតលើការត្រួតពិនិត្យសមិទ្ធកម្មលើការអនុវត្តក្របខណ្ឌលទ្ធផលប្រចាំឆ្នាំ ២០១៧ ដែលមានចែងក្នុងកិច្ចព្រមព្រៀងហិរញ្ញប្បទានឥតសំណងរវាងរាជរដ្ឋាភិបាល កម្ពុជា និងសហភាពអឺរ៉ុប ដើម្បីគាំទ្រកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី ៣ ក៏ដូចជាការបន្តជំរុញពង្រឹងកិច្ចសហប្រតិបត្តិការឲ្យកាន់តែស៊ីជម្រៅថែមទៀត។

តាមរយៈសេចក្តីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុ ក្នុងជំនួបនោះ លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានសាទរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការអនុវត្តន៍កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ រហូតសម្រេចបានសមិទ្ធផលជាច្រើន។

តាមរយៈលទ្ធផលវាយតម្លៃសមិទ្ធផលឆ្នាំ២០១៧ រាជរដ្ឋាភិបាលកម្ពុជាសម្រេចបានលក្ខខណ្ឌទូទៅ គឺ១០០ភាគរយ និងលក្ខខណ្ឌជាក់លាក់ គឺ ៩២.៥ភាគរយ។ ក្នុងន័យនេះ ថវិកាទ្រទ្រង់សម្រាប់បើកផ្តល់ក្នុងឆ្នាំ២០១៨ មានចំនួន ៤,៧៣៨,៥០០អឺរ៉ូ។

ទន្ទឹមនឹងនេះ លោក George edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា ក៏បានបញ្ជាក់ពីសុឆន្ទៈនៃកិច្ចសហប្រតិបត្តិការ ក្នុងការបន្តការគាំទ្រលើកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី៣ ២០២០-២០២១ ប្រមាណ២២លានអឺរ៉ូ,កម្មវិធីសម្រាប់កំណើនប្រកបដោយនិរន្តរភាព និងបរិយាប័ន្ននៅកម្ពុជា លើវិស័យជលផលប្រមាណ ៨៩ លានអឺរ៉ូ និងកម្មវិធីសម្ព័ន្ធភាពការប្រែប្រួលអាកាសធាតុកម្ពុជា ដំណាក់កាលទី៣ ប្រមាណ៦លានអឺរ៉ូ។ សរុប ថវិកាគឺចំនួន១១៧លានអឺរ៉ូ។

លោក អូន ព័ន្ធមុន្នីរត្ន័ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអរគុណចំពោះវត្តមានរបស់សហភាពអឺរ៉ុប ដែលបានជួយគាំទ្រដល់កម្មវិធីកែទម្រងការគ្រប់គ្រងហិរញ្ញវត្ថុសាធារណៈ ចាប់តាំងពីឆ្នាំ២០០៥មក ទាំងជំនួយជាហិរញ្ញប្បទានឥតសំណង និងជំនួយបច្ចេកទេស និងកម្មវិធីកែទម្រង់ផ្សេងទៀតរបស់រាជរដ្ឋាភិបាល។ សម្រាប់លោករដ្ឋមន្ត្រី ការគាំទ្រនេះ ជាការឆ្លុះបញ្ចាំងឲ្យឃើញ ពីកិច្ចទំនាក់ទំនងល្អរវាងកម្ពុជា និងសហភាពអឺរ៉ុប។

កម្ពុជា នឹងខិតខំប្រឹងប្រែងបន្ថែមទៀត ក្នុងការពង្រឹងការប្រមូលចំណូលក្នុងស្រុក និងការគ្រប់គ្រងចំណាយសាធារណៈ ប្រកបដោយប្រសិទ្ធភាព គណនេយ្យភាព និងតម្លាភាព។ នេះជាការគូសបញ្ជាក់បន្ថែមរបស់ លោក អូន ព័ន្ធមុន្នីរ័ត្ន៕