ថៃ៖ អ្នកនយោបាយវ័យក្មេង បន្តងើបតទល់នឹងរបបសឹកលោក ប្រាយុទ្ធ និងសន្យានាំប្រជាធិបតេយ្យមកវិញ

អន្តរជាតិ

ថៃ៖ អ្នកនយោបាយវ័យក្មេង បន្តងើបតទល់នឹងរបបសឹកលោក ប្រាយុទ្ធ និងសន្យានាំប្រជាធិបតេយ្យមកវិញ

17, Sep 2018 , 11:16 am

រូបភាព

រូបភាព៖ Foreign Correspondent Club

ដោយ:

សហស្ថានិកគណបក្សអនាគតឆ្ពោះទៅមុខ( Future Forward ) ដែលជាបក្សនយោបាយថ្មីរបស់ថៃ លោក Thanathorn Juangroongruangkit បានអំពាវនាវឲ្យពលរដ្ឋចូលរួមជាកម្លាំងជាមួយនឹងបក្សខ្លួនដើម្បីផ្លាស់ប្តូរ និងនាំលទ្ធិប្រជាធិបតេយ្យថៃមកវិញ។ សហស្ថានិកបក្សថ្មីរូបនេះ ចង់ឲ្យប្រជាពលរដ្ឋថៃ ជួយបក្សរបស់លោកដើម្បីបំពេញបេសកកម្មមួយនេះ។

អ្នកនយោបាយវ័យក្មេងថៃ នៃគណបក្សអនាគតឆ្ពោះមុខ លោក Thanathorn នៅថ្ងៃ១៥ កញ្ញា បានប្រើប្រាស់សារថ្មីទៅកាន់ប្រជាពលរដ្ឋថៃ លោក ទទូចឲ្យពលរដ្ឋថៃ ជួលគណបក្សលោក ដោយគ្រាន់ចំណាយថវិកា ១០០បាត ដើម្បីចូលជាសមាជិក ហើយវាផ្តល់លទ្ធភាពឲ្យបក្សលោកតស៊ូទាមទារ និងនាំលទិ្ធប្រជាធិបតេយ្យថៃត្រឡប់មកវិញ។ នេះបើយោងតាមការចុះផ្សាយរបស់សារព័ត៌មានថៃ The Nation។

អត្ថបទទាក់ទង

អ្នកនយោបាយថៃ បារម្ភពីការកើនឡើងនៃវត្តមានចិនដែលមិនអាចឲ្យថៃត្រឡប់ទៅរកប្រជាធិបតេយ្យវិញបាន

ខណៈដែលរបបសឹក នៅតែបន្តរឹតត្បិតសកម្មភាពពាក់ព័ន្ធនយោបាយ ក្រោមលេសធានាសណ្តាប់ធ្នាប់ជាតិ លោក Thanathorn ហាក់ដូចជាមិនសូវញញើតសោះឡើយក្នុងការនិយាយពីការពិត និងផែនការក្នុងការបញ្ជ្រាបផ្នត់គំនិតសម្រាប់ការផ្លាស់ប្តូររបបដឹកនាំថៃបច្ចុប្បន្ន។ លោក Thanathorn បានប្រើប្រាស់បណ្តាញសង្គមដើម្បីអំពាវនាវឲ្យពលរដ្ឋចូលរួមជាមួយនឹងបក្សលោក។

តាម The Nation លោក Thanathorn បានសួរពលរដ្ឋថៃ ថាតើ ប្រជាជនថៃ ត្រូវបន្តរស់នៅជាមួយនឹងភាពខ្លាច និងអំណាចផ្តាច់ការ ដែលជារបបដឹកនាំមួយកំណត់ផ្លូវឲ្យប្រជាជនដើរដោយគ្មានការឯកភាពពីប្រជាជន ឬប្រជាជន ជាអ្នកកំណត់ជោគវាសនាដោយខ្លួនឯង?

