កីឡាអន្តរជាតិ
អន្តរជាតិ
គ្រូលីគនៅអឺរ៉ុប ចង់ប្តូរច្បាប់ Away-Goals និងបិទទ្វារដោះដូរកីឡាករស្របគ្នា កិច្ចប្រជុំក្រុមគ្រូបង្វឹកប្រចាំឆ្នាំនៅក្នុងក្រុង Nyon ប្រទេសស្វីស
× អ្នកចាត់ការទូទៅក្លិបកីឡាបាល់ទាត់កំពូលៗនៅអ៊ឺរ៉ុបបានស្នើសុំឲ្យសហព័ន្ធកីឡាបាល់ទាត់ទ្វីបអឺរ៉ុប (UEFA) ពិនិត្យមើលឡើងវិញលើការប្រើប្រាស់ច្បាប់គ្រាប់បាល់ចំណេញក្រៅដី (Away-Goals) សម្រាប់ការប្រកួតពានរង្វាន់ធំៗប្រចាំតំបន់អឺរ៉ុប ដោយពួកគេលើកហេតុផលថាការរកគ្រាប់បាល់បញ្ចូលទីក្រៅដីមិនពិបានដូចកាលជំនាន់មុនឡើយ។ គ្រូបង្វឹកទាំងនោះក៏ស្នើរឲ្យទីផ្សារដូរដោះកីឡាករទាំងអស់នៅអឺរ៉ុបបិទទ្វារស្របពេលជាមួយគ្នាផងដែរ។
អគ្គលេខាធិការរង UEFA លោក Giorgio Marchetti បាននិយាយនៅក្រោយកិច្ចប្រជុំក្រុមគ្រូបង្វឹកប្រចាំឆ្នាំនៅក្នុងក្រុង Nyon ប្រទេសស្វីសថា គ្រូបង្វឹកទាំងនោះគិតថាការរកគ្រាប់បាល់សម្រាប់ក្រុមភ្ញៀវមិនពិបាកដូចកាលពីមុនទេ ដូច្នេះច្បាប់ Away-Goals គឺមិនសូវមានប្រសិទ្ធភាពឡើយ។ ជុំវិញករណីនេះលោក Marchetti ថាស្ថាប័នលោកនឹងយកច្បាប់នេះទៅពិនិត្យឡើងវិញ។
ការជួបជុំក្រុមគ្រូបង្វឹប្រចាំឆ្នាំ ២០១៨ មានការចូលរួមពីសំណាក់លោក Jose Mourinho អ្នកចាត់ការទូទៅ Manchester United លោក Unai Emery និង Arsene Wenger អតីត និងអ្នកចាត់ការថ្មី Arsenal លោក Massimiliano Allegri អ្នកចាត់ការ Juventus អ្នកចាត់ការថ្មី Real Madrid លោក Julen Lopetegui លោក Thomas Tuchel នៃក្រុម Paris St-Germain ជាដើម។
លក្ខខណ្ឌគ្រាប់បាល់ចំណេញក្រៅដី (Away-Goals) ត្រូវបានដាក់ឲ្យប្រើប្រាស់លើកដំបូងនៅពានរង្វាន់ European Cup បច្ចុប្បន្ន (Champions League) តាំងពីឆ្នាំ១៩៦៥ ដោយកាលនោះច្បាប់នេះពិតជាមានប្រសិទ្ធភាព ដ្បិតការធ្វើដំណើរទៅលេងក្រៅដីដោយឆ្លងប្រទេសសម្រាប់ក្រុមនីមួយៗមិនងាយស្រួលដូចសព្វថ្ងៃឡើយ។ ក្បួនដែលប្រើក្នុងព្រឹត្តិការណ៍ពានរង្វាន់អឺរ៉ុបនេះ មានន័យថាក្រុមណាដែលរកគ្រាប់បាល់បានច្រើនជាងគឺជាអ្នកឈ្នះ។
គ្រូបង្វឹកទាំងនោះក៏បានលើកឡើង ថាក្បួននេះក៏មានផលប៉ះពាល់ផងដែរដោយលើកទឹកចិត្តឲ្យក្រុមម្ចាស់ផ្ទះ ឬក្រុមដែលមានប្រៀបនៅជើងទី១លេងក្នុងប្រព័ន្ធការពារមិនមានគ្រាប់បាល់ ខណៈក្រុមមួយទៀតលេងសម្រុក ដែលធ្វើឲ្យការប្រកួតមិនសូវល្អមើល។
ដោយឡែក ជុំវិញទីផ្សារដោះដូរកីឡាករវិញពួកគេបានស្នើឲ្យលីគនៅតំបន់អឺរ៉ុបមួយចំនួនយកគំរូតាមលីគអង់គ្លេស និងអ៊ីលីដោយបិទទ្វារទីផ្សារនៅមុនពេលចាប់ផ្តើមរដូវកាល។ លីគនៅអេស្ប៉ាញ អាល្លឺម៉ង់ និងបារាំងបានបន្តការទិញដូររហូតដល់ចុងខែសីហា។
ការបិទទ្វារទីផ្សារស្របគ្នាក្នុងពេលតែមួយគឺដើម្បីឲ្យកីឡាករចូលរួមជាក្រុមឲ្យបានពេញលេញ ដោយមិនមានគំនិតបែកខ្ញែកចង់ផ្លាស់ទៅកាន់ក្លិបថ្មីអំឡុងពេលចាប់ផ្តើមរដូវកាលដែលនាំឲ្យប៉ះពាល់ទម្រង់លេងរបស់ក្រុម៕
Tag:
បាល់ទាត់
Away-Goals
UEFA
© រក្សាសិទ្ធិដោយ thmeythmey.com