អន្តរជាតិ
មហាធៀ៖ រដ្ឋាភិបាលត្រូវការបក្សប្រឆាំងក្នុងរដ្ឋសភាដើម្បីត្រួតពិនិត្យនិងរក្សាតុល្យភាពអំណាច
× នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី២២ ខែតុលា បានលើកហេតុផលថា វាជារឿងចាំបាច់ដែលរដ្ឋាភិបាលម៉ាឡេស៊ីត្រូវការបក្សប្រឆាំងខ្លាំងដើម្បីរក្សាតុល្យភាពអំណាច និងការត្រួតពិនិត្យនយោបាយ ។
ក្នុងពិធីពិធីមួយថ្ងៃ ២២ ខែតុលា នាយករដ្ឋមន្ត្រីចាស់ជាងគេលោក មហាធៀ បានលើកឡើងពីសារសំខាន់នៃការធានាវត្តមានបក្សប្រឆាំងក្នុងសភា ព្រោះវាអាចធានាឲ្យបាននូវការត្រូតពិនិត្យ និងតុល្យភាពនៃអំណាចក្នុងរដ្ឋបាលដឹកនាំម៉ាឡេស៊ី។
យោងតាមទីភ្នាក់ងារព័ត៌មានម៉ាឡេស៊ី Bernama លោក មហាធៀ បាននិយាយដូច្នេះ៖ « គណបក្សប្រឆាំងគឺមានសារៈសំខាន់ណាស់សម្រាប់នយោបាយម៉ាឡេស៊ី។ ប្រសិនបើយើងមិនមានគណបក្សប្រឆាំងនោះទេ វាដូចជាមើលកញ្ចក់អញ្ចឹង យើងប្រហែលមើលឃើញខ្លួនឯងស្អាត ប៉ុន្តែអ្នកដ៏ទៃមិនគិតដូច្នេះនោះឡើយ»។
បន្ថែមពីលើកឡើងរឿងធានាវត្តមានបក្សប្រឆាំង មេដឹកនាំរូបនេះបានរៀបរាប់ថា ការដឹកនាំរដ្ឋាភិបាលម៉ាឡេស៊ីបច្ចុប្បន្នមិនមែនជារឿងស្រួលឡើយ។ នោះក៏ព្រោះថាលោកមិនមែនជាមេដឹកនាំបក្សដែលមានឥទ្ធិពលខ្លាំងជាងគេ ក្នុងរដ្ឋាភិបាលដូចអតីតកាលឡើយ។
លោកមហាធៀ បាននិយាយថា ស្ថានភាពនយោបាយម៉ាឡេស៊ីបច្ចុប្បន្នខុសប្លែកឆ្ងាយពីពេលដែលលោកក្តោបក្តាប់អំណាចជានាយករដ្ឋមន្ត្រីក្នុងពេល ២២ឆ្នាំ ដែលចាប់ពីឆ្នាំ១៩៨១ ដល់ឆ្នាំ២០០៣។ ត្រង់នេះ លោកបានលើកឡើងបែបនេះ៖ «នាពេលអតីតកាល ខ្ញុំបានដឹកនាំបក្សដែលមានឥទ្ធិពលបំផុត ជាមួយសម្លេងច្រើនជាងគេក្នុងសភា។ ដូច្នេះហើយគ្រប់សំណើដែលយើងបានដាក់ស្នើ ច្បាស់ណាស់វាត្រូវបានគេគាំទ្រ»។
មេដឹកនាំវ័យ៩៣ឆ្នាំរូបនេះបានពន្យល់បន្ថែមថា បច្ចុប្បន្ននេះក្នុងសម្ព័ន្ធបក្សកាន់អំណាច Pakatan Harapan (PH) វាមានគណបក្សរហូតដល់បួនឯណោះ ហើយបក្សនីមួយៗមានមនោគមន៍វិជ្ជារៀងៗខ្លួន។ ដូច្នេះហើយ រាល់ការសម្រេចចិត្តណាមួយ លោកមហាធៀ ចាំបាច់ត្រូវតែបញ្ចុះបញ្ចូលគ្រប់គណបក្សទាំងអស់ក្នុងសម្ព័ន្ធគណបក្សកាន់អំណាចនេះជាមុនសិន។
បន្ថែមពីលើភាពលំបាកក្នុងការដឹកនាំ នាយករដ្ឋមន្ត្រីម៉ាឡេស៊ីរូបនេះ ក៏បានបង្ហាញក្តីបារម្ភចំពោះប្រជាជនម៉ាឡេស៊ីដែលមានក្តីរំពឹងខ្ពស់មកលើរដ្ឋាភិបាលរបស់លោកដែរ។ ត្រង់នេះ លោកបានពន្យល់ថា វាជារឿងធម្មតាដែលប្រជាជនមានក្តីសង្ឃឹមនិងរំពឹង ប៉ុន្តែលោកមិនមែនជាគ្រូវេទមន្តដែលដោះស្រាយ ឬសម្រេចបានអ្វីគ្រប់យ៉ាង និងធានាបាននូវភាពជោគជ័យបានមួយពព្រិចភ្នែកឡើយ៕
Tag:
ម៉ាឡេស៊ី
មហាធៀ មហាម៉ាត់
© រក្សាសិទ្ធិដោយ thmeythmey.com