អន្តរជាតិ
ស៊ី ជិនភីង ប្រាប់អាហ្វ្រិក៖ ចិនវិនិយោគគ្មានចំណង, មិនជ្រៀតជ្រែកកិច្ចការផ្ទៃក្នុង... ប្រធានាធិបតីចិន ស៊ី ជិនភីង ថ្លែងនាកិច្ចសន្ទនាថ្នាក់ខ្ពស់ចិន-អាហ្វ្រិក (រូបភាព Xinhua)
× ចំពោះមុខមេដឹកនាំ និងអ្នកជំនួញអាហ្វ្រិក ប្រធានាធិបតីចិន ស៊ី ជិនភីង នៅថ្ងៃទី៣ ខែកញ្ញា ប្រកាសថា ការវិនិយោគរបស់ចិននៅអាហ្វ្រិក គ្មានចំណងនយោបាយអ្វីទេ។ លោក ស៊ី ប្រកាសបែបនេះ ទំនងជាចង់ឆ្លើយតបទៅនឹងពាក្យរិះគន់ទាំងឡាយជុំវិញវត្តមានដ៏សកម្មរបស់ចិននៅទ្វីបអាហ្វ្រិក ដែលបង្កការព្រួយបារម្ភថា នឹងធ្វើឲ្យប្រទេសអាហ្វ្រិកជួបបញ្ហាបំណុលដោយសារតែខ្ចីលុយចិន។ លោក ស៊ី បញ្ជាក់ថា ចិន វិនិយោគលើវិស័យដែលអាចជួយអាហ្វ្រិកឲ្យរុងរឿងបានប៉ុណ្ណោះ។
មុនបើកវេទិកាស្ដីពីសហប្រតិបត្តិការចិន-អាហ្វ្រិកលើកទី៣ ប្រធានាធិបតីចិន ស៊ី ជិនភីង និងមេដឹកនាំរដ្ឋអាហ្វ្រិកមួយចំនួន បានចូលរួមកិច្ចសន្ទនាថ្នាក់ខ្ពស់របស់ពាណិជ្ជករចិន និងអាហ្វ្រិក។ ថ្លែងក្នុងវេទិកានេះនៅថ្ងៃទី៣ ខែកញ្ញា លោក ស៊ី ជិនភីង បាននិយាយការពារការវិនិយោគ និងការផ្ដល់ប្រាក់កម្ចីទៅឲ្យប្រទេសអាហ្វ្រិក ដោយថា ចិនគ្មានគិតរឿងអ្វីផ្សេងក្រៅពីជួយអាហ្វ្រិកឲ្យរីកចម្រើន និងចែករំលែកការអភិវឌ្ឍឲ្យគ្នាទៅមកឡើយ។
វេទិកាដ៏ធំរវាងចិន និងអាហ្វ្រិកលើកនេះ ផ្ដោតសំខាន់លើគំនិតផ្ដួចផ្ដើមខ្សែក្រវាត់ និងវិថីរបស់ចិន ដែលបាននាំទឹកប្រាក់រាប់ពាន់លានដុល្លារទៅអាហ្វ្រិក។ តាមរយៈគំនិតផ្ដួចផ្ដើមនេះ ចិនអាចជ្រៀតចូលទីផ្សារធំទូលាយរបស់អាហ្វ្រិក និងធនធានដ៏ច្រើននៅទ្វីបមួយនេះ ព្រមគ្នានឹងការបង្កើនឥទ្ធិពលចិនផង។ ប៉ុន្តែក្រុមរិះគន់ ដែលភាគច្រើនមានប្រភពពីលោកខាងលិចចោទចិនថា កំពុងធ្វើឲ្យប្រទេអាហ្វ្រិកវណ្ឌកនឹងបំណុលរបស់ខ្លួនហើយ។
យោងតាមទីភ្នាក់ងារព័ត៌មាន AFP លោក ស៊ី លើកឡើងថា ការវិនិយោគរបស់ចិននៅអាហ្វ្រិក គ្មានភ្ជាប់ចំណងទៅជាមួយឡើយ ហើយចិនក៏មិនជ្រៀតជ្រែកកិច្ចការផ្ទៃក្នុងរបស់អាហ្វ្រិក និងមិនឲ្យអាហ្វ្ររិកធ្វើតាមខ្លួនដែរ។ ចំពោះមុខប្រធានាធិបតីអាហ្វ្រិកខាងត្បូង Cyril Ramaphosa, អេហ្ស៊ីប Fattah al-Sisi, សំប៊ី Edgar Lungu និងហ្កាបុង Ali Bongo លោក ស៊ី បន្តថា កិច្ចសហប្រតិបត្តិការចិនជាមួយអាហ្វ្រិក មានគោលដៅដោះស្រាយការអភិវឌ្ឍ ហើយលុយក៏មិនចំណាយលើគម្រោងធំខ្លាំងដែរ។
យ៉ាងណាមិញ ប្រធានាធិបតីចិនរូបនេះក៏ទទួលស្គាល់ពីសារសំខាន់ក្នុងការពិនិត្យលទ្ធភាពស្វែងរកប្រាក់ចំណេញរបស់គម្រោងនីមួយៗ ចៀសវាងការសាងសង់ដោយអត់ប្រយោជន៍។ ត្រង់ចំណុចនេះ លោក ស៊ី ថ្លែងកិច្ចសន្ទនាថ្នាក់ខ្ពស់ខាងលើថា ការវិនិយោគទាំងត្រូវធានាពីការប្រថុយប្រថានឲ្យបានបានទាបបំផុត និងធ្វើយ៉ាងណាឲ្យកិច្ចសហប្រតិបត្តិការប្រកបដោយចីរភាព ហើយមិនប៉ះពាល់ដល់បរិស្ថានអ្វីឡើយ។
នេះមិនមែនជាលើកដំបូងឡើយ ដែលចិនចេញមុខការពារវត្តមានរបស់ខ្លួននៅអាហ្វ្រិក ដែលបានប៉ះពាល់ប្រយោជន៍មហាអំណាចជាច្រើនផង។ បច្ចុប្បន្ន ចិនមិនមែនត្រឹមតែជាដៃគូជំនួញពិសេសរបស់រដ្ឋអាហ្វ្រិកប៉ុណ្ណោះទេ តែមហាអំណាចមួយនេះកំពុងក្លាយមិត្តដែលរដ្ឋអាហ្វ្រិកពឹងពាក់បានស្រួលជាពិសេសសុំជំនួយ ខុសពីមហាអំណាចផ្សេងដែលដាក់លក្ខខណ្ឌខ្លះមុនផ្ដល់ជំនួយ។ ឯចិនវិញក៏ទទួលបានវត្ថុធាតុដើមពីបណ្តារដ្ឋអាហ្វ្រិកទាំងនោះរួមមានទាំងប្រេង ឧស្ម័ន និងរ៉ែមានតម្លៃច្រើនផងដែរ៕
Tag:
ចិន
អាហ្វ្រិក
ស៊ី ជិនភីង
© រក្សាសិទ្ធិដោយ thmeythmey.com