អន្តរជាតិ
ចិនមិនឲ្យនាវាយោធាអាមេរិកចូលហុងកុង ក្រោយរងទណ្ឌកម្មរឿងទិញអាវុធពីរុស្ស៊ី
× រដ្ឋាភិបាលចិន បានហាមឃាត់នាវាយោធាអាមេរិកមួយគ្រឿង ចូលសំចតក្នុងទីក្រុងហុងកុង ក្រោយខ្លួនរងទណ្ឌកម្មពីសំណាក់ក្រុងវ៉ាស៊ីនតោន ជុំវិញរឿងទិញអាវុធពីរុស្ស៊ី។ នេះបើតាមការសេចក្ដីប្រកាសរបស់ក្រសួងការពារជាតិអាមេរិក កាលពីថ្ងៃទី២៦ ខែកញ្ញា ឆ្នាំ២០១៨។
នាវាចម្បាំង USS Wasp ដែលមាននាវិកជាង១០០០នាក់បម្រើការលើនោះ ត្រូវបានកំណត់ថ្ងៃចូលសំចតនៅឯកំពង់ផែហុងកុង នាខែតុលាខាងមុខ។ យោងតាមទីភ្នាក់ងារព័ត៌មាន AP អ្នកនាំពាក្យក្រសួងការពារជាតិអាមេរិក លោក Dave Eastburn បាននិយាយកាលពីថ្ងៃទី២៦ ខែកញ្ញាថា៖ «រដ្ឋាភិបាលចិន មិនយល់ព្រមតាមសំណើចូលសំចតរបស់នាវាចម្បាំងអាមេរិក USS Wasp ទៅកាន់ទីក្រុងហុងកុង។ យើងធ្លាប់បានចូលទៅកាន់ហុងកុងដោយជោគជ័យ ហើយយើងរំពឹងថាយើងនឹងធ្វើបន្តទៀត»។
ទាក់ទិននឹងរឿងនេះ អ្នកនាំពាក្យក្រសួងការបរទេសចិន លោក Geng Shuang បាននិយាយថា៖ «ភាគីចិនពិនិត្យ និងអនុម័តលើសំណើមួយៗ ដោយអនុលោមតាមគោលការណ៍គោរពអធិបតេយ្យភាព និងស្ថានការណ៍ជាក់លាក់»។
គួរបញ្ជាក់ថា នេះមិនមែនជាលើកទីមួយទេ ដែលក្រុងប៉េកាំងមិនព្រមឲ្យនាវាចម្បាំងអាមេរិក ចូលទៅកាន់ក្រុងហុងកុងបែបនេះ។ តួយ៉ាងក្នុងឆ្នាំ២០១៦ ចិនបានរារាំងមិនឲ្យនាវាដឹកយន្តហោះចម្បាំង USS John C. Stennis ចូលទៅកាន់ក្រុងហុងកុង ក្រោយពីនាវាយោធានេះ បានធ្វើដំណើរទៅកាន់សមុទ្រចិនខាងត្បូង។
ចំណាត់ការថ្មីនេះទំនងជាបង្កើនភាពតានតឹងដល់ទំនាក់ទំនងរវាងក្រុងវ៉ាស៊ីនតោន និងប៉េកាំងដែលកំពុងតែដុនដាបស្រាប់ផងនោះ ក្រោយពីរដ្ឋបាលលោកត្រាំ នៅថ្ងៃទី២០ កញ្ញាបានសម្រេចដាក់ទណ្ឌកម្មលើយោធាចិន ជុំវិញការទិញយន្តហោះចម្បាំងនិងមីស៊ីលពីរុស្ស៊ី។ យោងតាមរបាយការណ៍របស់សហរដ្ឋអាមេរិក ក្រុងប៉េកាំង កាលពីខែធ្នូ ឆ្នាំ២០១៧ ទទួលបានយន្តហោះចម្បាំង Su-35s ចំនួន១០គ្រឿង និងប្រព័ន្ធខែលការពារមីស៊ីល S-400 មួយចំនួនទៀតក្នុងឆ្នាំ២០១៨ ពីក្រុមហ៊ុននាំចេញអាវុធធំបំផុតរបស់រុស្ស៊ី Rosoboronexport៕
Tag:
ចិន
សហរដ្ឋអាមេរិក
ហុងកុង
លោក Dave Eastburn
លោក Geng Shuang
© រក្សាសិទ្ធិដោយ thmeythmey.com