ស្នាដៃរបស់សមិទ្ធករវ័យក្មេង មុនី កាន់ ដារង្គ ដែលមានចំណងជើងថា «ខ្យល់ខែកុម្ភៈ» បានជាប់ជ័យលាភីលេខមួយក្នុងការប្រកួតប្រជែងមហោស្រពភាពយន្តខ្លីចតុមុខ (Chaktomuk ShotFilm Festival) លើកទី៧ ដែលត្រូវបានប្រកាសកាលពីរាត្រីថ្ងៃអង្គារ ទី៣០ ខែតុលា នៅសាលមហោស្រពចតុមុខ។
ក្រោមការរៀបចំរបស់ក្រុមភាពយន្ត «ឈូករ័ត្ន» មហោស្រពភាពយន្តខ្លីចតុមុខលើកទី៧ បានបញ្ចប់ទៅដោយរលូន។ ក្រោយការចាក់បញ្ចាំងរយៈពេល៤ថ្ងៃនៅតាមរោងភាពយន្តនានាក្នុងរាជធានីភ្នំពេញ គណៈកម្មការវិនិច្ឆ័យ បានជ្រើសរើសយករឿង «ខ្យល់ខែកុម្ភៈ» ជាភាពយន្តខ្លីល្អបំផុតប្រចាំឆ្នាំ ជាមួយនឹងប្រាក់រង្វាន់ចំនួន៥០០ដុល្លារអាមេរិក។
ក្រៅពីភាពយន្តរបស់សមិទ្ធករក្នុងស្រុក លោក មុនី កាន់ ដារង្គ ភាពយន្តបរទេស «On My Mind» របស់អាមេរិក ក៏ត្រូវបានទស្សនិកជនបោះឆ្នោតជ្រើសរើសជាភាពយន្តឆ្នើមដ៏ទាក់ទាញផងដែរ នៅក្នុងមហោស្រពភាពយន្តខ្លីចតុមុខលើកទី៧នេះ។
ជាលើកដំបូងសម្រាប់លោក មុនី កាន់ ដារង្គ ដែលទទួលបានជ័យលាភីក្នុងការប្រកួតប្រជែងភាពយន្ត បន្ទាប់ពីលោកបានប្រឡូកក្នុងវិស័យនេះអស់ប្រមាណ៥ឆ្នាំ។ ភាពយន្តដែលបង្ហាញឲ្យឃើញថា មនុស្សមិនអាចចេះតែចង់ឱ្យរឿងគ្រប់យ៉ាងល្អរហូត បានដូចបំណងនោះ បានប្រាប់អ្នកទស្សនាថា ត្រូវត្រៀមចិត្តទទួលយករាល់រឿងដែលមិនសមបំណង។
«ខ្ញុំផលិតរឿងនេះ ឡើងក៏ព្រោះតែចង់ឲ្យអ្នកមើល បានដឹងថារឿងអ្វីក៏ដោយមិនមែនយើងចង់ឱ្យវាល្អ យើងចង់ជួបគ្នារហូត វាចេះតែទៅតាមបំណងរបស់យើងនោះទេ»។ នេះជាការបញ្ជាក់របស់លោក ដារង្គ។
គួររំលឹកដែរថា មហោស្រពភាពយន្តខ្លីចតុមុខលើកទី៧ បានបើកទទួលយកភាពយន្តខ្លី តាំងពីដើម ឆ្នាំ ២០១៨មកម្ល៉េះ ដោយមានសមិទ្ធករដាក់ភាពយន្តខ្លីមកមហោស្រពចំនួន ៣០១រឿង ដោយក្នុង នោះយើងទទូលបានរឿងខ្លីខ្មែរចំនួន៣៩ និងរឿងបរទេសចំនួន២៦២។ ក្នុងនោះដែរ គណៈវិនិច្ឆ័យ បានជ្រើសរើសរឿងក្នុងជុំប្រកួតប្រជែងទីមួយដែលមានរឿងខ្លីខ្មែរចំនួន៦រឿងនិងរឿងខ្លីបរទេសចំនួន១២រឿង និងរឿងខ្លីចំរុះផ្សេងទៀតចំនួន៥៩រឿងដែលសរុបទាំងអស់បញ្ចូលគ្នាមាន ចំនួន៧៧ រឿងក្នុងចំណោម រឿងទាំង៣០១ដែលទទួលបាន។
