UN បើកផ្លូវអាកាសដើម្បីសង្គ្រោះប្រជាជនយេម៉ែនដែលមានជំងឺមហារីក ខណៈសង្គ្រាមកាន់តែធ្ងន់ធ្ងរ

អន្តរជាតិ

UN បើកផ្លូវអាកាសដើម្បីសង្គ្រោះប្រជាជនយេម៉ែនដែលមានជំងឺមហារីក ខណៈសង្គ្រាមកាន់តែធ្ងន់ធ្ងរ

17, Sep 2018 , 5:51 pm

រូបភាព

ដោយ: ថ្មីៗ

អង្គការសហប្រជាជាតិកំពុងពិភាក្សាដើម្បីឈានទៅបើកផ្លូវអាកាសសម្រាប់ដឹកអ្នកជំងឺធ្ងន់ធ្ងរនៅយេម៉ែនទៅកាន់ទីកន្លែងដែលសម្ភារនិងស្តង់ដាត្រឹមត្រូវ។ អ្នកជំងឺមហារីក, ជំងឺរ៉ាំរ៉ៃ និងអ្នកមានជំងឺមិនប្រក្រតីផ្សេងទៀតសុទ្ធតែស្ថិតក្នុងបញ្ជីជនអាទិភាព។

តំណាងពិសេសរបស់អង្គការសុខភាពពិភពលោកទទួលបន្ទុកប្រទេសយេម៉ែន Nevio Zagaria បានបញ្ជាក់នៅថ្ងៃអាទិត្យទី ១៦ ខែកញ្ញាថា តំណាងអង្គការសហប្រជាជាតិកំពុងចរចាជាមួយភាគីពាក់ព័ន្ធដើម្បីឈានទៅបើកផ្លូវអាកាសមនុស្សធម៌សម្រាប់ការសង្គ្រោះប្រជាជនមានជំងឺធ្ងន់ធ្ងរនៅយេម៉ែន។

បើតាមការចុះផ្សាយរបស់ទីភ្នាក់ងារព័ត៌មាន AFP មន្ត្រីខាងលើបានបញ្ជាក់ថា ផ្លូវការមនុស្សធម៌នេះគឺបើកសម្រាប់រាល់ប្រជាជនដែលមានជំងឺមហារីក និងជំងឺផ្សេងទៀតដែលធ្ងន់ធ្ងរ។ ពួកគេត្រូវដឹកជញ្ជូនទៅកាន់ទីតាំងដែលមានសម្ភារព្យាបាលត្រឹមត្រូវ និងល្អប្រសើរដែរ។

លោក Nevio Zagaria បានបញ្ជាក់ដូច្នេះថា៖ « ការបង្កើតច្រកនេះគឺដើម្បីជួយដល់អ្នកជំងឺដែលកំពុងរងគ្រោះដោយសារជំងឺមហារីក ជំងឺរ៉ាំរ៉ៃ និងភាពមិនប្រក្រតីពីកំណើតផ្សេងទៀតដែលត្រូវទទួលការព្យាបាលឆាប់រហ័សផង។ ជារួមជំងឺ ១២ ស្ថិតក្នុងបញ្ជីក្នុងនោះមានជំងឺក្រលៀន ជំងឺឆ្អឹង និងជំងឺផ្សេងទៀតដែរ»។

លោក Zagaria បានបង្ហើបថា ចំនួនអ្នកជំងឺ ៨០ភាគរយដែលត្រូវបញ្ជូនតាមច្រកផ្លូវអាកាសនេះជាស្ត្រី និងកុមារ ហើយវាជាក្តីសង្ឃឹមចុងក្រោយសម្រាប់អ្នកជំងឺទាំងនោះ។ លោកពន្យល់បន្ថែមដែរថា ច្រកផ្លូវអាកាសមនុស្សធម៌នេះដែរនឹងត្រូវដំណើរការក្នុងជំហានដំបូងនិងស្ថិតក្នុងដំណាក់កាលសាកល្បងក្នុងពេល ៦ខែ ប៉ុន្តែអ្នកជំនាញរូបនេះមិនបានបញ្ជាក់បន្ថែមទេថា អ្នកជំងឺទាំងនោះនឹងត្រូវដឹកជញ្ជូនទៅព្យាបាលនៅឯណាជាក់លាក់ឡើយ។

សូមបញ្ជាក់ថា មកដល់ពេលនេះ ប្រជាជនយេម៉ែន ២២ លាននាក់ឬស្មើនឹងបីភាគបួននៃប្រជាជនសរុបត្រូវការជំនួយមនុស្សធម៌ ខណៈដែលសង្គ្រាមបន្តទៅមុខរវាងកងកម្លាំងក្រុមឧទ្ទាម Houthis ដែលគាំទ្រដោយអ៊ីរ៉ង់ និងរដ្ឋាភិបាលយេម៉ែនដែលទទួលបានការគាំទ្រពីសម្ព័ន្ធអារ៉ាប់ដែលដឹកនាំដោយអារ៉ាប៊ីសាអូឌីតផងដែរ។

កាលពីថ្ងៃអាទិត្យចុងសប្តាហ៍នេះ ការវាយប្រហារ និងការទម្លាក់គ្រាប់តាមផ្លូវអាកាសដោយក្រុមរដ្ឋអារ៉ាប់នៅក្រុង Hodeida នោះបានឆក់យកជីវិតមនុស្ស ៣២នាក់ឯណោះ។ បើតាមការបញ្ជាក់ពីខាងមន្ទីរពេទ្យនិងក្រុមសង្គ្រោះពួកគេជាក្រុមឧទ្ទាម។

កន្លងមកអារ៉ាប៊ីសាអូឌីតដែលជាខ្នងបង្អែករដ្ឋាភិបាលយេម៉ែនបច្ចុប្បន្ននេះបន្តចោទប្រកាន់ថាក្រុមឧទ្ទាម Houthis បានលួចនាំសព្វាវុធពីអ៊ីរ៉ង់ដោយប្រើប្រាស់កំពង់ផែក្រុង Hodeida នេះ ហើយពួកគេបានបិទកំពង់ផែពាក់កណ្តាលផង។កំពុងផែនេះត្រូវបានកាន់កាប់ដោយក្រុមឧទ្ទាម រាប់ចាប់ពីពេលជម្លោះផ្ទុះឡើងក្នុងឆ្នាំ២០១៤។

តាមពិតទៅ វិបត្តិនៅយេម៉ែនផ្ទុះឡើងរវាងទាហានរដ្ឋាភិបាល និងក្រុមឧទ្ទាមឥស្លាម Houthis ប្រកាន់និកាយស៊ីអ៊ីតនៅខែកុម្ភៈឆ្នាំ ២០១៤ ក្រោយពេលដែលរដ្ឋាភិបាលថ្មីជំនួសរដ្ឋាភិបាលផ្តាច់ការរបស់លោក Ali Abdallah Saleh ដែលធ្លាក់ពីតំណែងនាឆ្នាំ២០១១ នោះ បានប្រកាសបង្កើតរដ្ឋធម្មនុញ្ញថ្មីមួយ។ រដ្ឋធម្មនុញ្ញនោះមានគោលដៅបង្កើតតំបន់រដ្ឋបាលតាមបែបរដ្ឋសហព័ន្ធដោយមានរដ្ឋចំណុះ៦ ដែលវាជាលេសរបស់រដ្ឋាភិបាលក្នុងការបន្ថយអំណាចនយោបាយរបស់ក្រុម Houthis៕