កីឡាអន្តរជាតិ
អន្តរជាតិ
Asian Games៖ ជប៉ុនជារនាំងចុងក្រោយ សម្រាប់ Son ដើម្បីគេចផុតកាតព្វកិច្ចយោធា
× ក្រុមកីឡាបាល់ទាត់ជម្រើសជាតិ ក្រោមអាយុ២៣ឆ្នាំ (U21) កូរ៉េខាងត្បូង និងជប៉ុន នឹងត្រូវតទល់គ្នាក្នុងការប្រកួតវគ្គផ្តាច់ព្រ័ត្រដើម្បីដណ្តើមមេដាយមាសវិញ្ញាសាកីឡាបាល់ទាត់បុរស នៃព្រឹត្តិការណ៍កីឡាអាស៊ី Asian Games ឆ្នាំ២០១៨ នៅល្ងាចថ្ងៃទី១ ខែកញ្ញា វេលាម៉ោង ៦:៣០ នាទីយប់ [ម៉ោងនៅកម្ពុជា] នាកីឡដ្ឋាន Pakan Sari Stadium។
ក្រៅពីការប្រជែងយកមេដាយមាសរវាងក្រុមយក្សពីទ្វីបអាស៊ីទាំងពីរ អ្វីដែលជាការចាប់អារម្មណ៍បំផុតមួយទៀតនោះគឺជុំវិញកាតព្វកិច្ចយោធារបស់ Son Heung-min ខ្សែបម្រើឆ្មើមរបស់កូរ៉េខាងត្បូង និងក្រុម Tottenham Hotspur ។
នៅក្រោមច្បាប់របស់ប្រទេសកូរ៉េខាងត្បូង បុរសទាំងអស់ត្រូវមានកាតព្វកិច្ចយោធារយៈពេល ២១ខែ នៅមុនអាយុ ២៨ឆ្នាំ។ ដូច្នេះ Son ដែលបច្ចុប្បន្នមានវ័យ២៦ឆ្នាំ ក៏នឹងឈានដល់ពេលវេលាត្រូវបំពេញកាតព្វកិច្ចយោធាជូនជាតិចាប់ពីខែកក្កដា ឆ្នាំ២០១៩ តទៅ។ តែយ៉ាងណា រដ្ឋាភិបាលកូរ៉េខាងត្បូងក៏បានផ្តល់ការលើកលែងវិញដែរ សម្រាប់អត្តពលិករូបណា ដែលទទួលជោគជ័យក្នុងការប្រកួតធំៗសម្រាប់ប្រទេសជាតិ។
នេះមានន័យថា អតីតសមាជិក Bayer Leverkusen រូបនេះ ត្រូវធ្វើយ៉ាងណាជួយកូរ៉េខាងត្បូងយកឈ្នះជប៉ុនដណ្តើមមេដាយមាសឲ្យខាងតែបាន ដើម្បីរួចផុតពីកាតព្វកិច្ចយោធានេះ។ ប៉ុន្តែប្រសិនបើកូរ៉េខាងត្បូងបរាជ័យក្នុងប្រកួតវគ្គផ្តាច់ព្រ័ត្រនោះ Son នឹងត្រូវអវត្តមានឲ្យក្រុមមាន់ខ្នាយមាស Spurs រហូតដល់ទៅ២រដូវកាល ពោលគឺចាប់ពីរដូវកាល ២០១៩-២០២០ និង ២០២០-២០២១ ដើម្បីបំពេញកាតព្វកិច្ចយោធា ហើយនេះនឹងអាចប៉ះពាល់ដល់អាជីពជាកីឡាករបាល់ទាត់របស់គេផងដែរ។
មុនឈានទៅដល់វគ្តផ្តាច់ព្រ័ត្រនេះ កូរ៉េខាងត្បូបានយកឈ្នះវៀតណាមក្នុងវគ្គពាក់កណ្តាលផ្តាច់ព្រ័ត្រដោយលទ្ធផល ៣-១ មុនឈ្នះ អ៊ូសបេគីស្ថាន ៤-៣ នៅវគ្គ៨ក្រុមចុងក្រោយ។
សម្រាប់ក្រុមជម្រើសជាតិជប៉ុនវិញ យើងបានស្គាល់ហើយថាក្រុមរហស្សនាមសាម៉ូរ៉ៃនេះជាក្រុមដែលរឹងមាំបំផុតនៅតំបន់អាស៊ី។ ពួកគេបានយកឈ្នះអារ៉ាប៊ីសាអូឌីតនៅវគ្គ១/៤ផ្តាច់ព្រ័ត្រក្នុងលទ្ធផល ២-១ មុនឈ្នះអេមីរ៉ាតអារ៉ាប់រួម ១-០ ក្នុងវគ្គ៤ក្រុមចុងក្រោយដើម្បីឈានទៅកាន់វគ្គផ្តាច់ព្រ័ត្រនេះ។
តើ Son Heung-min អាចរួចផុតពីកាតព្វកិច្ចយោធារយៈពេល២១ខែដែរឬទេ?
Tag:
Asian Games
Son Heung-min
© រក្សាសិទ្ធិដោយ thmeythmey.com