ប្រធានមហោស្រពភាពយន្តខ្លីចតុមុខលើកទី៧ឆ្នាំ២០១៨ លោក គាំ វុត្ថា លើកឡើងថា ក្នុងឆ្នាំ២០១៨នេះចំនួនអ្នកទស្សនា មានការធ្លាក់ចុះពីជាង៤ពាន់នាក់ មកនៅត្រឹមតែជាង១ពាន់នាក់តែប៉ុណ្ណោះ។ ទោះជាយ៉ាងណាក៏ដោយលោក វុត្ថា បញ្ជាក់ថាភាពយន្តទាំង៧៧រឿងដែលបានបញ្ចាំង អ្នកទស្សនាទទួលស្គាល់ថាមានរឿងល្អមើលច្រើន។ លោកបានបញ្ជាក់៖«យើងបានទទួលការបញ្ចេញយោបល់ពីអ្នកទស្សនា តាមហ្វេសប៊ុកថាភាពយន្តរបស់យើងឆ្នាំនេះ មានរឿងល្អៗមើលច្រើន»។
រឿង «ខ្យល់ខែកុម្ភៈ» របស់លោក មុនី កាន់ ដារង្គ ទទួលបានជ័យលាភីនាំមុខភាពយន្តផ្សេងទៀត រួមមាន រឿង «ដងរែក» របស់លោក ផាន់ ណារ័ត្ន រឿង «ចាប់ជំរិត» របស់លោក គីមអាន សុភសក្តិ រឿង «ដើមត្នោត» របស់សមិទ្ធិករលោក ពៅ ពិសិដ្ឋ និងកញ្ញាសួង រដ្ឋា រឿង «ថ្ងៃបុណ្យនៃក្តីស្រលាញ់របស់ខ្ញុំ» របស់ លោក វង្ស បញ្ញាវ័ន និងរឿង «កុំស្រែក» របស់សមិទ្ធិករ វ៉ាន់ ស៊ីដារ៉ូ។
ចំណែករឿងខ្លីបរទេស «ON MY MIND» របស់អាមេរិក ទទួលបានការគាំទ្រជាង រឿង DEATH VAN (កាណាដា) រឿង NOVITATION CEREMONY (THAA SHIN PYU) (មីយ៉ាន់ម៉ា) រឿង GIRLY IS IN CONTROL OF HER LIFE (ហ្វីលីពីន) រឿង THOSE WHO CAN DIE(បារាំង) រឿង A COLD SUMMER NIGHT (ឥណ្ឌា) រឿង HAMMER DOWN (សហរដ្ឋអាមេរិក) រឿង GAWILAN (ហ្វីលីពីន) រឿង CRABGIRL (អ៊ុយក្រែន) រឿង BAM BAM BAM (កូរ៉េ) រឿង SUNKEN PLUM (ចិន) និងរឿង COUNTERFEIT KUNKOO (ឥណ្ឌា)។
អ្នកនាំពាក្យរបស់មហោស្រពភាពយន្តខ្លីចតុមុខ លោក ស៊ុំ ស៊ីថែន ក៏មានជំនឿយ៉ាងមុតមាំ ថា៖«ភាពយន្តខ្លី នៅតែជាស្ពានដ៏រឹងមាំដល់យុវសមិទ្ធករភាពយន្តខ្មែរយើង។ ទោះបីបន្ទាប់ពីខ្ញុំចប់ ការសិក្សាខាងផលិតភាពយន្ត (Producing Course) នៅកូរ៉េក្តី ក៏ទាំងអ្នកជំនាន់ថ្មី និងជំនាន់ចាស់ របស់គេក៏ជំរុញ ចាប់ផ្តើមអាជីពពីការធ្វើរឿងខ្លីជាមុនសិនដែរ។ ពោលគឺ ភាពយន្តខ្លី ចំណាយ ធនធានតិច តែផ្តល់មេរៀនអាជីពបានច្រើន រាល់ពេលដាក់ប្រកួតមហោស្រពម្តងៗ មិនថាក្នុងស្រុក ឬក្រៅស្រុកទេ»។
មហោស្រពភាពយន្តខ្លីចតុមុខ ត្រូវបានបង្កើតឡើងនៅឆ្នាំ ២០១២ សំរាប់ ផ្តល់ឱកាសដល់យុវជនដែលស្រលាញ់ភាពយន្តនិងចង់បង្ហាញស្នាដៃរបស់ខ្លួនទៅកាន់មហាជន ក៏ដូចជាចង់សិក្សាស្វែងយល់បន្ថែមពីការផលិតភាពយន្តខ្លី ដើម្បីចូលរួមចំណែកលើកស្ទួយ វិស័យភាពយន្តខ្មែរ៕