ជប៉ុនលុបជំនួបមិត្តភាពទល់នឹងស៊ីលីដោយសារគ្រោះរញ្ជួយដី ៦.៧ រ៉ិចទ័រ

កីឡាអន្តរជាតិ

អន្តរជាតិ

ជប៉ុនលុបជំនួបមិត្តភាពទល់នឹងស៊ីលីដោយសារគ្រោះរញ្ជួយដី ៦.៧ រ៉ិចទ័រ

07, Sep 2018 , 2:51 pm

រូបភាព

ដោយ: ទេព ពិទូរ្យ

ជំនួបមិត្តភាពអន្តរជាតិរវាងក្រុមជម្រើសជាតិជប៉ុននិងស៊ីលីដែលនឹងធ្វើឡើងនៅថ្ងៃសុក្រនេះត្រូវបានលុបចោលវិញបន្ទាប់ពីមានគ្រោះរញ្ជួយដីធ្ងន់ធ្ងរបានវាយប្រហារលើកោះហុកកៃដូ ប្រទេសជប៉ុននៅថ្ងៃទី៦ ខែកញ្ញានេះ។ នេះបើតាមការប្រកាសរបស់សមាគមកីឡាបាល់ទាត់ជប៉ុន (JFA)។

ទីភ្នាក់ងារព័ត៌មាន Reuters ផ្សាយថា JFA បានសម្រេចលុបចោលការប្រកួតនេះដ្បិតប្រទេសខ្លួនបានទទួលរងការខូតខាតទ្រង់ទ្រាយធំដែលរួមបញ្ចូលទាំងបញ្ហាដាច់ចរន្តអគ្គិសនី និងសំណង់អាគារបាក់រលំជាច្រើនខ្នង ព្រមទាំងដើម្បីរក្សាសុវត្ថិភាពដល់ក្រុមអ្នកគាំទ្រនៅកីឡដ្ឋានដែលខូចខាត។

ការរញ្ជួយដីកម្រិត ៦.៧ រ៉ិចទ័រនៅលើកោះហុកកៃដូនេះ បានបណ្តាលឲ្យមានអ្នកស្លាប់យ៉ាងហោចណាស់៩នាក់ បាត់ខ្លួន៣៣នាក់ និងរងរបួសស្រាល១២០នាក់។ គ្រោះធម្មជាតិដែលតែងកើតឡើងនៅប្រទេសកោះមួយនេះក៏បានបណ្តាលឲ្យប្រជាជនជប៉ុនជាង៥លាននាក់គ្មានអគ្គិសនីប្រើប្រាស់ផងដែរ។

មុនរញ្ជួយដីនេះ ជប៉ុនទើបទទួលរងគ្រោះដោយព្យុះទីហ្វុងឈ្មោះ Jebi នៅក្បែក្រុងអូសាកា កាលពីថ្ងៃទី៤ ខែកញ្ញា ឆ្នាំ២០១៨ ដែលបណ្ដាលឲ្យមនុស្ស ៦នាក់ស្លាប់ និងជាង១៦០នាក់រងរបួស។

ក្រុមសាមូរ៉ៃជប៉ុន ដែលដឹកនាំដោយគ្រូបង្វឹកថ្មីលោក Hajime Moriyasu ជាលើកដំបូង នឹងមានជំនួបមិត្តភាពមួយលើកទៀតទល់នឹងជម្រើសជាតិកូស្តារីកានៅថ្ងៃទី១១ ខែកញ្ញានៅទីក្រុងអូសាកា៕