អន្តរជាតិ
លោកស្រី ស៊ូជី ជឿជាក់បក្សកាន់អំណាចរបស់ខ្លួន នឹងឈ្នះការបោះឆ្នោតជាថ្មីនៅឆ្នាំ២០២០ ទីប្រឹក្សារដ្ឋមីយ៉ា់ន់ម៉ា អ៊ុងសាន ស៊ូជី នាជំនួបវេទិកាសេដ្ឋកិច្ចពិភពលោកស្ដីពីអាស៊ាននៅវៀតណាម (រូបភាព AFP)
× បើទោះបីជារយៈកាលនៃការបោះឆ្នោតជាតិអាណត្តិបន្ទាប់របស់មីយ៉ាន់ម៉ា ស្ថិតនៅរយៈពេលឆ្ងាយក៏ដោយក្តី ទីប្រឹក្សារដ្ឋ និងជាប្រមុខបក្សកាន់អំណាចមីយ៉ាន់ម៉ា លោកស្រី អ៊ុងសាន ស៊ូជី មានជំនឿមុខមាំថាបក្សលោកស្រី នឹងឈ្នះជាថ្មីម្តងទៀត។ លោកស្រី ស៊ូជី អាចហ៊ានអះអាងបែបនេះ ដោយសម្អាងលើសមិទ្ធផលគួរកត់សម្គាល់ នៃការដឹកនាំរដ្ឋាភិបាលរយៈពេលជាងពីរឆ្នាំមកនេះ។
នាឱកាស នៃការជជែកដេញដោលរបស់វេទិកាសេដ្ឋកិច្ចពិភពលោកនៅវៀតណាមនៅថ្ងៃ១៣ កញ្ញា កន្លងទៅ ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី បានទទួលស្គាល់ថា ការអភិវឌ្ឍប្រទេសក្នុងអាណត្តិដឹកនាំរដ្ឋាភិបាលនៃបក្សកាន់អំណាចបច្ចុប្បន្ន នៅមានកម្រិត ក៏ប៉ុន្តែមានភាពល្អប្រសើរជាងមុន ហើយលោកស្រី ក៏មានការពេញចិត្តផងដែរ។
តាមរយៈកិច្ចសន្ទនាតទល់ជាមួយនឹងវាគ្មិនរយៈប្រមាណកន្លះម៉ោង ទីប្រឹក្សារូបនេះ បានបង្ហាញពីកិច្ចប្រឹងប្រែងរបស់រដ្ឋាភិបាលស៊ីវិលដំបូង ក្រោយជ័យជម្នះនៃការបោះឆ្នោតឆ្នាំ២០១៥ ក្នុងការស្តារ និងធានាទាំងសន្តិភាព និងការអភិវឌ្ឍ ជាពិសេសនោះ លទ្ធិប្រជាធិបតេយ្យតែម្តង។ លោកស្រី ក៏មិនញញើតក្នុងការនិយាយពីការប្តេជ្ញាចិត្តមិនរាថយក្នុងការធ្វើវិសោធនកម្មរដ្ឋធម្មនុញ្ញផងដែរ។
នៅចំពោះមុខអ្នកចូលរួមជាច្រើន លោកស្រីទីប្រឹក្សារដ្ឋ ហាក់រងសម្ពាធបន្តិច នៅពេលលោកស្រី ត្រូវបានសួរពាក់ព័ន្ធនឹងដំណោះស្រាយលើវិបត្តិបញ្ហាជនភៀសខ្លួន ពីរដ្ឋរ៉ាខាន និងការកាត់ទោសពន្ធនាគារលើអ្នកសារព័ត៌មាន Reuters ក៏ដូចជាការប្រឈមរបស់មីយ៉ាន់ម៉ាចំពោះសហគមន៍អន្តរជាតិ។ តែយ៉ាងណា ដូចសព្វមួយដង លោកស្រី អះអាងថា រដ្ឋាភិបាលមីយ៉ាន់ម៉ា តែងតែយកចិត្តទុកដាក់ដោះស្រាយបញ្ហាស្របតាមនីតិរដ្ឋ ហើយស្ថានភាពបញ្ហាក៏មានភាពល្អប្រសើរជាងមុនហើយដែរ។
«...ការបោះឆ្នោតអាណត្តិបន្ទាប់នៅឆ្នាំ២០២០ កំពុងតែឆ្ពោះមកដល់ ខ្ញុំ ជឿជាក់ថា លោកស្រី ក៏ដូចជាបក្សលោកស្រី នឹងចូលរួមប្រកួតប្រជែងជាថ្មីម្តងទៀត។ តើលោកស្រី គិតថា បក្សលោកស្រី នឹងឈ្នះការបោះឆ្នោតម្តងទៀតទេ...?» នេះគឺជាសំណួរចុងក្រោយរបស់វាគ្មិនទៅកាន់លោកស្រី អ៊ុងសាន ស៊ូជី មុនពេលបញ្ចប់នៃការជជែកដេញដោល។
តបនឹងសំណួរនេះ លោកស្រី ស៊ូជី បានសង្កត់ធ្ងន់ថា៖« យើងចង់ឈ្នះ ។ នោះក៏ព្រោះតែយើង ក៏សក្តិសមនឹងឈ្នះ ហើយក៏មិនមែនដោយសារតែយើងចង់ឡើយ។ នេះ មានន័យថា បើយើងឈ្នះការបោះឆ្នោតឆ្នាំ២០២០ ក៏ព្រោះតែ កន្លងមក យើងបានបំពេញការងារគ្រប់គ្រាន់សម្រាប់ប្រជាជនក្នុងការបន្តគាំទ្រយើងសម្រាប់ការដឹកនាំប្រទេសបន្ត»។
លោកស្រី លើកឡើងថា អ្នកខ្លះ អាចនឹងនិយាយថា វា ជារឿងមិនល្អនោះទេ ដែលបក្សនយោបាយចង់ឈ្នះការបោះឆ្នោតម្តងហើយម្តងទៀត ។ ក៏ប៉ុន្តែលោកស្រី អះអាងថា ក្នុងដំណើរការប្រជាធិបតេយ្យ វា គឺជារឿងសំខាន់ណាស់ ដែលមានវត្តមានបក្សលោកស្រី ក្នុងការទទួលខុសត្រូវ និងមើលថែប្រទេស ប្រសិនបើចង់ រក្សាសន្តិភាព ស្ថិរភាព និងការអភិវឌ្ឍ៕
Tag:
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com