នាពិធីបើកវេទិកាស្ដីពីកិច្ចសហប្រតិបត្តិការចិន-អាហ្វ្រិក នៅថ្ងៃទី៣ ខែកញ្ញា ប្រធានាធិបតីចិន ស៊ី ជិនភីង បានប្រកាសផ្ដល់ប្រាក់ចំនួន៦០ពាន់ដុល្លារឲ្យអាហ្វ្រិកដើម្បីអភិវឌ្ឍទ្វីបនេះឲ្យរីកចម្រើន។ លើសពីនេះ លោក ស៊ី ក៏បានប្រកាសលុបចោលបំណុលដែលរដ្ឋអាហ្វ្រិកមួយចំនួនជំពាក់ចិនទៀតផង។ ទោះជាទំនាក់ទំនងចិន-អាហ្វ្រិកល្អប្រសើរក្ដី ក៏ទំនាក់ទំនងនេះរងការរិះគន់ខ្លាំង ព្រោះចិនក៏ធ្វើឲ្យអាហ្វ្រិកជាប់បំណុលច្រើនដែរ។ យ៉ាងណាមិញ អាហ្វ្រិកដែលក្រីក្រពិតជាត្រូវលុយចិនដើម្បីដោះខ្លួនពីភាពតោកយ៉ាក មុននឹងគិតបញ្ហាផ្សេង។
ប្រធានាធិបតីចិន ស៊ី ជិនភីង រួមនឹងមេដឹកនាំប្រទេសអាហ្វ្រិកជាង៥០ទៀត បានចូលរួមក្នុងវេទិកាស្ដីពីកិច្ចសហប្រតិបត្តិការចិន-អាហ្វ្រិកនៅរដ្ឋធានីប៉េកាំងនៅថ្ងៃទី៣ ខែកញ្ញា។ វេទិកាដ៏ធំនេះ ជានិមិត្តរូបរឹងមាំនៃទំនាក់ទំនងចិន និងអាហ្វ្រិកដែលកាន់តែរឹងប៉ឹងខ្លាំងទៅៗ ជាមួយនឹងការមើលឃើញប្រយោជន៍រៀងៗខ្លួន។ នេះជាវេទិកាលើកទីបី ក្រោយការរៀបចំលើកដំបូងនៅឆ្នាំ២០០៦ នៅចិន និងលើកទីពីរនៅអាហ្វ្រិកខាងត្បូងក្នុងឆ្នាំ២០១៥ ។
ចំពោះមុខថ្នាក់ដឹកនាំរដ្ឋអាហ្វ្រិក ប្រធានាធិបតីចិនបានប្រកាសផ្ដល់ហិរញ្ញប្បទានអភិវឌ្ឍចំនួន៦០ពាន់លានដុល្លារទៅឲ្យអាហ្វ្រិកដើម្បីអភិវឌ្ឍទ្វីបនេះ ហើយនឹងត្រូវផ្ដល់ក្នុងរយៈពេលបីឆ្នាំ។ កាលពីជំនួបឆ្នាំ២០១៥ ចិនបានផ្ដល់ទឹកប្រាក់៦០ពាន់លានដុល្លារឲ្យអាហ្វ្រិករួចហើយដែរ។ ទឹកប្រាក់សន្ធឹកសន្ធាប់នេះ គឺជាទឹកលុយបន្ថែមពីលើទឹកប្រាក់ដែលចិនបានវិនិយោគនៅអាហ្វ្រិករួចសស្រេចលើវិស័យហេដ្ឋារចនាសម្ព័ន្ធ ស្ពាន ផ្លូវ និងកំពង់ផែជាដើម។
