អន្តរជាតិ
លោក ត្រាំ ព្រលយថា លោក ម៉ាធីស អាចលាលែងពីតំណែងរដ្ឋមន្ត្រីការពារជាតិ លោក ជេម ម៉ាធីស និងប្រធានាធិបតី ដូណាល់ ត្រាំ (រូបភាព AFP)
× ប្រធានាធិបតីអាមេរិក ដូណាល់ ត្រាំ បានព្រលយថា លោក ជេម ម៉ាធីស អាចចាកចេញពីគណៈរដ្ឋមន្ត្រីរបស់លោកនៅពេលខាងមុខ។ យ៉ាងណាមិញ លោកមិនទាន់ច្បាស់ទេថា លោក ម៉ាធីស អាចលាលែងពីតំណែងរបស់ខ្លួនឬយ៉ាងណាឡើយ។ នេះបើតាមសម្រង់សម្ដីរបស់លោក ត្រាំ ក្នុងកម្មវិធី 60 Minutes របស់ទូរទស្សន៍ CBS ដែលផ្សាយនៅថ្ងៃទី១៤ ខែតុលា។ លោក ត្រាំ ថែមទាំងចោទលោក ម៉ាធីស ជាមនុស្សរបស់បក្សប្រជាធិបតេយ្យផង។
ក្នុងរយៈពេលជិតពីរឆ្នាំដំបូង មន្ត្រីសំខាន់ជាច្រើនៗបានចាកចេញពីរដ្ឋបាលលោកប្រធានាធិបតី ដូណាល់ ត្រាំ ។ អ្នកខ្លះសម្រេចចិត្តលាលែងដោយខ្លួនឯង ឯអ្នកខ្លះទៀតបង្ខំចិត្តដោយដើរចេញ និងមានអ្នកដែលត្រូវលោក ត្រាំ បញ្ចប់តំណែងផង។ ករណីចុងក្រោយ គឺការប្រកាសលាលែងរបស់លោកស្រី នីគី ហេលី (Nikki Haley) ពីតំណែងអគ្គរដ្ឋទូតអាមេរិកប្រចាំអង្គការសហប្រជាជាតិនៅដំណាច់ឆ្នាំនេះ។
រដ្ឋមន្ត្រីការពារជាតិ ជេម ម៉ាធីស គឺជាមុខសញ្ញាមួយទៀតដែលអាចចាកចេញពីគណៈរដ្ឋមន្ត្រីរបស់លោក ត្រាំ ដែរ។ ពាក្យចចាមអារ៉ាមស្ដីពីអនាគតរបស់លោក ម៉ាធីស បានលេចឮកាន់តែខ្លាំង បន្ទាប់ពីការផ្សាយសៀវភៅមួយក្បាលស្ដីពីជម្លោះក្នុងសេតវិមាន ដែលក្នុងនោះបានរៀបរាប់ពីការមិនពេញចិត្តរបស់លោក ម៉ាធីស លើសមត្ថភាពរបស់លោក ត្រាំ និងបានប្រៀបធៀបមេកើយរបស់ខ្លួនទៅនឹងក្មេងអាយុ១១ឆ្នាំទៀត។ ប៉ុន្តែលោក ម៉ាធីស បដិសេធ។
ជុំវិញអនាគតរបស់ប្រមុខការពារជាតិរូបនេះ ប្រធានាធិបតីអាមេរិកនិយាយថា លោក ម៉ាធីស អាចនឹងលាលែង ហើយលោកគិតថា លោក ម៉ាធីស ជាមនុស្សនៃបក្សប្រជាធិបតេយ្យទៀតផង។ ក្នុងកិច្ចសម្ភាសជាមួយទូរទស្សន៍ CBS លោក ត្រាំ បញ្ជាក់ដូច្នេះថា៖ «ឧត្តមសេនីយ៍ ម៉ាធីស ជាមនុស្សល្អ។ យើងមានទំនាក់ទំនងល្អជាមួយគ្នា។ គាត់ទំនងជាចាកចេញ។ ខ្ញុំមានន័យថា ដល់ចំណុចខ្លះ គ្រប់គ្នានឹងចាកចេញ»។
នេះជាលើកទីមួយដែលលោក ត្រាំ និយាយជាសាធារណៈពីរឿងអវិជ្ជមានពាក់ព័ន្ធលោក ម៉ាធីស ដែលកាលពីសប្ដាហ៍មុនអះអាងថា លោកមិនខ្វល់រឿងការចាកចេញពីរដ្ឋាភិបាលឡើយ។ លោក ម៉ាធីស ដែលគ្មានប្រភពជាអ្នកនយោបាយអ្វីនោះ និងចូលនិវត្តន៍ពីយោធានៅក្នុងឆ្នាំ២០១៣ អក៏ធ្លាប់និយាយដោយចំហថា លោកមិនដែលចង់ធ្វើរដ្ឋមន្ត្រីការពារជាតិឡើយ ពេលលោក ត្រាំ ជាប់ឆ្នោតជាប្រធានាធិបតីនោះ។
កន្លងមក ក្រុមឧត្តមសេនីយ៍អាមេរិកធ្លាប់តែមានឥទ្ធិពលខ្លាំងក្នុងនយោបាយសន្តិសុខជាតិ។ ប៉ុន្តែក្រោលោក ត្រាំ តែងតាំងលោក ចន ប៊ូលតុន ជាទីប្រឹក្សាសន្តិសុខជាតិ និងលោក ម៉ៃ ប៉ុមប៉េអូ ជារដ្ឋមន្ត្រីការបរទេស ចរន្តអំណាចបានប្រែប្រួលខ្លាំង។ លោក ប៊ូលតុន បានជំនួសតំណែងឧត្តមសេនីយ៍ឯក HR McMaster កាលពីខែមេសា។ លោក John Kelly ដែលមានប្រភពជាឧត្តមសេនីយ៍ដែលនោះហាក់បាត់បង់ទំនុកចិត្តពីលោក ត្រាំ ដែរ៕
Tag:
អាមេរិក
ដូណាល់ ត្រាំ
ជេម ម៉ាធីស
© រក្សាសិទ្ធិដោយ thmeythmey.com