កីឡាអន្តរជាតិ
អន្តរជាតិ
Asian Games៖ ឥណ្ឌូណេស៊ីច្រានចោលការចោទប្រកាន់ជុំវិញការបន្លំពិន្ទុកីឡា Silat
× ម្ចាស់ផ្ទះឥណ្ឌូណេស៊ីបានច្រានចោលពាក្យបណ្តឹងថាមានភាពលម្អៀងក្នុងការដាក់ពិន្ទុលើប្រភេទកីឡា Pencak Silat នៅក្នុងព្រឹត្តិការណ៍កីឡាអាស៊ី Asian Games ឆ្នាំ២០១៨ បន្ទាប់ពីទទួលបានមេដាយមាសរហូតដល់ទៅ១៤។
កាសែត South China Morning Post បានផ្សាយថា ភាពចម្រូងចម្រាសក្នុងប្រភេទកីឡា Pencak Silat បានកើតឡើងក្នុងការប្រកួតកីឡាលំដាប់ទី២ពិភពលោកលើកទី១៨ ដោយមានការចោទប្រកាន់ម្ចាស់ផ្ទះថាបានផ្តល់ពិន្ទុមិនត្រឹមត្រូវ ដោយលម្អៀងទៅរកអត្តពលិកឥណ្ឌូណេស៊ី។ តែយ៉ាងណា មន្ត្រីកីឡាកំពូលឥណ្ឌូណេស៊ីបានបដិសេធជុំវិញការចោទប្រកាន់នេះដោយចេញមកការពារកិត្តិយសបន្ទាប់ពីមានប្រទេសមួយចំនួនបានចោទសួរពីគុណភាពនៃការវិនិច្ឆ័យរបស់អាជ្ញាកណ្តាលនៅហ្សាការតា។
មហាសេដ្ឋីឥណ្ឌូណេស៊ី លោក Erick Thohir ដែលជាប្រធានគណៈកម្មាធិការរៀបចំការប្រកួតកីឡា Asian Games បានរិះគន់ការចោទប្រកាន់ថាចៅក្រមបានគាំទ្ររាល់កីឡាករឥណ្ឌូណេស៊ីដោយឲ្យឈ្នះមេដាយមាស ១៤ ក្នុងចំណោមមេដាយមាសសរុប ១៦មេដាយមាសពីប្រភេទកីឡា Pencak Silat នេះ។
លោក Erick Thohir ប្រធានគណៈកម្មាធិការរៀបចំការប្រកួតកីឡា Asian Games
«យើង [ឥណ្ឌូនេស៊ី] ក៏ធ្លាប់ចូលរួមប្រកួតប្រជែងនៅតាមបណ្តាប្រទេសដទៃទៀតដែរ ហើយនៅពេលម្ចាស់ផ្ទះទទួលបានមេដាយបែបនេះយើងមិនដែលត្អូញត្អែរឡើយ។ ខ្ញុំពិតជាសោកស្តាយដែលមានបណ្តាប្រទេសជាច្រើនតវ៉ាជាពិសេសគឺប្រទេសអ៊ីស្លាម [សមមិត្ត] ដែលមានទំនាក់ទំនងល្អជាមួយយើងនោះ។ Erick Thohir និយាយដូច្នេះ។
លោកបានបន្ថែមទៀតថា៖«ខ្ញុំច្រានចោលការចោទប្រកាន់ពីការបន្លំនេះ។ ការប្រកួតបានបើកទូលាយសម្រាប់អ្នកទស្សនាអាចមើលឃើញតាមរយៈទូរទស្សន៍យ៉ាងច្បាស់។ យើងបានតាមដានយ៉ាងសុគ្រិត្យទៅលើចៅក្រមទាំងអស់ដែលពួកគេត្រូវបានជ្រើសរើសដោយគណៈគ្រប់គ្រងកីឡាអាស៊ី។
លោក Thohir ក៏បានបង្ហាញមុខក្នុងចំណោមអ្នកតវ៉ាអំពីការវិនិច្ឆ័យពិន្ទុនោះគឺមានលោក Sheik Alauddin Yacoob Marican ជាម្ចាស់ជើងឯកកីឡានេះ២សម័យកាល និងជាប្រធានសហព័ន្ធកីឡា Pencak Silat អាស៊ី (APSIF) និងជាអ្នកគ្រប់គ្រងក្រុមកីឡាសិង្ហបុរីផងដែរ៕
Tag:
Asian Games
Pencak Silat
ឥណ្ឌូណេស៊ី
© រក្សាសិទ្ធិដោយ thmeythmey.com