ការសម្រេចកាត់ទោសអ្នកសារព័ត៌មានទីភ្នាក់ងារ Reuters ពីរនាក់នៅដើមសប្តាហ៍នេះក្លាយជារឿងក្តៅក្រហាយសម្រាប់សហគមន៍អន្តរជាតិ។ មេដឹកនាំរដ្ឋាភិបាលស៊ីវិល អ៊ុងសាន ស៊ូជី ដែលមិនបានហ៊ានមតិយោបល់ឬ បង្ហាញក្តីបារម្ភជុំវិញសំណុំរឿងដ៏ចម្រូចម្រាសនេះរងការរិះគន់ជាថ្មីទៀត។
ស្ថាប័នសិទ្ធិមនុស្សអន្តរជាតិនាំគ្នាថ្កោលទោសការកាត់ក្តីរបស់តុលាការមីយ៉ាន់ម៉ាឲ្យអ្នកសារព័ត៌មាន Reuters ឲ្យជាប់ពន្ធនាគារ ៧ឆ្នាំនៅថ្ងៃចន្ទទី ៣ ខែកញ្ញាសប្តាហ៍នេះ។ បើ យោងតាមការចុះផ្សាយរបស់ទីភ្នាក់ងារព័ត៌មាន AFP ក្រៅពីក្រុមសិទ្ធិមនុស្សប្រទេសមហាអំណាចដូចជាអាមេរិកនិង អង់គ្លេសជាដើមនោះ ក៏បង្ហាញកង្វល់ដូចគ្នាជុំវិញការសម្រេចនេះ។
អ្នកកាសែតទាំងពីរនាក់នោះមានម្នាក់ឈ្មោះ Wa Lone វ័យ ៣២ ឆ្នាំ និងម្នាក់ទៀតមានឈ្មោះ Kyaw Soe Oo មានវ័យ ២៨ឆ្នាំ។ ពួកគេត្រូវតុលាការកាត់ទោសឲ្យជាប់ពន្ធនាគារពីបទបំពានច្បាប់រក្សាការសម្ងាត់រដ្ឋ។ ពួកគេត្រូវបានចាប់ខ្លួននៅពេលដែលគេយកព័ត៌មានជុំវិញការសម្លាប់រង្គាលប្រជាជនម៉ូស្លីមរ៉ូហ៊ីងយ៉ាដោយក្រុមយោធាចាប់ពីវិបត្តិជនភៀសខ្លួនកើតឡើងនៅខែសីហាឆ្នាំមុន។
គួរទាញការចាប់កាលពីសប្តាហ៍ទីភ្នាក់ងារអង្គការសហប្រជាជាតិបានចេញផ្សាយរបាយការណ៍មួយទៀតដែលបានបង្ហាញថា អំពើប្រល័យពូជសាសន៍កើតមានឡើងនៅមីយ៉ាន់ម៉ាប្រឆាំងនឹងជនជាតិភាគតិចរ៉ូហ៊ីងយ៉ា និងអំពាវនាវឲ្យមានការកាត់ទោសក្រុមមេដឹកនាំយោធាមីយ៉ាន់ម៉ានៅតុលាការអន្តរជាតិផង។
ត្រឡប់មកវិញ គ្រប់គ្នារង់ចាំមើលថាតើ លោកស្រី អ៊ុងសាន ស៊ូជី ដែលជានិមិត្តរូបនៃប្រជាធិបតេយ្យ និងសិទ្ធិមនុស្ស និងបានបន្តធ្វើមេដឹកនាំរដ្ឋាភិបាលស៊ីវិលចាប់ពីការបោះឆ្នោតប្រជាធិបតេយ្យលើកដំបូងឆ្នាំ ២០១៥នោះ អាចមានប្រតិកម្មបែបណាចំពោះការកាត់ទោសអ្នកសារព័ត៌មាន។
ប៉ុន្តែគួរឲ្យសោកស្តាយ ក្រៅពីមិននិយាយស្តីរឿងជនជាតិរ៉ូហ៊ីងយ៉ា លោកស្រី ស៊ូជី នៅតែស្ងៀមស្ងាត់ជាថ្មីលើការចាប់អ្នកកាសែតដាក់គុកនេះទៀត។ វារឹតតែធ្វើឲ្យកិត្តិនាមមេដឹកនាំស៊ីវិលដ៏មានប្រជាប្រិយភាពនេះធ្លាក់ចុះកាន់តែខ្លាំងថែមទៀតដែរ។
យ៉ាងណាក៏ដោយ មន្ត្រីមីយ៉ាន់ម៉ាបានព្យាយាមការពារគោលជំហរស្ងៀមស្ងាត់របស់មេដឹកនាំស៊ីវិលរូបនេះ។ លោក Aung Hla Tun ដែលធ្លាប់បម្រើការងារជាអ្នករាយការណ៍ព័ត៌មានរបស់ទីភ្នាក់ងារ Reuters ហើយបច្ចុប្បន្នបម្រើការងារជាអនុរដ្ឋមន្ត្រីព័ត៌មាននោះបកស្រាយថា វាជារឿងសមរម្យព្រោះវាជាអំណាចរបស់តុលាការ។
លោកបានប្រាប់ទីភ្នាក់ងារព័ត៌មាន AFP ដូច្នេះ៖«ការទិតៀនប្រព័ន្ធយុត្តាធិការស្មើនឹងការមិនគោរពតុលាការ។ ខ្ញុំមិនគិតថា លោកស្រី ស៊ូជី នឹងរិះគន់ការសម្រេចចិត្តនេះឡើយ»។
ក្រោយការសម្រេចរបស់តុលាការ មេធាវីជនទាំងពីរនឹងដាក់បណ្តឹងតវ៉ាទៅសាលាឧទ្ធរណ៍ទៀត ប៉ុន្តេគេយល់ថា វានឹងត្រូវចំណាយពេលវេលារាប់ខែឬដល់ឆ្នាំផងក៏មាន។
មានការរំពឹងខ្លះដែរថា ប្រធានាធិបតីមីយ៉ាន់ម៉ាដែលជាសម្ព័ន្ធមិត្តរបស់លោកស្រី ស៊ូជី មានអំណាចលើកលែងទោសដល់អ្នកសារព័ត៌មានទាំងពីរ ប៉ុន្តែអ្នកជំនាញយល់ថា ការអន្តរាគមន៍ពីស្ថាប័ននីតិបញ្ញត្តិនេះមិនអាចកើតមានឡើងឆាប់ៗនោះឡើយ៕