លោក ថ្លែងបែបនេះរួចហើយ ក៏បញ្ចេញសារអំពាវនាវប្រជាពលរដ្ឋឲ្យចូលរួមជីវភាពនយោបាយជាមួយនឹងខ្លួនយ៉ាងដូច្នេះថា៖«...តម្លៃនៃការបង់១០០បាតសម្រាប់ការចូលជាសមាជិក គឺជាតម្លៃឈ្នួលសម្រាប់ខ្ញុំ និងបក្សអនាគតឆ្ពោះទៅមុខដើម្បីនាំប្រជាធិបតេយ្យត្រលប់មកវិញ។ ប្រទេសត្រូវការយើង ហើយបក្សអនាគតឆ្ពោះទៅមុខ ត្រូវការអ្នករួមដំណើរជាមួយ»។

គួរឲ្យកត់សម្គាល់ផងដែរនោះ នៅថ្ងៃ១២ កញ្ញាកន្លងទៅ អ្នកនយោបាយវ័យ ៣៩ ឆ្នាំ និងជាអតីតអ្នក ជំនួញជោគជ័យក្នុងសង្គមរូបនេះ ក៏បានផ្តល់កិច្ចសម្ភាសន៍ជាមួយនឹងសារព័ត៌មានសិង្ហបុរីពីការប្តេជ្ញាចិត្តរបស់ក្រុមលោកក្នុងការប្រជែងផ្នត់គំនិតនិងតទល់ជាមួយនឹងរបបសឹកដែលពួកគេ ហៅថាជារបបផ្តាច់ការ។

ពីវេទិកាសេដ្ឋកិច្ចពិភពលោកស្តីពីអាស៊ាននៅហាណូយ ដែលជាកន្លែងលោកទៅចូលស្តាប់ការជជែកដេញដោលរបស់ថ្នាក់ដឹកនាំ កំពូលរបស់ប្រទេស និងជាកន្លែងលោក ជួបពិភាក្សាជាមួយនឹងអ្នកនាំវ័យក្មេងនៅក្នុងតំបន់ផងនោះ លោក Thanathorn បានប្រាប់ The Strait Times ពីផែនការ នៃការនាំប្រជាធិបតេយ្យថៃមកវិញ ដោយដំបូងគេបង្អស់ គឺចូលរួមប្រជែងក្នុងការបោះឆ្នោត។

លោក បន្តថា ចំណុចបន្ទាប់គឺ លោកត្រូវដឹកនាំឲ្យមានការធ្វើប្រជាមតិដើម្បីកែរដ្ឋធម្មនុញ្ញ និងធ្វើប្រជាមតិមួយទៀតដើម្បីសម្រេចយករដ្ឋធម្មនុញ្ញថ្មី ដែលធានា មិនឲ្យមានកម្អែលរបស់របបសឹកនៅបន្តទៀត។ ក្នុងកិច្ចសម្ភាសន៍ដដែលនោះ អ្នកនយោបាយជំនាន់ក្រោយថៃរូបនេះ ក៏ហ៊ាននិយាយចំហរក្នុងករណីដែលរបបសឹក ចោទប្រកាន់រូបលោក ថា បំពាននឹងច្បាប់គ្រប់គ្រងកុំព្យូទ័រ និងប្រព័ន្ធអ៊ីនធ័រនែត ក្រោយពីលោក បានជជែកវែកញែករឿងនយោបាយតាមហ្វេសប៊ុក។

លោក សង្កត់ធ្ងន់ថា៖«ពួកគេ ព្យាយាមបិទមាត់ខ្ញុំ ...។ ប្រសិនបើប្រជាជនទាំងអស់ បង់បោះការតស៊ូ នោះប្រទេសទាំងមូល នឹងត្រូវដើរថយក្រោយហើយ»។ លោក ក៏បានថ្លែងជឿជាក់ផងដែរថា ករណីលោក ត្រូវបានកាត់ទោសឲ្យជនពន្ធនាគារតាមបណ្តឹងនោះមែន បក្សរបស់លោក នឹងនៅតែបន្តរស់ ហើយប្រជាជនផ្សេងទៀត ក៏នៅតែក្រោកឈរ និងធ្វើសកម្មភាព ដូចដែលលោក បានធ្វើដូចគ្នាផងដែរ៕