ប្រធានាធិបតីចិន ស៊ី ជិនភីង នៅថ្ងៃទី២២ ខែតុលា បានប្រកាសបើកដំណើរការស្ពានឆ្លងកាត់សមុទ្រវែងជាងគេលើលោក ក្រោយចាប់ផ្តើមការសាងសង់ក្នុងឆ្នាំ២០០៩។ ស្ពានដ៏វែងនេះមានប្រវែង ៥៥គីឡូម៉ែត្រ និងត្រូវចំណាយថវិកាសាងសង់ចំនួន ២០ពាន់លានដុល្លារឯណោះ។
ស្ពានដ៏វែងមហិមានេះ គឺភ្ជាប់តំបន់ពាណិជ្ជកម្មសំខាន់ៗរបស់ចិនចំនួន៣ រួមមានដូចជា ទីក្រុងហុងកុង ម៉ាកាវ និងហ្សូហៃ (Zhuhai)។ ស្ថិតក្នុងគម្រោងបង្កើតតំបន់អភិវឌ្ឍន៍ Greater Bay របស់ចិន តំបន់នេះជាជម្រកសម្រាប់ប្រជាជនចំនួន ៦៨លាននាក់។
កាលពីអតីតកាល សម្រាប់ការធ្វើដំណើរពីទីក្រុង ហ្សូហៃ ទៅកាន់ហុងកុង គេត្រូវការពេលយ៉ាងហោចណាស់ ៤ម៉ោង ប៉ុន្តែស្ពានថ្មីនេះបានកាត់បន្ថយពេលវេលាមកត្រឹម៣០នាទីប៉ុណ្ណោះ។
-លក្ខណៈពិសេសនៃស្ពានដ៏វែងនេះ
បើរួមបញ្ចូលទៅផ្លូវធ្វើដំណើរផងនោះ ស្ពាននេះលាតសន្ធឹងដល់ទៅប្រវែង ៥៥គីឡូម៉ែត្រ ប៉ុន្តែក្នុងនោះបែងចែកជាផ្នែកសំខាន់ពីរដាច់ដោយឡែកពីគ្នា។ ទីមួយគឺផ្នែកស្ពានមានប្រវែង ៣៥គីឡូម៉ែត្រ ដែលរត់ឆ្លងកាត់សមុទ្រនៃតំបន់ដីសណ្តរ Zhūjiāng ឬហៅថា Greater Bay ។
លើសពីនេះដើម្បីអាចឲ្យនាវាបើកឆ្លងកាត់បាននោះ ស្ពានដ៏អស្ចារ្យនេះមានផ្នែករូងក្រោមសមុទ្រប្រវែង ៦,៧ គីឡូម៉ែត្រ ដែលរត់ឆ្លត់កាត់កោះសប្បនិមិត្តចំនួន២។ រីឯផ្នែកផ្សេងៗទៀតដែលនៅសេសសល់ គឺមានផ្លូវថ្នល់ និងផ្លូវក្រោមដី ដែលភ្ជាប់ក្រុង ហ្សូហៃ និងហុងកុងទៅនឹងស្ពានតែម្តង។
ម្យ៉ាងវិញទៀត ស្ពាននេះដែរត្រូវបានរចនាឡើងដើម្បីទប់ទល់នឹងគ្រោះរញ្ជួយដី និងព្យុះទីហ្វុង។ អ្វីដែលជាចំណុចពិសេសមួយទៀតនោះគឺ ស្ពានដ៏វែង និងធន់មួយនេះត្រូវបានសាងសង់ឡើង ដោយប្រើប្រាស់ដែកថែបចំនួន ៤០ម៉ឺនតោន។ បើពិតទៅចំនួនដែកថែបដ៏ច្រើនសន្ធឹកសន្ធាប់នេះគឺគ្រប់គ្រាន់អាចសាងសង់បានប៉ម Eiffel របស់បារាំងចំនួន៦០ឯណោះ។
-តើគ្រប់គ្នាសុទ្ធតែអាចធ្វើដំណើរលើស្ពាននេះបាន?
ចម្លើយគឺ អត់ទេ! សម្រាប់អ្នកដែលចង់ធ្វើដំណើរឆ្លងកាត់ស្ពាននេះ ត្រូវតែមានលិខិតអនុញ្ញាតពិសេស ដែលផ្តល់ឲ្យដោយប្រព័ន្ធក្វូតា (quota) ។ ហើយម្យ៉ាងវិញទៀត ស្ពាននេះពុំមានផ្លូវរថភ្លើងនោះឡើយ។
អាជ្ញាធរចិនដំបូងឡើយបានប៉ាន់ស្មានថា រថយន្តចំនួន ៩២០០គ្រឿងនឹងបើកឆ្លងកាត់ជារៀងរាល់ថ្ងៃ ប៉ុន្តែក្រោយមកពួកគេបានបន្ទាបការប៉ាន់ស្មានរបស់ពួកគេ បន្ទាប់ពីបណ្តាញដឹកជញ្ជួនថ្មីមួយត្រូវបានសាងសង់ឡើងនៅក្នុងតំបន់៕