អន្តរជាតិ
អាមេរិក និងអ៊ីរ៉ង់ប្រើកិច្ចប្រជុំមហាសន្និបាតអង្គការសហប្រជាជាតិដើម្បីវាយប្រហារគ្នា
×![]()
ដោយ: តន ចាន់រិទ្ធារ៉ា
ខុសពីឆ្នាំ២០១៧ ដែលកូរ៉េខាងជើងជាគោលដៅវាយប្រហាររបស់ប្រធានាធិបតីអាមេរិក ដូណាល់ ត្រាំ នាកិច្ចប្រជុំមហាសន្និបាតអង្គការសហប្រជាជាតិ (UNGA) ក្នុងឆ្នាំ២០១៨ អ៊ីរ៉ង់ក្លាយជាមុខសញ្ញាវិញម្ដង។ លោក ត្រាំ ចាត់ទុករបបដឹកនាំអ៊ីរ៉ង់ជាមេគាំទ្រភេវរកម្ម សាបព្រោះហិង្សា និងបង្កអស្ថិរភាពនៅមជ្ឈិបូព៌ា។ ប្រធានាធិបតីអ៊ីរ៉ង់ ហាសាន់ រូហានី បានតបតវិញ ដោយរិះគន់ថា លោក ត្រាំ ជាមនុស្សខ្សោយបញ្ញា។
កិច្ចប្រជុំលើកទី៧៣ មហាសន្និបាតអង្គការសហប្រជាជាតិនៅថ្ងៃទី២៥ ខែកញ្ញា បានក្លាយជាវេទិកាឆ្លើយឆ្លងពាក្យសម្ដីរវាងប្រធានាធិបតីអាមេរិក ដូណាល់ ត្រាំ និងប្រធានាធិបតីអ៊ីរ៉ង់ ហាសាន់ រូហានី ។ លោក ត្រាំ ដែលមិនពេញចិត្តអ៊ីរ៉ង់បន្តិចសោះសោះនោះ ក៏បានគំរាមដាក់ទណ្ឌកម្មកាន់តែច្រើនលើអ៊ីរ៉ង់ បន្ទាប់ពីដកអាមេរិកចេញពីកិច្ចព្រមព្រៀងនុយក្លេអ៊ែរឆ្នាំ២០១៥ ឯលោក រូហានី ក៏រិះគន់គោលនយោបាយលោក ត្រាំ កប់មាត់វិញដែរ។
ផ្ទុយស្រឡះពីកិច្ចប្រជុំឆ្នាំមុន លោក ត្រាំ មិនបាននិយាយវាយប្រហារកូរ៉េខាងជើងទៀតឡើយ តែថែមទាំងអរគុណមេដឹកនាំកូរ៉េខាងជើងទៅទៀត។ លោកបានប្រើប្រាស់ពេលវេលាស្ទើរទាំងអស់នៃសុន្ទរកថាជាង៣០នាទី លើគោលដៅអ៊ីរ៉ង់។ លោកបានចោទរបបដឹកនាំក្រុងតេហេរ់ង់ថា កំពុងសាបព្រោះចលាចល ការបំផ្លិចបំផ្លាញ និងការស្លាប់ ព្រមទាំងមិនគោរពប្រទេសដទៃ ឬក៏អធិបតេយ្យប្រទេសផ្សេងទៀតដែរ។
ក្នុងការបង្ហាញខ្លួនលើកទីនៅចំពោះមុខកិច្ចប្រជុំ UNGA ប្រធានាធិបតីអាមេរិករូបនេះបានស្នើឲ្យអន្តរជាតិដាក់អ៊ីរ៉ងឲ្យនៅឯកោ បើអ៊ីរ៉ង់បន្តនូវដែលអាមេរិកចាត់ទុកជា សម្មភាពឈ្លានពានទៀតនោះ។ ឆ្លៀតឱកាសនោះ លោក ត្រាំ ក៏និយាយការពារការដកខ្លួនចេញពីកិច្ចព្រមព្រៀងនុយក្លេអ៊ែរឆ្នាំ២០១៥ ហើយប្រកាសធ្វើគ្រប់យ៉ាងដើម្បីធានាថា អ៊ីរ៉ង់ដែលជាប្រទេសគាំទ្រភេរវកម្មធំមួយរបស់ពិភពលោក មិនអាចមាននុយក្លេអ៊ែរដាច់ខាត។
ដល់វេនលោកប្រធានាធិបតី រូហានី វិញ មេដឹកនាំអ៊ីរ៉ង់រូបនេះបានរិះគន់ប្រធានាធិបតីអាមេរិកចំៗ ជាពិសេសនយោបាយឯកតោភាគីនិយមតែម្ដង។ ការងើបប្រឆាំងនឹងពហុភាគីនិយម មិនមែនជាសញ្ញានៃភាពខ្លាំងទេ តែជាសញ្ញានៃភាពទន់ខ្សោយផ្នែកបញ្ញាទៅវិញទេ។ នេះជាការលើកឡើងរបស់លោក រូហានី ដែលចង់សំដៅទៅលោក ត្រាំ ។ ប្រធានាធិបតីអ៊ីរ៉ង់ក៏បន្តចោទអាមេរិកថា រៀបផែនការផ្ដួលរំលំរបបដឹកនាំអ៊ីរ៉ង់ផងដែរ។
អាមេរិក និងអ៊ីរ៉ង់មិនត្រូវគ្នាកាន់តែខ្លាំង បន្ទាប់ការដើរចេញរបស់អាមេរិកចេញពីកិច្ចព្រមព្រៀងនុយក្លេអ៊ែរឆ្នាំ២០១៥ កាលពីខែឧសភា ហើយអាមេរិកក៏ផ្ដើមដាក់ទណ្ឌកម្មលើអ៊ីរ៉ង់ឡើងវិញ។ លោក រូហានី ចាត់ទុកទង្វើរបស់អាមេរិក ជាភេរវកម្មផ្នែកសេដ្ឋកិច្ច។ ប៉ុន្តែលោកក៏រីករាយដែលប្រទេសហត្ថលេខីផ្សេងទៀត ក៏ដូចជាសហគមន៍អន្តរជាតិទាំងមូល មិនធ្វើតាមអាមេរិក និងនៅតែបន្តការប្ដេជ្ញាចិត្តអនុវត្តតាមកិច្ចព្រមព្រៀងនេះដដែល៕
Tag:
អាមេរិក
អ៊ីរ៉ង់
UNGA
ដូណាល់ ត្រាំ
ហាសាន់ រូហានី
© រក្សាសិទ្ធិដោយ thmeythmey.com
