កម្ពុជា នឹងបញ្ជូនពលករ៥ពាន់នាក់ ទៅធ្វើការនៅគុយវ៉ែត

ជាតិ

សង្គមជាតិ

កម្ពុជា នឹងបញ្ជូនពលករ៥ពាន់នាក់ ទៅធ្វើការនៅគុយវ៉ែត

25, Oct 2018 , 1:08 pm

រូបភាព

រួបភាព បានពីក្រសួងការងារ និងបណ្តុះបណ្តាលវិជ្ជាជីវៈ

ដោយ: អ៊ូ សុខមាន (OU Sokmean)

នៅឆ្នាំ២០១៩ កម្ពុជា នឹងបញ្ជូនពលករ៥ពាន់នាក់ ទៅបម្រើការងារលើកដំបូង នៅប្រទេសគុយវ៉ែត។ នេះបើតាមលោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដែលបានថ្លែងប្រាប់អ្នកសារព័ត៌មាន ក្នុងជំនួបពិភាក្សាការងារជាមួយលោកស្រី Hend Subaih BALSUBAIH រដ្ឋមន្ត្រីក្រសួងសង្គមកិច្ច និងការងារ និងជារដ្ឋមន្ត្រីទទួលបន្ទុកកិច្ចការសេដ្ឋកិច្ចនៃរដ្ឋគុយវ៉ែត។

ក្នុងកិច្ចពិភាក្សាខាងលើ ដែលបានធ្វើឡើងនាថ្ងៃទី២៤តុលា នៅទីស្ដីការក្រសួងការងារ លោក អ៊ិត សំហេង និងលោកស្រី Hend Subaih BALSUBAIH បានព្រមព្រៀងគ្នា នឹងជំរុញកិច្ចសហប្រតិបត្តិការ ឱ្យកាន់តែជិតស្និទ្ធថែមទៀត លើវិស័យការងារ និងបណ្ដុះបណ្ដាលវិជ្ជាជីវៈ។

លោក អ៊ិត សំហេង បានថ្លែងដូច្នេះថា កម្ពុជានឹងរៀបចំកម្លាំងពលកម្ម៥ពាន់នាក់ ដែលបានជ្រើសរើសគ្រប់លក្ខខណ្ឌ ទៅបម្រើការងារនៅប្រទេសគុយវ៉ែតជាលើកដំបូង។ កម្លាំងពលកម្មនេះ ជាកម្លាំងពលកម្មគ្រប់ផ្នែក ទាំងផ្នែកសេវាកម្ម ឧស្សាហកម្ម និងកសិកម្ម។

លោក អ៊ិត សំហេង រដ្ឋមន្តី្រក្រសួងការងារ និងបណ្តុះបណ្តាលវិជ្ជាជីវៈ (រូបភាពបានពីក្រសួងការងារ)

លោក បានបញ្ជាក់ថា៖«ប្រសិនបើស្ថានភាពនៅប្រទេសគុយវ៉ែតល្អប្រសើរ ស្របទៅនឹងអ្វីដែលពលករកម្ពុជាទទួលយកបាន ដោយមានលក្ខខណ្ឌការងារល្អ ប្រាក់ឈ្នួលសមរម្យ រាជរដ្ឋាភិបាលកម្ពុជា នឹងជំរុញឲ្យមានការបញ្ជូននេះឲ្យបានកាន់តែច្រើន»។

ចំពោះការជ្រើសរើសពលករទៅបម្រើការងារនៅប្រទេសគុយវ៉េត ត្រូវមានការបណ្ដុះបណ្ដាលជាមុនឲ្យបានល្អ ដើម្បីឲ្យស្គាល់ពីស្ថានភាពប្រទេស នឹងទទួលស្គាល់ពីវប្បធម៌ និងជំនាញការងារ ពិសេសលក្ខខណ្ឌក្នុងការរស់នៅនៅទីនោះផ្ទាល់តែម្តុង។ នេះបើតាមលោក អ៊ិត សំហេង៕