កីឡាអន្តរជាតិ
អន្តរជាតិ
មហាសេដ្ឋីឥណ្ឌូណេស៊ី លោក Bambang បានមេដាយសំរឹទ្ធលើការប្រកួតល្បែងបៀក្នុង Asian Games លោក Michael Bambang Hartono បានមេដាយសំរឹទ្ធ១ លើប្រភេទកីឡាបៀ (Bridge) ក្នុងវិញ្ញាសា Supermixed ជាក្រុម នៃព្រឹត្តិការណ៍កីឡាអាស៊ី Asian Games។ រូបថត AFP
× មហាសេដ្ឋីលោក Michael Bambang Hartono និងជាអត្តពលិកឥណ្ឌូណេស៊ីឈ្នះមេដាយសំរឹទ្ធ១ លើប្រភេទកីឡាបៀ (Bridge) ក្នុងវិញ្ញាសា Supermixed ជាក្រុម នៃព្រឹត្តិការណ៍កីឡាអាស៊ី Asian Games ឆ្នាំ២០១៨។
បុរសវ័យ ៧៨ឆ្នាំរូបនេះ ដែលជាម្ចាស់ក្រុមហ៊ុនបារី Djarum clove និងធនាគារ BCA បានប្រកួតចាញ់ក្រុមចិនក្នុងលទ្ធផល ៦០-១៣៧ ក្នុងវិញ្ញាសា Supermixed ជាក្រុមនៅវគ្គពាក់កណ្តាលផ្តាច់ព្រ័ត្រនាទីលានប្រកួត JIExpo ក្នុងក្រុងហ្សាការតា ដោយទទួលបានមេដាយសំរឹទ្ធស្ទួនជាមួយហុងកុង។
លោក Bambang ដែលជាមហាសេដ្ឋីលំដាប់ទី១នៅឥណ្ឌូណេស៊ីមានប្រាក់ដល់ទៅ ៨,៧ពាន់លានដុល្លារអាមេរិក បានចូលរួមប្រកួតប្រជែងជាមួយមិត្តរួមក្រុម៥រូបផ្សេងទៀត រួមមានលោក Bert Toar Polii វ័យ៦៤ឆ្នាំ លោក Frangky Karwur វ័យ៥២ឆ្នាំ លោក Jemmy Bojoh អាយុ៤៧ឆ្នាំ និងកីឡាការិនីពីររូបទៀតមានអ្នកស្រី Conny Sumampauw អាយុ៤៣ឆ្នាំ និង Rury Andhani អាយុ៣៤ឆ្នាំ។
ក្រៅពីបានសំរឹទ្ធលើវិញ្ញាសា Supermixed ជាក្រុមនេះ ក្រុមកីឡាបៀឥណ្ឌូណេស៊ីក៏ទទួលបានមេដាយសំរឹទ្ធមួយផ្សេងទៀតលើវិញ្ញាសា Mixed ជាក្រុមផ្នែកបុរស ពីព្រឹត្តិការណ៍កីឡាអាស៊ីលើកទី១៨នេះ ក្រោយចាញ់ចិនក្នុងវគ្គពាក់កណ្តាល់ផ្តាច់ព្រ័ត្រដូចគ្នាក្នុងលទ្ធផល ៨៧-១២១៕
Tag:
Asian Games
Michael Bambang Hartono
Bridge
© រក្សាសិទ្ធិដោយ thmeythmey.com