កីឡាអន្តរជាតិ
អន្តរជាតិ
គ្រូអាល្លឺម៉ង់៖ Ozil គ្មានឱកាសចូលជម្រើសជាតិវិញទេ Ozil និង Loew នាការប្រកួត World Cup នៅរុស្ស៊ីកន្លងមក
× គ្រូបង្វឹកក្រុមកីឡាបាល់ទាត់ជម្រើសជាតិអាល្លឺម៉ង់លោក Joachim Loew បានបញ្ជាក់ថា Mesut Ozil មិនមានឱកាសវិលត្រឡប់ទៅរួមក្រុមវិញទេក្រោយពីការប្រកាសចូលនិវត្តន៍របស់គេពីជម្រើសជាតិកាលពីខែកក្កដាកន្លងទៅ។ នេះបើតាមការផ្សាយរបស់ទីភ្នាក់ងារព័ត៌មាន AFP។
«ខ្ញុំគិតថាអ្វីៗគ្រប់យ៉ាងបានធ្វើរួចហើយអំពីរឿងនេះ។ នៅពេលដែលកីឡាករប្រកាសលាលែងពីតំណែងដូច្នេះ អ្នកមិនជ្រើសគាត់ចូលក្រុមវិញទេនៅរយៈពេល ៨ ឬ៩ សប្តាហ៍ក្រោយ»។ លោក Loew និយាយដូច្នេះនៅក្នុងសន្និសីទសារព័ត៌មាននៅថ្ងៃទី៥ ខែកញ្ញានៅមុនការប្រកួតពានរង្វាន់ UEFA Nations League រវាងអាល្លឺម៉ង់ និងម្ចាស់ពាន World Cup បារាំងនៅរាត្រីថ្ងៃ៦ ខែកញ្ញា វេលាម៉ោង១:៤៥នាទី [ម៉ោងនៅកម្ពុជា]។
គ្រូសញ្ជាតិអាល្លឺម៉ង់ វ័យ៥៨ឆ្នាំរូបនេះបន្ថែមថា កីឡាកររូបណាដែលបានលាលែងពីក្រុមនឹងមិនមានតួនាទីក្នុងការបង្ហាញខ្លួនឲ្យក្រុមនាពេលអនាគតនោះទេ។
Ozil ខ្សែបម្រើក្រុមកាំភ្លើងធំ Arsenal
បានប្រកាសចូលនិវត្តន៍ពីក្រុមជម្រើសជាតិ ក្រោយ ទទួលការស្តីបន្ទោសពីទម្រង់លេងរបស់គេដោយមិនអាចជួយក្រុមឥន្ទ្រីដែកឆ្លងផុតវគ្គចែកពូលក្នុងការប្រកួត World Cup នៅរុស្ស៊ី និងទទួលការប្រកាន់ពូជសាសន៍ និងរិះគន់ខ្លាំងៗពី សំណាក់លោក Reinhard Grindel ប្រធានសហព័ន្ធកីឡាបាល់ទាត់អាល្លឺម៉ង់ (DFB)។
ទន្ទឹមនឹងនេះដែរ Loew បានសោកស្តាយដែលមិនអាចហាមឃាត់ខ្សែបម្រើវ័យ២៩ឆ្នាំនេះ អំពីការសម្រេចចិត្តឈប់លេងឲ្យក្រុមជម្រើសជាតិរបស់គេ។
«Mesut និងខ្ញុំទទួលបាជោគជ័យជាមួយគ្នាជាច្រើន ហើយខ្ញុំបានព្យាយាមច្រើនដងដើម្បីជួបគាត់តាមទូរសព្ទប៉ុន្តែគ្មានឱកាសសោះ។ តែយ៉ាងណាខ្ញុំនឹងបន្តព្យាយាមទៀត និងទាក់ទងជាមួយគាត់ក្នុងពេលអនាគត»។ Loew លើកឡើងដូច្នេះ៕
Tag:
បាល់ទាត់
Joachim Loew
Mesut Ozil
© រក្សាសិទ្ធិដោយ thmeythmey.com