ជប៉ុននឹងប្រើប្រព័ន្ធទិដ្ឋាការអេឡិចត្រូនិកសម្រាប់ភ្ញៀវទេសចរបរទេសពីរឆ្នាំខាងមុខ

អន្តរជាតិ

ជប៉ុននឹងប្រើប្រព័ន្ធទិដ្ឋាការអេឡិចត្រូនិកសម្រាប់ភ្ញៀវទេសចរបរទេសពីរឆ្នាំខាងមុខ

16, Oct 2018 , 8:59 am

រូបភាព

ដោយ:

រដ្ឋាភិបាលក្រុងតូក្យូ បានប្រកាសនៅថ្ងៃទី១៤ ខែតុលាថា ខ្លួនគ្រោងដាក់ដំណើរការប្រព័ន្ធទិដ្ឋការអេឡិចត្រូនិក(E-Visa) សម្រាប់ភ្ញៀវទេសចរបរទេសនាខែមេសាឆ្នាំ២០២០ខាងមុខ។ វាជាវិធានការដើម្បីសម្រេចគោលដៅទទួលភ្ញៀវទេសចរបរទេសឲ្យបាន ៦០លាននាក់ក្នុងមួយឆ្នាំៗ គិតត្រឹមឆ្នាំ២០៣០ខាងមុខនេះ។

ប្រព័ន្ធ E-Visa ត្រូវបានបង្កើតឡើងក្នុងគោលបំណង ជួយសម្រួលដល់ដំណើរការនៃការដាក់ស្នើសុំធ្វើទិដ្ឋាការ, កាត់បន្ថយបន្ទុកការងារនៅឯបេសកកម្មការទូតនានា និងរឹតត្បិតការគ្រប់គ្រងបញ្ហាអន្តោប្រវេសន៍ ដោយមានការចែករំលែកទិន្នន័យនៃទិដ្ឋការជាមួយក្រុមហ៊ុនអាកាសចរណ៍ជាដើម។ គោលបំណងទាំងនេះនឹងត្រូវធ្វើឡើង នៅមុនព្រឹត្តិការណ៍កីឡាអូឡាំពិកឆ្នាំ២០២០នាទីក្រុងតូក្យូ។

យោងតាមសារព័ត៌មានជប៉ុន Kyodo សម្រាប់ប្រព័ន្ធថ្មីនេះ ភ្ញៀវទេសចរបរទេសទាំងអស់ដែលមានបំណងធ្វើដំណើរទៅកាន់ប្រទេសជប៉ុន នឹងអាចដាក់ពាក្យស្នើសុំធ្វើទិដ្ឋការអនឡាញនេះ នៅតាមភ្នាក់ងារទេសចរណ៍នានាបាន។

ប្រព័ន្ធអនឡាញនេះ នឹងត្រូវដាក់ឲ្យភ្ញៀវទេសចរចិនប្រើប្រាស់មុនគេបង្អស់ តែសម្រាប់ការស្នើសុំធ្វើទិដ្ឋាការចូលតែម្តង (Single-entry visa) ប៉ុណ្ណោះ។ ចំណែកភ្ញៀវទេសចរមកពីប្រទេសផ្សេងៗទៀត នឹងត្រូវបានអនុញ្ញាតឲ្យប្រើប្រាស់ជាបន្តបន្ទាប់។ បើតាមក្រសួងការបរទេសជប៉ុន ភ្ញៀវទេសចរចិនបានដាក់ស្នើសុំធ្វើទិដ្ឋការទៅកាន់ជប៉ុន រហូតដល់ជិត៦០ភាគរយក្នុងឆ្នាំ២០១៧។

ខណៈរដ្ឋាភិបាលជប៉ុនកំពុងមើលឃើញការពង្រឹងវិស័យទេសចរណ៍ ជាសសរស្តម្ភមួយនៃយុទ្ធសាស្ត្រកំណើនសេដ្ឋកិច្ចរបស់ខ្លួន ប្រទេសក្នុងតំបន់អាស៊ីបូព៌ាមួយនេះគ្រោងទទួលភ្ញៀវទេសចរបរទេសដល់រហូតដល់ ៤០លាននាក់គិតត្រឹមឆ្នាំ២០២០ និង៦០លាននាក់គិតត្រឹមឆ្នាំ២០៣០។

សម្រាប់យុទ្ធសាស្ត្រដើម្បីពង្រឹងវិស័យទេសចរណ៍នេះដែរ រដ្ឋាភិបាលជប៉ុនបានបន្ធូរបន្ថយតម្រូវការនៅពេលដាក់ស្នើសុំធ្វើទិដ្ឋាការឲ្យមានភាពងាយស្រួលជាងមុន ព្រមទាំងបានបង្កើនចំនួនជើងហោះហើរដែលមានតម្លៃថោក ឲ្យបានច្រើនជាងមុនផងដែរ។

គួរបញ្ជាក់ដែរថា ភ្ញៀវទេសចរបរទេសប្រមាណ ២៨,៧លាននាក់ បានធ្វើដំណើរទៅកាន់ប្រទេសជប៉ុនក្នុងឆ្នាំ២០១៧ ដែលតួលេខនេះកើនឡើងចំនួន១៩,៣% បើធៀបនឹងឆ្នាំ២០១៦។ បើទោះបី គេរំពឹងថា តួលេខក្នុងឆ្នាំ២០១៨ អាចហក់ឡើងដល់៣០លាននាក់ជាលើកដំបូងក្តី ប៉ុន្តែជប៉ុនក៏ត្រូវដោះស្រាយផលប៉ះពាល់មួយចំនួនដែលបង្កឡើងដោយគ្រោះធម្មជាតិផងដែរ ក្នុងនោះរួមមាន បាតុភូតរញ្ជួយដីយ៉ាងខ្លាំងនៅកោះ Hokkaido និងជំនន់ភ្លៀងនៅភាគខាងលិចនៃប្រទេសជាដើម។ ការណ៍នេះអាចបង្កឲ្យមានការធ្លាក់ចុះដល់ចំនួនភ្ញៀវទេសចរបរទេសទៅកាន់ប្រទេសជប៉ុន៕