ជាតិ
សេដ្ឋកិច្ច
គម្រោងអភិវឌ្ឍន៍ដីធ្លី ត្រូវទុក ៣៥ភាគរយ សម្រាប់ហេដ្ឋារចនាសម្ព័ន្ធ និងទីធ្លាលំហ រូបពីហ្វេសប៊ុក
× ភ្នំពេញ៖ ការអភិវឌ្ឍដី ត្រូវសុំលិខិតអនុញ្ញាតជាមុនពីអាជ្ញាធរមានសមត្ថកិច្ច។ នេះបើតាមប្រកាសស្ដីពីការអភិវឌ្ឍដី ដែលចុះហត្ថលេខាដោយលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី១១ខែឧសភាឆ្នាំនេះ និងត្រូវបានផ្សព្វផ្សាយនៅលើទំព័រហ្វេសប៊ុករបស់ក្រសួងក្នុងពេលថ្មីៗនេះ។
គម្រោងអភិវឌ្ឍន៍ដីដែលមានទំហំផ្ទៃដីធំជាង ៣ម៉ឺនម៉ែត្រក្រឡា ត្រូវស្នើសុំទៅរដ្ឋមន្ត្រីក្រសួងរៀបចំដែនដី តែបើគម្រោងនោះចាប់ពី ៣ម៉ឺនម៉ែត្រក្រលាចុះក្រោម ត្រូវស្នើសុំអភិបាលរាជធានីខេត្ត ដែលទីតាំងគម្រោងស្ថិតនៅ។ ចំពោះគម្រោងអភិវឌ្ឍន៍ដែលមានទំហំដីចាប់ពី ៥ពាន់ម៉ែត្រក្រឡាចុះក្រោម ត្រូវសុំលិខិតអនុញ្ញាតពីអភិបាលក្រុង ស្រុក ខណ្ឌ។
គម្រោងអភិវឌ្ឍន៍ដី មានរូបភាពជាអាទិ៍ ការបំបែកក្បាលដីច្រើនសម្រាប់លក់ ឬអភិវឌ្ឍន៍សាងសង់លំនៅឋាន ពាណិជ្ជកម្ម សេវាកម្ម ឧស្សាហកម្ម ទេសចរណ៍ និងអភិវឌ្ឍន៍ចម្រុះ។
គម្រោងអភិវឌ្ឍន៍ដី ត្រូវរក្សាទុកផ្ទៃដី ២៥ភាគរយនៃផ្ទៃដីសរុបសម្រាប់សាងសង់ហេដ្ឋារចនាសម្ព័ន្ធរូបវន្ត ដូចជាបណ្ដាណផ្លូវសាធារណៈ ប្រព័ន្ធទឹកស្អាត ទឹកកខ្វក់ លូទឹកភ្លៀង បណ្ដាញអគ្គិសនី បណ្ដាញគមនាគមន៍ ប្រព័ន្ធគ្រប់គ្រងកាកសំណល់រឹង និងរាវ ប្រព័ន្ធគ្រប់គ្រងអគ្គិភ័យ និងហានិភ័យផ្សេងៗ ជាដើម។
ក្រៅពីនេះ គម្រោងអភិវឌ្ឍន៍ដី ត្រូវរក្សាទុកផ្ទៃដី ១០ភាគរយនៃផ្ទៃដីសរុប សម្រាប់រៀបចំលំហសាធារណៈ និងផ្ទៃដីបៃតង។
លើសពីនេះ គម្រោងទាំងនោះត្រូវរៀបចំឲ្យមានសំណង់សម្រាប់ផ្ដល់សេវាជូនពលរដ្ឋ ឲ្យបានសមស្របតាមតម្រូវការនៃគម្រោងអភិវឌ្ឍន៍នីមួយៗ ដូចជា សាលារៀន មណ្ឌលសុខភាព អគាររដ្ឋបាល ផ្សារ។
ប៉ុន្តែលក្ខខណ្ឌទាំងនេះ មិនអនុវត្តចំពោះការអភិវឌ្ឍដី តាមរយៈការប្ដូរប្រភេទនៃការប្រើប្រាស់ដីសម្រាប់គម្រោងលំនៅឋានរបស់ប្រជាពលរដ្ឋដែលមានហេដ្ឋារចនាសម្ព័ន្ធសមស្របនោះទេ តែក៏ត្រូវគោរពតាមគោលការណ៍ណែនាំនគរូបនីយកម្ម ឬប្លង់គោល ឬផែនការប្រើប្រាស់ដីរាជធានី ក្រុង និងទីប្រជុំជន៕
© រក្សាសិទ្ធិដោយ thmeythmey.com