អន្តរជាតិ
នូវែលសេឡង់គ្រោងហាមឃាត់ការចិញ្ចឹមសត្វឆ្មានៅភូមិមួយដើម្បីរក្សាជីវិតសត្វស្លាបដ៏កម្រ
× ក្រុមប្រឹក្សាបរិស្ថាននៅភាគខាងត្បូង ប្រទេសនូវែលសេឡង់ បានស្នើឲ្យមានការហាមឃាត់ការចិញ្ចឹមសត្វឆ្មានៅភូមិ Omaui ។ យោងតាមការផ្សាយរបស់សារព័ត៌មាន Otago Daily Times សត្វចិញ្ចឹមជាទីស្រឡាញ់នេះ កំពុងយាយីជិវិតសត្វស្លាបដ៏កម្រនៅក្នុងភូមិ។
ភូមិ Omaui ដែលស្ថិតនៅតំបន់មាត់សមុទ្រភាគខាងត្បូងនៃប្រទេសនូវែលសេឡង់ ជាទីជម្រករបស់សត្វស្លាប និងល្មូនដ៏កម្រនៅក្នុងតំបន់។ បញ្ហាដ៏ធំ ជីវិតរបស់សត្វទាំងនោះ រងការគំរាមកំហែងយ៉ាងខ្លាំង ដោយសារការលេបត្របាក់របស់សត្វឆ្មា។
ប្រសិនបើមានការអនុម័តយល់ព្រមពីរដ្ឋាភិបាល ការចិញ្ចឹមឆ្មាថ្មីនឹងលែងមានទៀតហើយនៅភូមិ Omaui ប៉ុន្តែសម្រាប់អ្នកដែលមានស្រាប់ ពួកគេត្រូវរៀបចំទុកដាក់ឆ្មារបស់ខ្លួន ជាពិសេសដាក់ក្នុងទ្រុង និងបិទមាត់វាឲ្យបានត្រឹមត្រូវ។ ក្រោយពេលឆ្មាងាប់ ម្ចាស់នោះ មិនអាចយកឆ្មាថ្មីទៅចិញ្ចឹមបន្តទៀតបាននោះឡើយ។
អាជ្ញាធរភូមិ Omaui បានបង្ហាញរូបភាពវីដេអូពីកាម៉េរាសុវត្ថិភាពដែលបង្ហាញពីសកម្មភាពឆ្មា លេបត្របាក់សត្វស្លាប សត្វល្អិត និងល្មូនមួយចំនួន។ វេជ្ជបណ្ឌិតជំនាញបស្បុសត្វម្នាក់ បានគូសបញ្ជាក់ថា ប្រសិនបើឆា្មបន្តមានវត្តមាននៅ Omaui សត្វដ៏កម្រ៦៣ប្រភេទនៅលើពិភពលោក ប្រឈមនឹងការបាត់បង់។
ទោះបីជាយ៉ាងណាក៏ដោយ អ្នកភូមិមួយចំនួនហាក់មិនសប្បាយចិត្តនោះឡើយចំពោះវិធានការនេះ ពីព្រោះពួកគេមានទម្លាប់រស់នៅជាមួយសត្វឆ្មាទៅហើយ ពួកគេចង់ឲ្យអាជ្ញាធររកចំណាត់ការផ្សេងពីនេះក្នុងការថែរក្សាប្រភេទសត្វដ៏កម្រ។
លោក John Collins ប្រធានសមាគម Omaui Landcare Charitable Trust សំដែងការគាំទ្រយ៉ាងពេញទំហឹងចំពោះការហាមប្រាមសត្វឆ្មានៅក្នុងភូមិ Omaui។ លោកថា៖ «យើងមិនមែនជាអ្នកស្អប់សត្វឆ្មានោះឡើយ ប៉ុន្តែយើងចង់ឲ្យបរិស្ថានរបស់យើងស្រស់បំព្រងជាមួយនឹងវត្តមានសត្វដ៏កម្រនានា៕
Tag:
ឆ្មា
នូវែលសេឡង់
© រក្សាសិទ្ធិដោយ thmeythmey.com