តារាភាពយន្តហូលីវូដ Angelina Jolie បានបង្ហាញវត្តមានដ៏គួរឲ្យភ្ញាក់ផ្អើលនាទិវាភាពយន្ត Cambodia Town Film Festival ឆ្នាំ២០១៨ ដែលរៀបចំនៅក្រុងឡុងប៊ិច រដ្ឋកាលីហ្វនីញ៉ា កាលពីថ្ងៃទី១៥ ខែកញ្ញា។
យោងតាមការផ្សាយរបស់ Long Beach Post លោក ប្រាជ្ញ លី ជាមនុស្សតែម្នាក់គត់ដែលបានដឹងពីដំណើររបស់ Angelina Jolie ទៅកាន់ទិវា Cambodia Town Film Festival ឆ្នាំ២០១៨។
Angelina ម្ចាស់ពានរង្វាន់អូស្ការ អាយុ៤៣ឆ្នាំ ដែលមានសញ្ជាតិខ្មែរផងដែរនោះ ក៏បានបង្ហាញវត្តមានផងដែរនៅទិវា Cambodia Town Film Festival កាលពីឆ្នាំ២០១៧ ដោយនៅពេលនោះ គាត់បានផ្សព្វផ្សាយរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» (First They Killed My Father) ជាមួយសមិទ្ធករ ប៉ាន់ រិទ្ធី និងអ្នកនិពន្ធ អ៊ឹង លួង។
ទិវា Cambodia Town Film Festival 2018 មានការចាក់បញ្ចាំងស្នាដៃភាពយន្តផ្សេងៗ ដែលផលិតដោយពលរដ្ឋខ្មែរ និងអាមេរិក។ រឿងដែលត្រូវបានចាក់បញ្ចាំងនៅឆ្នាំនេះ រួមមានដូចជា INDRADEVI – ‘IDOLS’, WASH IT! (លាងសម្អាត!), KHEMA (ខេមា), YEAR ZERO, ដើមត្នោត (Palm Tree), SOTHEA, The Morning After, ភាពយន្តឯកសារ LES PÉPITES / LITTLE GEMS , LETTERS FROM HOME, អង្គការ (ANGKAR), សតិជាប់ទ្រុង (MIND CAGE), ធ្មប់ (THE WITCH), RISKING LIGHT, THE JOY LUCK CLUB៕