Asian Games៖ មន្ត្រីកីឡា ហាមអត្តពលិកទាំងអស់ផឹកស្រានៅភូមិកីឡា

កីឡាអន្តរជាតិ

អន្តរជាតិ

Asian Games៖ មន្ត្រីកីឡា ហាមអត្តពលិកទាំងអស់ផឹកស្រានៅភូមិកីឡា

28, Aug 2018 , 4:06 pm

រូបភាព

ដោយ: ទេព ពិទូរ្យ

ស្ថាប័នរៀបចំការប្រកួតកីឡាអាស៊ី Asian Games ឆ្នាំ២០១៨ បានបង្ក្រាបការផឹកស្រានៅតាមភូមិកីឡាជាទីស្នាក់នៅរបស់អត្តពលិកដែលបានទៅចូលរួមទាំងអស់។ ក្រុមមន្ត្រីឥណ្ឌូណេស៊ីនិយាយដូច្នេះនៅថ្ងៃទី២៧ ខែសីហា ដោយលើកហេតុផលថាក្រុមកីឡាករមិនត្រូវបានអនុញ្ញាតឲ្យប្រើប្រាស់គ្រឿងស្រវឹង និងធ្វើឲ្យប៉ះពាល់សុខភាព។

បើតាមការផ្សាយរបស់ទីភ្នាក់ងារព័ត៌មាន AFP លោក Harry Warganegara មន្ត្រីនៃគណៈកម្មាធិការរៀបចំការប្រកួតកីឡាឥណ្ឌូណេស៊ី (Inasgoc) បាននិយាយថាក្រុមមន្ត្រី និងអត្តពលិកដែលបានបញ្ចប់ការប្រកួតរួចរាល់ហើយនោះក៏ត្រូវបានហាមឃាត់ឲ្យទទួលទានគ្រឿងស្រវឹងនៅក្នុងភូមិកីឡាដែរ។

«មានកីឡាករមួយចំនួនបានចូលមកដោយមានស្រាបៀរមកជាមួយ ... យើងបានរារាំងមិនឲ្យមានដបស្រាចូលមកក្នុងឡើយ។ យើងនៅបន្តការពិនិត្យ ពួកគេមិនអាចយកវាចូលបានឡើយ ... វាធ្វើឲ្យខូចសុខភាព ហើយការជក់បារីក៏មិនត្រូវបានអនុញ្ញាតដែរ»។ មន្ត្រី Inasgoc ខាងលើបន្ថែមដូច្នេះ។

ប៉ុន្តែយ៉ាងណាក៏ដោយ លោកទទួលស្គាល់ថាមិនអាចគ្រប់គ្រងបាន១០០ភាគរយនោះទេ ហើយមួយវិញទៀតក៏មានការតវ៉ាខ្លះពីអត្តពលិកមួយចំនួនដោយពួកគេលើកឡើងថាត្រូវការស្រាខ្លះព្រោះ រងាន់នឹងម្ហូបអាហារ និងភេសជ្ជៈនៅទីនោះ។ លោក Warganegara បានឆ្លើយតបវិញថា លោកជាមន្ត្រី លោកមិនមែនជាកីឡាករ ទើបអាចផឹកស្រាបាន ប៉ុន្តែអត្តពលិកទាំងអស់ធ្វើដូចលោកបានទេ។

ឥណ្ឌូនេស៊ីជាប្រទេសដែលមានប្រជាជនមូស្លីមច្រើនជាងគេនៅលើពិភពលោកបានហាមឃាត់ការលក់ស្រាក្នុងហាងទំនើបៗ និងហាងតូចៗនៅខាងក្រៅ ព្រមទាំងតំបន់កំសាន្តលើកោះបាលីដែលជាកោះល្បីឈ្មោះផងដែរកាលពីឆ្នាំ២០១៥។

ព្រឹត្តិការណ៍កីឡាអាស៊ីដែលរៀបចំឡើងក្នុងក្រុងហ្សាការតា និងប៉ាឡាំបាំង ប្រទេសឥណ្ឌូណេស៊ីដែលមានការចូលរួមពីអត្តពលិក និងមន្ត្រីប្រមាណ១៧០០០នាក់ បានប្រព្រឹត្តទៅរយៈពេល១០ថ្ងៃមកហើយ។ ម្ចាស់ផ្ទះឥណ្ឌូណេស៊ីគិតត្រឹមថ្ងៃទី២៨ ខែសីហានេះ ទទួលបានមេដាយបណ្តោះអាសន្នសរុប ៦៨ ក្នុងនោះ មាស២៣ ប្រាក់១៧ និងសំរឹទ្ធ២៨ ឈរនៅចំណាត់ថ្នាក់ទី៤ នៅពីក្រោមក្រុមនាំមុខចិន ជប៉ុន និងកូរ៉េខាងត្បូង៕