ជាតិ
លោក ស្យុង ប៉ ទទួលស្គាល់ថា ជនជាតិចិនដែលប្រព្រឹត្តបទល្មើស បានធ្វើឲ្យប៉ះពាល់ទឹកចិត្តពលរដ្ឋខ្មែរ
× ភ្នំពេញ៖ ឯកអគ្គរដ្ឋទូតចិនប្រចាំកម្ពុជា លោក ស្យុង ប៉ នៅតែគាំទ្រដល់រដ្ឋាភិបាលកម្ពុជា ដែលបានបង្ក្រាបរាល់សកម្មភាពជនជាតិចិន ប្រព្រឹត្តបទល្មើស និងបង្កអសន្តិសុខ ដល់ប្រជាពលរដ្ឋខ្មែរ។ ឯកអគ្គរដ្ឋទូតផុតអាណត្តិរូបនេះ បង្ហាញជំហរមិនគាំទ្រដល់ជនជាតិចិនណា ដែលប្រព្រឹត្តខុសច្បាប់កម្ពុជាឡើយ។
លោក ស្យុង ប៉ ទទួលស្គាល់ថា ជនជាតិចិនដែលប្រព្រឹត្តបទល្មើសកន្លងមក បានធ្វើឲ្យប៉ះពាល់ដល់ទឹកចិត្តពលរដ្ឋខ្មែរ ដែលមិនអាចលើកលែងឲ្យបាន។ ឯកអគ្គរដ្ឋទូតរូបនេះ ហាក់មិនអន់ចិត្តឡើយ ចំពោះចំណាត់ការរដ្ឋាភិបាលកម្ពុជា ដែលអនុវត្តលើជនជាតិចិនខុសច្បាប់ទាំងនោះ។
មិនត្រឹមតែប៉ុណ្ណោះលោក ស្យុង ប៉ បានបង្ហាញជំហរគាំទ្រដល់ក្រសួងមហាផ្ទៃ ដែលបានបង្ក្រាបរាល់ជនជាតិចិនប្រព្រឹត្តិបទល្មើស បង្កភាពអនាធិបតេយ្យ និង បញ្ហាសន្តិសុខសណ្តាប់ធ្នាប់ ដែលជាកត្តាព្រួយបារម្ភដល់ពលរដ្ឋខ្មែរផងដែរ។
ក្រសួងមហាផ្ទៃ ដែលបានស្រង់សម្តីលោក ស្យុង ប៉ ឯកអគ្គរដ្ឋទូតចិនចប់អាណត្តិ ក្នុងជំនួបលាសម្ដេច ស ខេង ដូច្នេះថា៖«មានជនល្មើសជាជនជាតិចិនមួយចំនួនបានឆ្លៀតឱកាសធ្វើសកម្មភាពបទល្មើសផ្សេងៗ ដែលធ្វើឲ្យប៉ះពាល់ដល់អារម្មណ៍និងទឹកចិត្តរបស់ពលរដ្ឋខ្មែរ។ អគុណចំពោះក្រសួងមហាផ្ទៃ ដែលបានយកចិត្តទុកដាក់ជួយបង្ក្រាបនូវជនល្មើសដែលបានប្រព្រឹត្តបទល្មើសទាំងនេះ»។
កម្ពុជានឹងខិតខំសហការគ្នាជាមួយចិនបន្ថែមទៀត ក្នុងការបង្ក្រាបជនល្មើសទាំងនោះ។ នេះជាការឆ្លើយតបរបស់សម្ដេច ស ខេង ដែលបានបន្ថែមថា ជំនួយចិនកន្លងមក គឺបានជួយលើកកម្ពស់សេដ្ឋកិច្ច និងការអភិវឌ្ឍនៅប្រទេសកម្ពុជា។
កន្លងមកសមត្ថកិច្ច បានបង្ក្រាបជនជាតិចិន ពាក់ព័ន្ធនឹងបទល្មើសផ្សេងៗ រួមមានបទល្មើសឆ្លងដែន ការជួញដូរគ្រឿងញៀន និងការប្រព្រឹត្តអំពើពេស្យាចារ្យផ្សេងៗជាដើម។ នេះបើតាមក្រសួងមហាផ្ទៃ៕
Tag:
ស ខេង
ស្យុង ប៉
ចិន
© រក្សាសិទ្ធិដោយ thmeythmey.com