អន្តរជាតិ
ក្រុងមួយនៅអ៊ីតាលី សម្រេចពិន័យជាង២៥ដុល្លារលើអ្នកដែលចុចទូរសព្ទតាមផ្លូវ
× ក្រុង Sassari នៃកោះ Sardinia ប្រទេសអ៊ីតាលី បានព្រមានដល់អ្នកថ្មើរជើងទាំងអស់ឲ្យប្រុងប្រយ័ត្នចំពោះការដើរចុចទូរសព្ទតាមផ្លូវ។ ពួកគេមិនត្រឹមតែប្រឈមគ្រោះថ្នាក់ប៉ុណ្ណោះទេ ប៉ុន្តែក៏ត្រូវរងការពិន័យជាទឹកប្រាក់២២អឺរ៉ូ (ជាង២៥ដុល្លារអាមេរិក) ផងដែរ។
រៀងរាល់ឆ្នាំ ក្រុង Sassari មានគ្រោះថ្នាក់តាមផ្លូវប្រមាណ១០០០ករណី។ បើយោងតាមការផ្សាយរបស់ Les Echos គ្រោះថ្នាក់មួយចំនួន កើតឡើងលើថ្មើរជើងដែលដើរខ្វះការប្រុងប្រយុទ្ធ ពោលគឺការដើរចុចទូរសព្ទ ដោយមិនបានមើលមុខ មើលក្រោយ។
ប៉ូលិសក្រុង Sassari នឹងចេញពិន័យ២២អឺរ៉ូ ភ្លាមៗ ប្រសិនបើពួកគាត់មើលឃើញថា ថ្មើរជើងពិតឱនឈ្ញោកមើលទូរសព្ទមែននោះ។ ករណីដើរនិយាយទូរសព្ទ មិនស្ថិតក្រោមការពិន័យឡើយ ពីព្រោះថ្មើរជើងអាចគ្រប់គ្រងដំណើររបស់ខ្លួនបាន។
តាមពិតករណីនេះ មិនមែនជារឿងថ្មីនោះឡើយ នៅក្រុង Honolulu រដ្ឋហាវៃ សហរដ្ឋអាមេរិក អ្នកដើរចុចស្មាតហ្វូនតាមផ្លូវ ប្រឈមការពិន័យពី៣៥ដុល្លារ ទៅ៩៩ដុល្លារអាមេរិក ផងដែរ។
បើតាម Le Monde នៅអាមេរិក គ្រោះថ្នាក់ដែលបណ្តាលឲ្យថ្មើរជើងស្លាប់ មានកំណើន២២ភាគរយចន្លោះពីឆ្នាំ២០១៤ ដល់ឆ្នាំ២០១៦ ខណៈនៅបារាំងមានកំណើន១៥ភាគរយចន្លោះពីឆ្នាំ២០១០ ដល់ឆ្នាំ២០១៦ ដោយភាគច្រើនប្រឈមជាមួយរថយន្ត៕
© រក្សាសិទ្ធិដោយ thmeythmey.com