អន្តរជាតិ
រដ្ឋាភិបាលចិនបិទសារព័ត៌មានអូស្ត្រាលី ABC ដោយលើកហេតុផលថាបំពានច្បាប់អ៊ីនធឺណិតខ្លួន
×![]()
ដោយ: ថ្មីៗ
សារព័ត៌មានរដ្ឋអូស្ត្រាលី ABC បានអះអាងនៅថ្ងៃចន្ទទី ៣ ខែកញ្ញានេះថា អាជ្ញាធរចិនបានសម្រេចបិទមិនឲ្យមានការភ្ជាប់ទៅកាន់គេហទំព័ររបស់ខ្លួនដោយអះអាងថា ABC នេះបបានបំពានបទបញ្ញត្តិគ្រប់គ្រងបណ្តាញអ៊ីនធឺណិតរបស់ចិន។ ការសម្រេចបិទនេះធ្វើឡើងមួយឆ្នាំប៉ុណ្ណោះក្រោយស្ថាប័ននេះមានផ្សព្វផ្សាយជាភាសាចិន។
រដ្ឋាភិបាលចិនបានសម្រេចបិទមិនឲ្យមានការភ្ជាប់ទៅកាន់គេហទំព័រ និង App របស់សារព័ត៌មានអូស្ត្រាលី ABC ចាប់តាំងពីថ្ងៃ ២២ ខែសីហាម្ល៉េះ ប៉ុន្តែមិនមានការបកស្រាយច្បាស់លាស់ពីហេតុផលនៃការបិទនេះទេ។
បើតាមទីភ្នាក់ងារព័ត៌មាន AF សារព័ត៌មាន ABC ទើបចេញប្រកាសជាផ្លូវការនៅថ្ងៃចន្ទនេះទេជុំវិញការបិទការផ្សព្វផ្សាយរបស់ខ្លួន បន្ទាប់ពីមន្ត្រីចិនម្នាក់ដែលបម្រើការងារនៅគណៈកម្មការមជ្ឈិមទទួលបន្ទុកកិច្ចការអ៊ីនធឺណិតបានបញ្ជូនសេចក្តីថ្លែងការណ៍មួយទៅកាន់ ABC។
មន្ត្រីដែលសុំមិនបង្ហាញអត្តសញ្ញាណនោះបានបញ្ជាក់ក្នុងសេចក្តីថ្លែងការណ៍របស់ខ្លួនដូច្នេះ៖«យើងស្វាគមន៍រាល់ក្រុមហ៊ុនទាំងអស់លើពិភពលោកដែលផ្តល់ព័ត៌មានល្អៗដល់ប្រជាជនចិន។ ប៉ុន្តែសិទ្ធិអធិបតេយ្យលើបណ្តាញអ៊ីនធឺណិតនឹងត្រូវអនុវត្តល់រាល់គេហទំព័របរទេសទាំងអស់ដែលបំពានបទបញ្ញត្តិរបស់ចិនក្នុងការគ្រប់គ្រងអ៊ីនធឺណិត»។
យ៉ាងណាក៏ដោយ មន្ត្រីនេះមិនបានបញ្ជាក់ឲ្យបានច្បាស់លាស់ទេថា ABC បំពានច្បាប់អ្វី ហើយខ្លួនបានផ្សព្វផ្សាយអ្វីដែលបំពានច្បាប់នោះឡើយ ដោយគ្រាន់តែបញ្ជាក់ថា សកម្មភាពដែលត្រូវហាមឃាត់នោះអាចស្ថិតក្នុងចំណោមសកម្មភាពមួយចំនួន។ សកម្មភាពទាំងនោះមានដូចជា ការចែកចាយព័ត៌មានចចាមអារ៉ាម, ចែកចាយព័ត៌មានអាសអាភាស, ល្បែងស៊ីសង, ហិង្សាភេរវកម្ម និងព័ត៌មានផ្សេងទៀតដែលខុសច្បាប់និងធ្វើឲ្យប៉ះពាល់ដែលសន្តិសុខជាតិ និងកិត្តិយសជាតិ។
តាមពិតទៅ អាជ្ញាធរចិនសម្រេចបិទមិនឲ្យប្រជាជនខ្លួនភ្ជាប់ចូលគេហទំព័រព័ត៌មាន ABC ប្រហែលត្រឹមមួយឆ្នាំប៉ុណ្ណោះក្រោយពេលដែលស្ថាប័ននេះបានដាក់ដំណើរការផ្សព្វផ្សាយព័ត៌មានជាភាសាចិន។ ប៉ុន្តែយ៉ាងណាក៏ដោយ គេមិនដឹងថា វាពាក់ព័ន្ធបែបណានឹងការផ្សព្វផ្សាយនេះទេ។
ដោយឡែកការសម្រេចហាមប្រាមក្រុមហ៊ុនផ្សព្វផ្សាយអូស្ត្រាលីនេះ ក៏កើតឡើងចំពេលដែលទំនាក់ទំនងរវាងអូស្ត្រាលី និងចិនល្អក់កករខ្លាំងដែរដោយសារអ្នកនយោបាយអូស្ត្រាលីបន្តចោទថា ចិនព្យាយាមជ្រៀតជ្រែកចូលក្នុងកិច្ចការផ្ទៃក្នុងខ្លួន និងប្រើប្រាស់ការបរិច្ចាគលុយជាលេសដើម្បីមានលទ្ធភាពលូកលាន់ក្នុងកិច្ចការផ្ទៃក្នុងខ្លួនផង។ ការចោទប្រកាន់កន្លងមកនេះធ្វើឲ្យរដ្ឋាភិបាលចិនមិនពេញចិត្តឡើយ ហើយក្រសួងការបរទេសចិនបន្តទាត់ចោលរបាយការណ៍ព័ត៌មានអូស្ត្រាលីជាច្រើនដងរួមមានទាំងការផ្សព្វផ្សាយរបស់សារព័ត៌មាន ABC ផងដែរ។
Tag:
ចិន
អូស្ត្រាលី
ABC
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 5 ម៉ោង
