អាមេរិកលុបចោលទិដ្ឋាការអារ៉ាប៊ីសាអូឌីតឆ្លើយតបនឹងករណីឃាតកម្មលោក Khashoggi

អន្តរជាតិ

អាមេរិកលុបចោលទិដ្ឋាការអារ៉ាប៊ីសាអូឌីតឆ្លើយតបនឹងករណីឃាតកម្មលោក Khashoggi

24, Oct 2018 , 3:27 pm

រូបភាព

ដោយ: ថ្មីៗ

សហរដ្ឋអាមេរិកប្រកាសនៅថ្ងៃអង្គារទី ២៣ ខែតុលាថា រដ្ឋបាលលោកសម្រេចលុបចោលទិដ្ឋាការជនជាតិអារ៉ាប៊ីសាអូឌីតដែលពាក់ព័ន្ធនឹងករណីឃាតកម្មរបស់អ្នកសារព័ត៌មានរិះគន់រដ្ឋាភិបាលលោក Jamal Khashoggi។

រងសម្ពាធពីបណ្តាសមាជិកសភាទាំងពីរបក្សលើករណីឃាតកម្មអ្នកសារព័ត៌មានអារ៉ាប៊ីសាអូឌីតលោក Jamal Khashoggi នៅស្ថានកុងស៊ុលអារ៉ាប៊ីសាអូឌីតតួកគី ក្រសួងការបរទេសអាមេរិកបានបញ្ជាក់ថា ខ្លួនកំណត់បានមនុស្ស ២១ នាក់ដែលទិដ្ឋាការត្រូវលុបចោល ឬលែងអាចស្នើសុំទិដ្ឋាការអាមេរិកបាននៅពេលខាងមុខផង។

យោងតាមទីភ្នាក់ងារព័ត៌មាន AFP វាជាជំហានដំបូងនៃការដាក់ចេញវិធានការរបស់អាមេរិកឆ្លើយតបនឹងសម្ព័ន្ធមិត្តខ្លួនអារ៉ាប៊ីសាអូឌីត ដែលពាក់ព័ន្ធនឹងការសម្លាប់លោក Khashoggi ដែលគេស្គាល់ថាជាអ្នកកាសែតហ៊ានរិះគន់រដ្ឋាភិបាល។

រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានប្រាប់អ្នកសារព័ត៌មានថា អត្តសញ្ញាណជនសង្ស័យដែលត្រូវរងវិធានការនេះអាមេរិកទទួលបានពីភ្នាក់ងារចារកម្ម ក្រសួងការបរទេស និងក្រសួងដទៃទៀតរបស់អារ៉ាប៊ីសាអូឌីតដែរ។ លោកសង្កត់ធ្ងន់ថា ការដាក់ចេញវិធានការនេះបញ្ជាក់ច្បាស់ថា អាមេរិកមិនលើកលែងទាល់តែសោះចំពោះរាល់សកម្មភាពដែលបំបិទមាត់អ្នកកាសែតាមការប្រើហិង្សា។

ប្រមុខការទូតរូបនេះបន្ថែមថា អាមេរិកកំពុងពិចារណាផងដែរលើវិធានការផ្សេងទៀតស្ថិតក្រោមច្បាប់ Sergei Magnitsky ដែលមានគោលដៅដាក់ទណ្ឌកម្មហិរញ្ញវត្ថុប្រឆាំងរាល់បុគ្គលដែលពាក់ព័ន្ធឬនៅពីក្រោយការស្លាប់របស់លោក Khashoggi ដែរ។

គេមិនទាន់ដឹងច្បាស់ថា ជនជាតិអារ៉ាប៊ីសាអូឌីតទាំងនោះជាអ្នកណាឲ្យពិតប្រាកដឡើយ ប៉ុន្តែមេដឹកនាំអារ៉ាប៊ីសាអូឌីតបានបដិសេធរាល់ការចោទប្រកាន់ថា ខ្លួនមានពាក់ព័ន្ធនឹងករណីសម្លាប់អ្នកកាសែតនេះ។

ដោយឡែក ប្រធានាធិបតីអាមេរិកលោក ដូណាល់ ត្រាំ ដែលទើបជជែកជាមួយក្សត្រអារ៉ាប៊ីសាអូឌីត និងរជ្ជទាយាទផងនោះបានបញ្ជាក់នៅថ្ងៃអង្គារថា រជ្ជទាយាទ Mohammed bin Salman បានប្រាប់លោកថា ទ្រង់មិនមានពាក់ព័ន្ធអ្វីឡើយនឹងករណីនេះ ព្រោះវាជាករណីឃាតកម្មកម្រិតទាបប៉ុណ្ណោះ។

ចំពោះលោក ត្រាំ គម្រោងឃាតកម្មរបស់ជនជាតិអារ៉ាប៊ីសាអូឌីតលើលោក Khashoggi នេះជាគំនិតស្មោគគ្រោកបំផុតបំផុត។ លោកបន្ថែមថា ឃាតុកម្មត្រូវបានរៀបចំឡើងយ៉ាងអន់បំផុត ខណៈដែលការព្យាយាមបិទបាំងរឿងនោះក៏អាក្រក់បំផុតដែរក្នុងប្រវត្តិសាស្ត្រ។

តាមពិតទៅការប្រកាសរបស់អាមេរិកដោយដាក់វិធានការប្រឆាំងជនជាតិអារ៉ាប៊ីសាអូឌីតនេះកើតឡើងបន្ទាបើពីប្រធានាធិបតី Recep Tayyip Erdogan បានចេញបកស្រាយជាសាធារណៈថា ករណីសម្លាប់លោក Khashoggi ត្រូវបានអារ៉ាប៊ីសាអូឌីតរៀបចំគម្រោងទុកជាមុនច្រើនថ្ងៃមកហើយ។ ប៉ុន្តែមេដឹកនាំរូបនេះនៅតែទាមទារឲ្យក្រុងរីយ៉ាដ ផ្តល់ចម្លើយថាតើសាកសពលោក Khashoggi នៅទីណា ហើយអ្នកណានៅពីក្រោយគម្រោងឃាតកម្មមានចរិតនយោបាយនេះដែរ៕