កីឡាអន្តរជាតិ
អន្តរជាតិ
កីឡាអាស៊ី៖ សិង្ហបុរីផ្តល់រង្វាន់ជាង២៣ម៉ឺនដុល្លារដល់ជ័យលាភីមេដាយមាសកីឡាបៀ
× ក្រុមអត្តពលិកកីឡាបៀ (Bridge) លើវិញ្ញាសាជាក្រុមបុរសរបស់សិង្ហបុរីនឹងទទួលបានប្រាក់រង្វាន់ចំនួន ៣២០.០០០ដុល្លារសិង្ហបុរី (២៣៤៧៨៤ដុល្លារអាមេរិក) ក្រោយឈ្នះមេដាយមាសពីព្រឹត្តិការណ៍កីឡាអាស៊ី Asian Games នៅថ្ងៃទី២៧ ខែសីហា។
ប្រាក់លើកទឹកចិត្តនេះធ្វើឡើងក្រោមកម្មវិធីប្រាក់រង្វាន់រាប់ពាន់លានដុល្លាររបស់ក្រុមប្រឹក្សាអូឡាំពិកជាតិសិង្ហបុរី (SNOC) ដែលបានឧបត្ថម្ភដោយក្រុមប្រឹក្សាភិបាល Tote និងក្រុមហ៊ុនឆ្នោត Pool Singapore។
២០ភាគរយ នៃចំនួនទឹកប្រាក់សរុបជាង២៣ម៉ឺនដុល្លារអាមេរិកនេះ នឹងត្រូវផ្តល់ឲ្យទៅស្ថាប័នគ្រប់គ្រងកីឡាបៀសិង្ហបុរីសម្រាប់ការបណ្តុះបណ្តាល និងការអភិវឌ្ឍនាពេលអនាគត។ ហើយនេះជាតម្រូវការដែលកំណត់ក្នុងកម្មវិធីប្រាក់លើកទឹកចិត្តរបស់សិង្ហបុរី។
សមាជិកក្រុមកីឡាបៀ ៦នាក់ដែលអាចយកឈ្នះមេដាយមាសពីកីឡាអាស៊ីលើកទី១៨ ដែលធ្វើឡើងនៅឥណ្ឌូណេស៊ីរួមមានកីឡាករ Poon Hua, Loo Choon Chou, Zhang Yukun, Fong Kien Hoong, Desmond Oh និង Kelvin Ong។ ពួកគេម្នាក់ៗប្រហែលជាទទួលបានប្រាក់រង្វាន់ប្រមាណ២៩០០០ដុល្លារអាមេរិក មុនពេលបង់ពន្ធរួច។
គិតត្រឹមថ្ងៃទី២៨ ខែសីហានេះ ក្រុមអត្តពលិកពីសិង្ហបុរីទទួលបានមេដាយសរុបចំនួន១៧ ហើយ ក្នុងនោះមេដាយមាស៣ ប្រាក់៤ និងសំរឹទ្ធ១០ ឈរនៅចំណាត់ថ្នាក់ទី១៦ ក្នុងតារាងមេដាយបណ្តោះអាសន្ន៕
Tag:
Asian Games
សិង្ហបុរី
© រក្សាសិទ្ធិដោយ thmeythmey.com