អន្តរជាតិ
សមាជិកព្រឹទ្ធសភា ទារឲ្យលោក ត្រាំ បញ្ចេញរបាយការណ៍ទំនាក់ទំនងហិរញ្ញវត្ថុជាមួយអារ៉ាប៊ីសាអូឌីត រូបភាព៖ AFP
× សមាជិកព្រឹទ្ធសភាអាមេរិកមួយក្រុមមកពីបក្សប្រជាធិបតេយ្យបានស្នើឲ្យប្រធានាធិបតី ដូណាល់ ត្រាំ បង្ហាញរបាយការណ៍ទំនាក់ទំនងហិរញ្ញវត្ថុដែលមានជាមួយអារ៉ាប៊ីសាអូឌីតទាំងអស់។ គេបារម្ភថា វាអាចមានទំនាស់ផលប្រយោជន៍កើតឡើង ចំពេលដែលការស៊ើបអង្កេតរឿងបាត់ខ្លួនអ្នកសែតរិះគន់រដ្ឋាភិបាលអារ៉ាប៊ីសាអូឌីតកំពុងកើតមាន។
លិខិតចំហមួយច្បាប់ដែលរៀបចំឡើងដោយសមាជិកព្រឹទ្ធសភា បក្សប្រជាធិបតេយ្យ១១រូបបានស្នើឲ្យប្រធានាធិបតីអាមេរិក និងកូនរបស់លោកបញ្ចេញរាល់របាយការណ៍ពាក់ព័ន្ធនឹងការផ្ទេរហិរញ្ញវត្ថុពីអារ៉ាប៊ីសាអូឌីតមកកាន់ក្រុមហ៊ុនអចលនទ្រព្យរបស់ក្រុមគ្រួសារត្រាំ (Trump Organization) ក្នុងពេល ១០ឆ្នាំចុងក្រោយ។
បើតាមការចុះផ្សាយរបស់ទីភ្នាក់ងារព័ត៌មាន AFP ការស្នើសុំនេះធ្វើឡើងស្របពេលដែលរដ្ឋបាលលោក ត្រាំ បន្តការពារខ្លួនឯង ក៏ដូចជាការចោទប្រកាន់នានាប្រឆាំងអារ៉ាប៊ីសាអូឌីតដូចគ្នាពាក់ព័ន្ធនឹងការបាត់ខ្លួនរបស់ អ្នកកាសែតអារ៉ាប៊ីសាអូឌីត Jamal Khashoggi ។ លោក Khashoggi បានបាត់ខ្លួនកាលពីថ្ងៃ ២តុលាបន្ទាប់ពីចូលទៅកាន់ស្ថានកុងស៊ុលអារ៉ាប៊ីសាអូឌីតនៅក្រុងអ៊ីស្តង់ប៊ុល។
ក្រុមសមាជិកព្រឹទ្ធសភាបក្សប្រជាធិបតេយ្យបញ្ជាក់ក្នុងលិខិតរបស់ខ្លួនដោយរម្លឹកសម្តីលោក ត្រាំ ក្នុងឆ្នាំ ២០១៥ ពេលឃោសនារកសំឡេងឆ្នោតដែលពេលនោះលោក អះអាងថា អារ៉ាប៊ីសាអូឌីតចំណាយលុយរាប់សិបលានដុល្លារទិញខុនដូ និងអាផាតមិនរបស់ក្រុមហ៊ុនលោកផង។
វាបង្ហាញឲ្យឃើញកាន់តែច្បាស់ថា សមាជិកសភាទាំងនេះកំពុងព្យាយាមដាក់សម្ពាធឲ្យមេដឹកនាំអាមេរិកមកពីបក្សសាធារណរដ្ឋនេះបញ្ចេញរបាយការណ៍ពាក់ព័ន្ធនានាក្នុងការចរចាបង្កើតកិច្ចព្រមព្រៀងជំនួញរវាងអាមេរិក និងក្រុមហ៊ុនលោក ត្រាំ។ បើមានមែន វាជាករណីទំនាស់ផលប្រយោជន៍ផងព្រោះ មជ្ឈដ្ឋានអាមេរិកកំពុងទាមទារឲ្យរដ្ឋបាលបច្ចុប្បន្នកដាក់សម្ពាធ ឬចេញវិធានការឆ្លើយតបអារ៉ាប៊ីសាអូឌីតដែលអាចនៅពីក្រោយការបាត់ខ្លួនរបស់អ្នកកាសែតខាងលើ។
ដើមឡើយ លោក ត្រាំ បានគំរាមដាក់ទណ្ឌកម្មធ្ងន់ធ្ងរប្រឆាំងអារ៉ាប៊ីសាអូឌីតផង បើសិនជាគេរកឃើញថា លោក Khashoggi ត្រូវបានគេសម្លាប់ក្នុងស្ថានកុងស៊ុលអារ៉ាប៊ីសាអូឌីតមែន។ ប៉ុន្តែក្រោយមក មេដឹកនាំរូបនេះចាប់ផ្តើមប្តូរជំហរដោយបង្ហើបថា លោក Khashoggi អាចត្រូវក្រុមសង្គមងងឹតសម្លាប់ មិនមែនអារ៉ាប៊ីសាអូឌីតឡើយ ហើយលោកក៏ព្យាយាមកោតសរសើរអារ៉ាប៊ីសាអូឌីតថា ជាម៉ូយអាវុធដ៏ល្អរបស់អាមេរិកដែរ។
យ៉ាងណាមិញ លោក ត្រាំ ដែលនៅសល់ភាគហ៊ុនក្នុងក្រុមហ៊ុនអចលនទ្រព្យត្រាំនោះ បានទាត់ចោលការទាមទារ និងហៅលិខិតនោះថា ព័ត៌មានក្លែងក្លាយទៀត។ លោកអះអាងថា លោកផ្ទាល់គ្មានសោះផលប្រយោជន៍ហិរញ្ញវត្ថុនៅក្នុងទំនាក់ទំនងជាមួយអារ៉ាប៊ីសាអូឌីត៕
Tag:
អាមេរិក
ព្រឹទ្ធសភា
អារ៉ាប៊ីសាអូឌីត
Jamal Khashoggi
© រក្សាសិទ្ធិដោយ thmeythmey.com