សិង្ហបុរី ទទូចឲ្យចិនពង្រឹងទំនាក់ទំនងជាមួយរដ្ឋដទៃដើម្បីឲ្យការឈានទៅក្លាយជាមហាអំណាចរបស់ខ្លួនមានសន្តិភាព

អន្តរជាតិ

សិង្ហបុរី ទទូចឲ្យចិនពង្រឹងទំនាក់ទំនងជាមួយរដ្ឋដទៃដើម្បីឲ្យការឈានទៅក្លាយជាមហាអំណាចរបស់ខ្លួនមានសន្តិភាព

26, Oct 2018 , 5:15 pm

រូបភាព

រូបភាព៖ Straits Times

ដោយ: ថ្មីៗ

ចិន និងសិង្ហបុរី ប្តេជ្ញាពង្រឹងកិច្ចសហប្រតិបត្តិការយោធាទ្វាភាគី ក៏ដូចជាកិច្ចសហប្រតិបត្តិការនានាក្នុងក្របខណ្ឌតំបន់ដូចជាការធ្វើសមយុទ្ធយោធារួមគ្នាឲ្យកាន់តែច្រើនផង។ សិង្ហបុរីបានឆ្លៀតទទូចឲ្យចិនព្យាយាមភ្ជាប់ទំនាក់ទំនងឬសហការជាមួយប្រទេសដទៃទៀតដើម្បីធានាថា ចិនងើបឡើងជាមហាអំណាចដោយសន្តិភាព។

ក្នុងជំនួបទ្វេភាគីនាថ្ងៃ ២៤ ខែតុលា នាទីក្រុងប៉េកាំង រដ្ឋមន្ត្រីការពារជាតិសិង្ហបុរីលោក Ng Eng Hen និងសមភាគីចិនលោក Wei Fenghe បានបង្ហាញការឯកភាពគ្នាថា ចិន និងអាស៊ានចាំបាច់ត្រូវពង្រឹងកិច្ចសហប្រតិបត្តិការយោធាទ្វេភាគីបន្ថែមទៀត។

យោងតាមសារព័ត៌មាន Straits Times ប្រមុខការពារជាតិទាំងពីរយល់ឃើញថា ការសហការគ្នារវាងអាស៊ាន និងចិនត្រូវផ្តោតលើការផ្លាស់ប្តូរទស្សនកិច្ចមន្ត្រីជាន់ខ្ពស់។ លោក Ng បានផ្តល់យោបល់ថា អាស៊ាននិងចិនចាំបាច់ត្រូវមានការធ្វើសមយុទ្ធរួមគ្នាច្រើននៅពេលអនាគត ដែលអនុញ្ញាតឲ្យយោធាទាំងសងខាងកសាងទំនុកចិត្ត និងអាចពង្រឹងសហការគ្នាក្នុងរយៈពេលយូរអង្វែងដើម្បីដោះស្រាយបញ្ហារួមគ្នា។

ការលើកឡើងរបស់ប្រមុខការពារជាតិទាំងពីរជុំវិញការប្រឹងប្រែងពង្រឹងកិច្ចសហប្រតិការយោធានេះកើតឡើងនៅពេលដែលចិនរៀបចំវេទិកាការពារជាតិ Xiangshan លើកទី៨ ហើយក៏កើតឡើងស្របពេលដែលអាស៊ាន និងចិនកំពុងធ្វើសមយុទ្ធយោធារួមគ្នាជាលើកដំបូងផងដែរ។

បើតាមទូរទស្សន៍សិង្ហបុរី សមយុទ្ធអាស៊ាន-ចិនដែលត្រូវបានរៀបចំឡើងនៅខេត្តក្វាងទុង មាននាវាប្រាំបីគ្រឿង បូករួមជាមួយកងទ័ពប្រហែល ១០០០នាក់ និងមានប្រើប្រាស់ឧទ្ធម្ភាគចក្រផងដែរ។ ប្រទេសកម្ពុជា ឥណ្ឌូណេស៊ី ម៉ាឡេស៊ី និងមីយ៉ាន់ម៉ាត្រឹមបញ្ជូនអ្នកសង្កេតការណ៍ទៅចូលរួមប៉ុណ្ណោះ។ សមយុទ្ធរួមគ្នានេះដែលមានគោលដៅរក្សាសន្តិសុខ សន្តិភាព និងស្ថិរភាពតំបន់នោះក៏ផ្តោតលើការហ្វឹកហ្វឺនពង្រឹងសមត្ថភាពស្វែងរក និងសង្គ្រោះដែរ។

កាលពីសប្តាហ៍មុន សិង្ហបុរីដែលជាប្រធានអាស៊ានបានរៀបចំកិច្ចប្រជុំរដ្ឋមន្ត្រីការពារជាតិអាស៊ានបូក (ADMM Plus) លើកទីប្រាំ ហើយក្នុងកិច្ចប្រជុំនោះភាគីពាក់ព័ន្ធបានឯកភាពគ្នាបង្កើតបណ្តាញទំនាក់ទំនងពិសេសផ្ទាល់រវាងអាស៊ាននិងចិន រួមទាំងឈានទៅបង្កើតការផ្លាស់ប្តូរទស្សនកិច្ចស្ថាប័នស្រាវជ្រាវ និងកម្មវិធីផ្លាស់ប្តូរទស្សនកិច្ចមេដឹកនាំវ័យក្មេង។

ដោយឡែក ក្រៅពីផ្តល់យោបល់ឲ្យមានការពង្រឹងកិច្ចសហប្រតិបត្តិការការពារជាតិរវាងអាស៊ាន និងចិន រដ្ឋមន្ត្រីការពារជាតិសិង្ហបុរីលោក Ng ក៏បានទទូចឲ្យចិនដែលជាមហាអំណាចជាន់ថ្មីនោះ បន្តការភ្ជាប់ទំនាក់ទំនងជាមួយប្រទេសដទៃឲ្យកាន់តែជិតស្និទ្ធិដើម្បីអាចឲ្យប្រទេសដទៃយល់ឃើញថា ការត្រដែតឡើងរបស់ចិនមិនបង្កបញ្ហាដល់តំបន់។ លោក Ng បង្ហើបបន្តិចដែថា ចិនទទួលស្គាល់ដែរជុំវិញការធ្វើទំនើបកម្មយោធាយ៉ាងលឿនរហ័សរបស់ខ្លួនកន្លងមកនោះបានធ្វើឲ្យបណ្តាប្រទេសដទៃមានអារម្មណ៍មិនស្រួលដូចគ្នា៕