បើតាមទីភ្នាក់ងារព័ត៌មាន AFP គំនិតផ្ដួចផ្ដើមរវាងចិន និងអាហ្វ្រិក នឹងផ្ដោតលើការជំរុញឧស្សាហកម្ម ការស្ថាបនាហេដ្ឋារចនាសម្ព័ន្ធ និងការផ្ដល់អាហារូបករណ៍ដល់និស្សិតវ័យក្មេងរបស់អាហ្វ្រិក។ បន្ថែមពីលើផ្ដល់ទឹកប្រាក់នេះ លោក ស៊ី ក៏បានប្រកាសលុបចោលបំណុលដែលប្រទេសអាហ្វ្រិកជំពាក់មានប្រទេសអភិវឌ្ឍតិចតួច ប្រទេសជាប់បំណុលខ្លាំង និងប្រទេសក្រីក្រ ហើយដែលត្រូវសងលុយនៅឆ្នាំចុង ២០១៨ នេះ។
១. ចិនអនុវត្តគោលការណ៍ «៥មិន» ក្នុងទំនាក់ទំនងជាមួយអាហ្វ្រិក
វត្តមានរបស់ចិននៅអាហ្វ្រិកជាមួយការបញ្ចូលទឹកប្រាក់រាប់ពាន់លានដុល្លារ ធ្វើឲ្យចិនរងការរិះគន់ខ្លាំង ខណៈឥទ្ធិពលរបស់មហាអំណាចមួយនេះក៏កើតឡើងខ្លាំងនៅទឹកដីដែលធ្លាប់រងគ្រោះដោយសារមហាអំណាចអឺរ៉ុប។ យ៉ាងណាមិញ ប្រធានាធិបតីចិនរូបនេះបានអះអាងហើយថា ក្រុងប៉េកាំងគ្មានសម្លឹងឃើញអ្វីផ្សេងឡើយក្នុងទំនាក់ទំនងជាមួយអាហ្វ្រិកនោះ ហើយចិន-អាហ្វ្រិកបានចាប់ផ្ដើមដំណើរទៅមុខតាមកិច្ចសហប្រតិបត្តិការឈ្នះ-ឈ្នះ។
សម្រាប់ទំនាក់ទំនងជាមួយអាហ្វ្រិក លោក ស៊ី ក៏ប្រកាសថា ចិនអនុវត្តតាមគោលការណ៍ «៥មិន»។ ៥មិនមានដូចជា មិនលូកលាន់អាហ្វ្រិកក្នុងការដើរលើផ្លូវអភិវឌ្ឍដែលសមស្របតាមលក្ខខណ្ឌប្រទេសនីមួយៗ មិនជ្រៀតជ្រែកកិច្ចការផ្ទៃក្នុងអាហ្វ្រិក មិនឲ្យអាហ្វ្រិកធ្វើតាមឆន្ទៈរបស់ចិន មិនភ្ជាប់ចំណងនយោបាយទៅនឹងជំនួយឲ្យប្រទេសអាហ្វ្រិក និងមិនចង់កេងចំណេញនយោបាយក្នុងការវិនិយោគ និងកិច្ចសហប្រតិបត្តិការហិរញ្ញវត្ថុជាមួយអាហ្វ្រិក។
ជាមួយនឹងគោលការណ៍នេះ មេដឹកនាំចិនរូបនេះអះអាងថា គ្មាននរណាអាចបង្កបញ្ហាដាក់ការរួបរួមរវាងប្រជាជនចិន និងប្រជាជនអាហ្វ្រិកឡើយ ហើយក៏គ្មានអ្នកណាអាចទាញចិន ឬអាហ្វ្រិកឲ្យថយក្រោយបានដែរ ព្រោះភាគីទាំងពីរបានដើរឆ្ពោះទៅមុខហើយ។ ក្នុងកិច្ចសហប្រតិបត្តិការនេះដែរ លោក ស៊ី ដែលបានទស្សនកិច្ចបួនដងហើយនោះ បន្តថា ចិនចាប់យកចំណុចដែលជាប្រយោជន៍រួម ហើយចិនត្រៀមខ្លួនធ្វើការជាមួយអង្គការអន្តរជាតិផ្សេងទៀតដើម្បីជួយអាហ្វ្រិក។