អន្តរជាតិ
កូឡុំប៊ី ដកខ្លួនចេញពីប្លុកអាមេរិកខាងត្បូង ព្រោះគាំទ្រវ៉េណេស៊ុយអេឡាហើយប្រឆាំងអាមេរិក
ប្រធានាធិបតីកូឡុំប៊ី Ivan Duque (រូបភាព AFP)
×![]()
ដោយ: តន ចាន់រិទ្ធារ៉ា
កូឡុំប៊ី នៅថ្ងៃទី២៧ ខែសីហា បានប្រកាសដកខ្លួនពីសហភាពប្រជាជាតិអាមេរិកខាងត្បូង (UNASUR) ព្រោះមិនពេញចិត្តជំហររបស់អង្គការនេះដែលគាំទ្ររបបដឹកនាំនៅវ៉េណេស៊ុយអេឡា។ ប្រធានាធិបតីថ្មីកូឡុំប៊ី Ivan Duque និយាយថា ប្រទេសលោកបានបញ្ជូនលិខិតមួយច្បាប់ទៅកាន់អង្គការ UNASUR រួចហើយ។ ជានីតិវិធី កូឡុំប៊ី នឹងចាកចេញជាផ្លូវការនៅរយៈពេល៦ខែក្រោយការជូនដំណឺងនេះ។
ប្រធានាធិបតីទើបស្បថចូលកាន់តំណែងរបស់កូឡុំប៊ី Ivan Duque នៅថ្ងៃទី២៧ ខែសីហា និយាយថា ប្រទេសលោកបានចាប់ផ្ដើមអនុវត្តតាមនីតិវិធីរបស់សហភាពប្រជាជាតិអាមេរិកខាងត្បូង (UNASUR) ដើម្បីដកខ្លួនពីអង្គការមួយនេះ។ ជំហរងាកទៅរករដ្ឋាភិបាលវ៉េណេស៊ុយអេឡា ហើយប្រឆាំងអាមេរិក អាចជាមូលហេតុដែលនាំឲ្យលោក Duque សម្រេចចិត្តដកកូឡុំប៊ីពីអង្គការតំបន់ដែលមានសមាជិកចំនួន១២ប្រទេស។
ការដកខ្លួនចេញពី UNASUR គឺជាការសន្យារបស់លោក Duque តាំងពីយុទ្ធនាការស្វែងរកសំឡេងឆ្នោតមកម្ល៉េះ។ ក្នុងសេចក្ដីថ្លែងការណ៍ទូរទស្សន៍ ប្រធានាធិបតីកូឡុំប៊ីរូបនេះនិយាយថា៖ «រដ្ឋមន្ត្រីការបរទេសបានផ្ញើលិខិតជូនដំណឹងទៅកាន់ទីស្នាក់ការ UNASUR ជាអង្គការដែលយើងថ្កោលទោសសន្ធិសញ្ញារបស់គេ។ ក្នុងរយៈពេល៦ខែ ការដកខ្លួនរបស់យើងនឹងចូលជាធរមាន។» នេះបើតាមការផ្សាយរបស់សារព័ត៌មាន RT ។
ក្នុងការប្រកាសដកខ្លួននេះ លោក Duque អះអាងថា ប្លុក UNASUR បានបរាជ័យក្នុងការដោះស្រាយវិបត្តិនយោបាយនៅវ៉េណេស៊ុយអេឡា ដែលរង្គោះរង្គើដោយសាររលកបាតុកម្មតវ៉ាប្រឆាំងរដ្ឋាភិបាល និងការប៉ុនបងធ្វើឃាតប្រធានាធិបតី នីកូឡាស់ ម៉ាឌុយរ៉ូ ។ ដូចគ្នានឹងជំហររបស់អាមេរិក មេដឹកនាំកូឡុំប៊ីរូបនេះចាត់ទុករដ្ឋាភិបាលលោក ម៉ាឌុយរ៉ូ ជារបបដឹកនាំផ្ដាច់ការ និងហៅប្លុក UNASUR ថា ជាជនរួមគំនិតទៀតផង។
ក្រោយការជូនដំណឹងខាងលើ កូឡុំប៊ី គឺជាប្រទេសតែមួយគត់ដែលដើរចេញពីអង្គការតំបន់មួយនេះផ្លូវការ។ កាលពីខែមេសា សមាជិកមួយប្រទេសដូចជាអាហ្សង់ទីន ប្រេស៊ីល ស៊ីលី កូឡុំប៊ី ប៉ារ៉ាហ្កាយ និងប៉េរូ បានប្រកាសព្យួរសមាជិកភាពរបស់ខ្លួនរយៈពេលមួយឆ្នាំ ក្រោមហេតុផលថា ទាស់គំនិតគ្នាលើការជ្រើសរើសអគ្គលេខាធិការ UNASUR ។ វ៉េណេស៊ុយអេឡា អេក្វាទ័រ ហ្គីយ៉ាន សូរីណាម និងអ៊ុយរូហ្កាយ ជាសមាជិកពេញសិទ្ធិសេសសល់។
មុនការដើរចេញរបស់កូឡុំប៊ី បូលីវីបានស្នើឲ្យក្រុងបូហ្គោតាពិចារណាឡើងវិញ។ ក្រុងឡាប៉ាស បានសរសើរអង្គការដែលបង្កើតក្នុងឆ្នាំ២០០៨ និងមានគោលដៅប្រឆាំងអាមេរិកនេះថា សមាហរណកម្មជាធម្មជាតិដែលរួមបញ្ចូលគ្រឿងសម្គាល់របស់អាមេរិកខាងត្បូង ដែលមានប្រវត្តិសាស្ត្រដូចគ្នា៕
Tag:
កូឡុំប៊ី
UNASUR
វ៉េណេស៊ុយអេឡា
© រក្សាសិទ្ធិដោយ thmeythmey.com
