កូរ៉េខាងត្បូង សម្ញែងនាវាមុជទឹកប្រភេទថ្មី ខណៈជំនួបជាមួយមួយកូរ៉េខាងជើងខិតជិតមកដល់

អន្តរជាតិ

កូរ៉េខាងត្បូង សម្ញែងនាវាមុជទឹកប្រភេទថ្មី ខណៈជំនួបជាមួយមួយកូរ៉េខាងជើងខិតជិតមកដល់

16, Sep 2018 , 8:29 pm

រូបភាព

ដោយ:

ទីក្រុងសេអ៊ូល បានបើកដំណើរការនាវាមុជទឹកបំពាក់មីស៊ីលជាលើកដំបូងបង្អស់ នាថ្ងៃទី១៤ កញ្ញា បើទោះបីជាទំនាក់ទំនងរវាងកូរ៉េទាំងពីរត្រឡប់ទៅរកភាពល្អប្រសើរក្តី។ ជាក់ស្តែងប្រធានាធិបតីកូរ៉េខាងត្បូងលោក ម៉ូន ចេអ៊ីន នឹងទៅជួបមេដឹកនាំកូរ៉េខាងជើងសប្ដាហ៍ក្រោយនាក្រុងព្យុងយ៉ាង។

នាវាមុជទឹកឈ្មោះ Dosan Ahn Chang-ho ដែលកូរ៉េខាងត្បូងដាក់ដំណើរការនេះ មានតម្លៃ ៧០០លានដុល្លារនេះ និងអាចមានសមត្ថភាពបាញ់ប្រហារលើនាវាចម្បាំង និងស្កាត់មីស៊ីលបាលីស្ទិកបានយ៉ាងងាយ។ មានទម្ងន់ ៣ពាន់តោន វាជានាវាមុជទឹកដែលត្រូវដំណើរការមុនគេបង្អស់ ក្នុងគម្រោងនាវាចំនួន ៣គ្រឿងដែលអាចប្រើប្រាស់បានទាំងថាមពលអគ្គិសនី និងប្រេងឥន្ធនៈបាន។ ចំណែកឯនាវាដែលនៅសេសសល់ចំនួន២ទៀត នឹងរួចរាក់ក្នុងពេល ៥ឆ្នាំខាងមុខ។

នាវាមុជទឹកថ្មីនេះ មានកាណុងកាំភ្លើងបញ្ឈរចំនួន ៦ដើម និងបំពាក់ជាមួយប្រព័ន្ធគ្រប់គ្រងការវាយប្រយុទ្ធ និងប្រព័ន្ធ «Sonar» ដែលប្រើប្រាស់សំឡេងក្នុងទឹក ដើម្បីស្វែងរកផ្លូវ និងប្រាស្រ័យទាក់ទងជាដើម។

យោងតាមការចុះផ្សាយរបស់ទីភ្នាក់ងារ AFP ការដាក់ដំណើរការនាវាមុជទឹកផ្ទុកក្បាលគ្រាប់មីស៊ីលនេះ គឺតំណាងឲ្យការឈានទៅមុខមួយជំហាន ក្នុងវិស័យឧស្សាហកម្មយោធារបស់កូរ៉េខាងត្បូង។ នេះការបញ្ជាក់របស់ប្រធានាធិបតីកូរ៉េខាងត្បូង លោក ម៉ូន ចេអ៊ីន ក្នុងពិធីបើកដំណើរការនាវាមុជទឹកនេះ ក្នុងកំពង់ផែ Daewoo ជាទីដែលវាត្រូវបានសាងសង់ឡើង។

ប្រធានាធិបតីវ័យ ៦៥ឆ្នាំរូបនេះ បាននិយាយទៀតថា៖ «យើងបានចាប់ផ្តើមដំណើរផ្សងព្រេងដ៏អស្ចារ្យមួយ ដើម្បីឆ្ពោះទៅកាន់ការរំសាយអាវុធនុយក្លេអ៊ែរបានទាំងស្រុង ក្នុងឧបទ្វីបកូរ៉េ។ ប៉ុន្តែសន្តិភាព មិនត្រូវបានផ្ដល់ឲ្យ ដោយគ្មានលក្ខខណ្ឌនោះទេ។ សន្តិភាពដោយប្រើប្រាស់អំណាច ជាយុទ្ធសាស្ត្រសន្តិសុខដ៏រឹងមាំមួយរបស់រដ្ឋាភិបាលក្រុងសេអ៉ូល»។

ក្រៅពីនាវាមុជទឹកប្រភេទថ្មីនេះ កូរ៉េខាងត្បូង ក៏បានដាក់ដំណើរការនាវាមុជទឹកតូចៗចំនួន ១៨គ្រឿងដែលមានស្រាប់របស់ខ្លួនក្នុងពិធីនេះផងដែរ។ នាវាមុជទឹកតូចៗទាំងនេះ ត្រូវបានបង្កើតឡើង ដោយរួមសហការគ្នាជាមួយអាល្លឺម៉ង់។

គួរបញ្ជាក់ដែរថា លោក ម៉ូន ចេអ៊ីន នឹងធ្វើដំណើរទៅកាន់ទីក្រុងព្យុងយ៉ាង កូរ៉េខាងជើង នាសប្ដាហ៍ក្រោយនេះ សម្រាប់កិច្ចប្រជុំកំពូលលើកទី៣ ជាមួយមេដឹកនាំកូរ៉េខាងជើង លោក គីម ជុងអ៊ុន។ ជំនួបថ្មីនេះធ្វើឡើង ស្របពេលដែលសហរដ្ឋអាមេរិក បានប្រឹងប្រែងជាខ្លាំងដើម្បីបញ្ចុះបញ្ចូលក្រុងព្យុងយ៉ាងឲ្យបោះបង់កម្មវិធីអាវុធនុយក្លេអ៊ែររបស់ខ្លួន៕