អន្តរជាតិ
សកលវិទ្យាល័យជប៉ុនរើសអើងបេក្ខជនភេទស្រីដែលចង់ដាក់ពាក្យចូលរៀន?
× ក្រោយបើកការស៊ើបអង្កេតមួយ រដ្ឋាភិបាលជប៉ុនបានរកឃើញករណីបន្ថែមទៀតទាក់ទងនឹងសកលវិទ្យាល័យ ដែលរើសអើងប្រឆាំងនឹងបេក្ខជនភេទស្រីដែលមានបំណងដាក់ពាក្យចូលរៀន។ ការស៊ើបអង្កេតនេះដំណើរការ ក្រោយមានរឿងអាស្រូវមួយនៅសាលាវេជ្ជសាស្ត្រទីក្រុងតូក្យូ។
ក្រសួងអប់រំជប៉ុនបានបើកការស៊ើបអង្កេតទ្រង់ទ្រាយធំមួយទៅលើសាលាវេជ្ជសាស្ត្រឯកជន និងរដ្ឋចំនួន៨១កន្លែង។ ការស៊ើបអង្កេតដ៏កម្រនេះបានធ្វើឡើង ក្រោយពីសកលវិទ្យាល័យវេជ្ជសាស្ត្រទីក្រុងតូក្យូ កាលពីខែសីហាបានសារភាពថា ខ្លួនបានកែប្រែជាលក្ខណៈប្រព័ន្ធដាក់ពិន្ទុប្រឡងរបស់បេក្ខជនភេទស្រី ដើម្បីរារាំងមិនឲ្យពួកគេអាចចូលរៀនបាន។
ក្រោយពីផ្តួចផ្តើមការស៊ើបអង្កេត ក្រសួងបានចុះទៅត្រួតពិនិត្យគ្រឹះស្ថានសិក្សាចំនួន៣០ ដើម្បីសិក្សាបន្ថែមអំពីវិធីសាស្ត្រដែលពួកគេរៀបចំការប្រឡង ដើម្បីជ្រើសរើសសិស្សឲ្យចូលរៀនក្នុងសកលវិទ្យាល័យ។
យោងតាមទីភ្នាក់ងារព័ត៌មាន AFP ក្នុងរបាយការណ៍មួយដែលបានទើបចេញផ្សាយថ្មីៗនេះ ក្រសួងបានលើកឡើងថា សកម្មភាពមិនប្រក្រតីជាច្រើនត្រូវបានរកឃើញនៅក្នុងសកលវិទ្យាល័យមួយចំនួន។ ប៉ុន្តែ ក្រសួងពុំបានបញ្ជាក់ឲ្យបានច្បាស់លាស់ពីចំនួន ឬឈ្មោះរបស់សាលាទាំងនោះឡើយ។
របាយការណ៍ដដែលបានរកឃើញភស្តុតាងដែលបង្ហាញថា សាលាទាំងនោះបានប្រើប្រាស់វិធីសាស្ត្រជាច្រើន ដើម្បីទប់ស្កាត់មិនឲ្យបេក្ខជន និងបេក្ខនារីអាចប្រឡងចូលរៀនសម្រាប់លើកទីពីរ ឬទីបីបាន។ ម្យ៉ាងវិញទៀត បេក្ខនារីខ្លះត្រូវបានសាលាបដិសេធឲ្យចូលរៀន ទោះជាពួកគេទទួលបានលំដាប់ពិន្ទុដែលគ្រប់គ្រាន់សម្រាប់ចូលរៀនក៏ដោយក្តី។
យ៉ាងណាមិញ ក្រសួងបានលើកឡើងថា បច្ចុប្បន្ននេះខ្លួនពុំមានគម្រោងដាក់ពិន័យលើសកលវិទ្យាល័យដែលបានពាក់ព័ន្ធ ឬ បង្ហាញឈ្មោះសាលាទាំងនោះជាសាធារណៈនោះឡើយ។
ជាមួយគ្នានេះ ក្រសួងបានទទូចឲ្យសកលវិទ្យាល័យទាំងអស់បញ្ឈប់ការរើសអើងទៀតដើម្បីធានថា អ្នកមានបំណងចង់ចូលរៀន អាចចូលប្រឡងដោយស្ងប់ចិត្តបាន។
គួរបញ្ជាក់ផងដែរថា លទ្ធផលចុងក្រោយនៃការស៊ើបអង្កេត នឹងត្រូវបានចេញផ្សាយនាខែធ្នូខាងមុខ ដោយក្រសួងមានគម្រោងចុះទៅពិនិត្យ និងស្វែងយល់តាមសកលវិទ្យាល័យឲ្យបានច្រើនបន្ថែមទៀត។ ត្រង់នេះក្រសួងបានអះអាងថា ការស៊ើបអង្កេតបច្ចុប្បន្ននេះគឺផ្តោទៅលើតែសាលាវេជ្ជសាស្ត្រ ប៉ុន្តែការស៊ើបអង្កេតអាចនឹងត្រូវពង្រីកឲ្យកាន់តែធំ ប្រសិនបើសកម្មភាពមិនប្រក្រតីត្រូវបានរកឃើញនៅឯស្ថាប័នសិក្សាផ្សេងៗទៀសតនោះ៕
Tag:
ជប៉ុន
ការរើសអើង
សកលវិទ្យាល័យ
© រក្សាសិទ្ធិដោយ thmeythmey.com